Onlayn ictimai-siyasi qəzet
AŞ PA-nın yaz sessiyası - Azərbaycan qayıdır, yoxsa...
Nümayəndə heyətindən mesaj: “Bizim marağımız yoxdur ki, indiki vaxtda bizi minnətlə Strasburqa çağırsınlar”
Avropa Şurası Parlament Assambleyasının (AŞ PA) aprelin 7-dən 12-dək Fransanın Strasburq şəhərində keçiriləcək yaz sessiyasının gündəliyi məlum olub. AZƏRTAC xəbər verir ki, sessiya çərçivəsində Gürcüstan, Türkiyə, Ukrayna və Serbiya ilə bağlı məsələlər müzakirə ediləcək. “Qəzzanın humanitar blokadasına dərhal son qoyulması və atəşkəsin bərpası üçün təcili çağırış” mövzusunda müzakirələr aparılacaq.
Eyni zamanda Avropada demokratik təhlükəsizliyə təhdid kimi xarici müdaxilə ilə bağlı növbəti məsləhətləşmələr keçiriləcək. Avropa Şurası (AŞ) ilə Avropa Siyasi Birliyi arasında qarşılıqlı əlaqələr, Avropa İnsan Hüquqları Məhkəməsinin qərarlarının icrası, Avropa İttifaqının Avropa İnsan Hüquqları Konvensiyasına qoşulmasının hüquqi aspektləri və ətraf mühitin mühafizəsinə dair AŞ-nin Konvensiya layihəsi debata çıxarılacaq. AŞ çərçivəsində qanunun aliliyi və korrupsiyaya qarşı mübarizənin aparılması ilə bağlı müzakirələr olacaq.
AŞ PA-da fəaliyyətini bir il iki aydır dayandırmaq məcburiyyətində qalan Azərbaycan parlamentinin nümayəndə heyəti bu qurumla əlaqələri bərpa etməyi hələ düşünmür. Ötən ilin yanvarında AŞ PA Azərbaycan nümayəndə heyətinin etimadnaməsini təsdiqləməyib, buna qarşılıq olaraq, nümayəndə heyəti də bu qurumdakı fəaliyyətini qeyri-müəyyən müddətə dayandırdığını bəyan edib. Amma Azərbaycan orada olmadığı halda, son qış sessiyasında da yenə ölkəmiz ittihamlara və əssasız hücumlara məruz qaldı. Rəsmi Bakı hesab edir ki, AŞ PA bu böhtan və ikili standartlar siyasətindən əl çəkməlidir.
Azərbaycan nümayəndə heyətinin AŞ PA-nın yaz sessiyasında iştirakı mümkünmü?
Fazil Mustafa
Azərbaycanın AŞ PA-da nümayəndə heyətinin üzvü Fazil Mustafa “Yeni Müsavat”a bildirdi ki, Azərbaycan nümayəndə heyətinin yaz sessiyasına qatılmaq qərarı verilməyib. Ona görə də bu gün üçün sessiyaya qatılmaq barədə dəqiq fikir söyləmək mümkün deyil: “İndiki vəziyyətdə yaz sessiyasına getmək məsələsi gündəmimizdə deyil. Olsaydı ən azı 15-20 gün öncədən müəyyən olunardı. Bizim AŞ PA-ya gedişimizlə bağlı qərar yoxdur. Ona görə də bu məsələyə yaz sessiyasından sonrakı sessiyalarda aydınlıq gələ bilər. Ancaq qarşıdakı yaz sessiyasında Azərbaycan nümayəndə heyətinin səfəri nəzərdə tutulmur. AŞ PA-nın da bunun üçün hər hansı qərarı yoxdur. Heç bizim marağımız yoxdur ki, indiki vaxtda hansısa şəkildə bizi minnətlə AŞ PA-ya çağırsınlar. Onların minnəti olsun ki, Azərbaycan nümayəndə heyəti orada iştirak edəcək”.
Etibar SEYİDAĞA,
“Yeni Müsavat”
XƏBƏR LENTİ
05 Aprel 2025
04 Aprel 2025
ŞƏRHLƏRŞƏRH YAZ