Onlayn ictimai-siyasi qəzet
"Zəngəzurda Türk Respublikası qurulacaq, Qərb orada 5 min terrorçu yerləşdirəcək” - İran mollakratiyasının absurd iddiası
Musavat.com xəbər verir ki, İranın Qafqaz məsələləri üzrə eksperti, professor Hüseyn Əhmədi növbəti dəfə Zəngəzur dəhlizi barədə absurd iddia ilə çıxış edib. O bildirib ki, guya Qərbin planı Zəngəzurda “Türk Respublikası” yaratmaq və orada 5 min terrorçu yerləşdirməkdir. Əhmədiyə görə, İran rəsmiləri problemi “sadələşdirərək” dəhlizi nəqliyyat yolu, tranzit arteriyası və ya geosiyasi keçid kimi fərqləndirmirlər.
Ekspert daha da irəli gedərək iddia edib ki, əgər bir gün NATO “təhlükəsizlik şirkəti öhdəliklərini yerinə yetirmir” bəhanəsi ilə Ermənistan sərhədinə nəzarəti ələ alsa, İran buna hansı cavabı verəcək?
Musavat.com -a görə bu cür gülünc bəyanatlar əslində İran mollakratiyasının düşüncə tərzini ortaya qoyur. İranın teokratik dairələri Zəngəzur dəhlizini gözdən salmaq, onun regional əhəmiyyətini kiçiltmək üçün hər vasitədən istifadə edirlər. Halbuki, Azərbaycan və Ermənistan arasında Vaşinqtonda imzalanmış sənədlə "Tramp yolu"nun açılması qərara alınıb və bu, bölgədə yeni geosiyasi reallıq yaradıb.
İran daxilində də Zəngəzur məsələsinə münasibət parçalanıb. Prezident Məsud Pezeşkiyanın rəhbərlik etdiyi siyasi hakimiyyət dəhlizin İran üçün də faydalı ola biləcəyini bildirir. Rəsmi açıqlamalarda Ermənistan rəhbərliyi ilə danışıqlarda İranın “qırmızı xətləri”nin nəzərə alındığı vurğulanır. Ancaq teokratik dairələr – mollakratiya və SEPAH – bu prosesi radikal şəkildə rədd edir, həm Azərbaycanı, həm də beynəlxalq vasitəçiləri hədələməklə məşğuldur.
Bu, video-paylaşımın SEPAH kanalları tərəfindən tirajlanması da təsadüfi deyil. Bu qurum hər zamanki kimi Azərbaycanı, Ermənistanı və bütövlükdə regionu təhdid etməklə yanaşı, reallıqda gücü çatmadığı prosesi dayandırmaq istəyirmiş kimi davranır. Halbuki, Zəngəzur dəhlizi – Turan yolu, Tramp yolu – artıq beynəlxalq sənədlərdə təsdiqlənmişdir və onun açılması yalnız zaman məsələsidir.
İran mollakratiyasının iddiaları nə qədər “sensasion” təqdim edilsə də, mahiyyətcə cəmiyyətin və regionun zəkası ilə istehza etməkdən başqa bir şey deyil. Zəngəzur dəhlizində “5 min terrorçu” bəhanəsi isə sadəcə Tehran rejiminin çaşqınlığını və geosiyasi panikasını göstərir.
Musavat.com
XƏBƏR LENTİ
29 Avqust 2025
ŞƏRHLƏRŞƏRH YAZ