Onlayn ictimai-siyasi qəzet
Rusiya ilə birgə universitet yaratmaq ideyası
Ceyhun Məmmədov: “Sankt-Peterburq Dövlət Universiteti ilə belə bir layihə həyata keçirilməsi təhsilimizə müsbət təsir göstərəcək”
Rusiya-Azərbaycan Birgə Universitetinin yaradılması müzakirə olunur. Bu barədə Rusiya Prezidenti Vladimir Putin Azərbaycan Prezidenti İlham Əliyevlə keçirdiyi mətbuat konfransında deyib. O qeyd edib ki, Azərbaycan Prezidenti bu ideyanı dəstəkləyib: “Ümid edirəm ki, bunu kifayət qədər tez həyata keçirəcəyik. Bizim tərəfimizdən Sankt-Peterburq Dövlət Universiteti belə bir layihəyə qoşulmağa hazırdır”, - Vladimir Putin bildirib.
Xatırladaq ki, Azərbaycanda bu günə qədər bu cür universitet modeli təcrübəsi artıq var. Belə ki, 2009-cu ildə M. V. Lomonosov adına Moskva Dövlət Universitetinin Bakı filialı, eləcə də Türkiyə -Azərbaycan Universiteti, İtaliya-Azərbaycan Universiteti yaradılıb.
Rusiya ilə birgə universitet yaratmaq ideyasını tanınmışlar necə qarşılayır?
Ceyhun Məmmədov
Milli Məclisin VI çağırış deputatı Ceyhun Məmmədov sorğumuza bu cür cavab verdi:
“Hazırda Azərbaycanda Rusiyanın bir neçə universitetinin filialı fəaliyyət göstərir. Bu universitetlər artıq uzun müddətdir Azərbaycan təhsilinə öz töhfəsini verir. Ümumiyyətlə, dünyada bu cür birgə universitetlərin yaradılması ənənəsi var. Ölkəmizdə də Türkiyə-Azərbaycan Universiteti, İtaliya-Azərbaycan Universiteti fəaliyyət göstərir. Bu baxımdan hesab edirəm ki, Azərbaycan-Rusiya Birgə Universitetinin fəaliyyət göstərməsi normaldır və burada qeyri-adi heç bir məsələ yoxdur. Yəni biz məsələlərə sırf tarix prizmasından yanaşmalı deyilik. Hesab edirəm ki, birgə universitetlərin fəaliyyəti, təhsil sahəsində təcrübələrin bölüşdürülməsi təhsilin inkişafı baxımından xüsusi önəm və əhəmiyyət daşıyır. Yəni biz əksinə, bu cür universitetlərin yaradılmasında maraqlı olmalıyıq.
Bəli, Rusiya ilə bağlı Azərbaycanda fərqli münasibətlər var, lakin onu da nəzərə almalıyıq ki, Rusiya bizim tarixi və böyük qonşumuzdur və biz Rusiya ilə münasibətlərimizi, əlaqələrimizi inkişaf etdirməli, daha da gücləndirməliyik və bu mənada belə bir universitetin yaradılması çox önəmlidir. Sankt-Peterbuq Universiteti Rusiyanın ən böyük və ən güclü universitetlərindən biridir. Həm ötən əsrin əvvəllərində, həm də sonra xeyli sayda azərbaycanlı gənc bu universitetin məzunu olub. Hesab edirəm ki, Sankt-Peterburq Dövlət Universiteti ilə belə bir layihə həyata keçirilməsi təhsilimizə müsbət təsir göstərəcək. Bu baxımdan hər birimiz bu prosesdə fəal olmağa və bu prosesə töhfə verməyə çalışmalıyıq".
Fazil Mustafa
Milli Məclisin VI çağırış deputatı Fazil Mustafa isə bildirib ki, ölkədə yeni universitetlərin açılması ümumilikdə Azərbaycan təhsilin səviyyəsinə xidmət edən amildir: “Təki universitet açılsın. Lakin biz elə bir universitet modeli açmalıyıq ki, bu geniş əhatəli və faydalı təhsil müəssisəsinə çevrilə bilsin. Təəssüf ki, son illərdə bu istiqamətdə açılan universitetlərdə eyni halı müşahidə etmirik. Ümidimiz Qarabağ Universitetinədir. Türkiyə-Azərbaycan Universiteti ideyası da arzulanan səviyyədən uzaq görünür. Əgər Rusiya-Azərbaycan Universiteti də Türkiyə-Azərbaycan Universiteti kimi müəyyən dərəcədə zəif model şəklində düşünülürsə, onun açılmasnın mənası yoxdur. Bu gün Qarabağ Universiteti kimi səviyyəli, özünün kampı olan universitet açılacaqsa, bu, müsbət tendensiyadır. Biz daha çox sanballı universitetin açılması məsələsi üzərində düşünməliyik, onun tərəfdarıyıq. Yəni fərqi yoxdur Rusiya, Türkiyə və yaxud hansısa Avropa ölkəsi olsun, təki səviyyəli universitet açılsın. Əgər səviyyəli universitet açıqlacaqsa, buna niyə qarşı olaq? Bu baxımdan da bu kimi məsələləri hədsiz həyəcanla qarşılamağın əsası yoxdur”.
Xalidə GƏRAY,
“Yeni Müsavat”
XƏBƏR LENTİ
20 Sentyabr 2024
19 Sentyabr 2024
ŞƏRHLƏRŞƏRH YAZ