Onlayn ictimai-siyasi qəzet
Qəlbim sizindir
Bakıda ünlü italyan heykəltəraşı Lorenzo Kuinnin “Qəlbim sənindir” əsərinin açılış mərasimi olmuşdur. Bu, büllurdan və 6500 illik palıd ağacından hazırlanıbmış. Demək, iki dənə insan əlidir və onlar nəyəsə görə ürəyi tutublar.
Açığı, bu cür sənət əsərlərinə mən “Sədərək” ticarət mərkəzinin “Şirniyyat” hissəsində çox rast gəlmişəm, lakin əsas məsələ yaratdığın əsərə konsepsiya verməkdir. İzah etməkdir. Yoxsa mənası olmur. Müasir incəsənətdə izahat vacibdir. Hətta bəzən muzeydə adamlar yerdə banan qabığı tapırlar, bilmirlər bu da ekspozisiyaya daxildirmi. Yalnız bələdçi izahını verəndə söhbəti tutursan. Necə deyərlər, Baden-Badenin mavi gecələri...
Ümumiyyətlə, son illər İtaliya ilə əlaqələrimizin yüksək səviyyədə olması sevindiricidir. Biz ora neft satırıq, əvəzində də heykəl alırıq. Gözəl barterdir. Hərçənd bəzən xalq bu mədəni-iqtisadi əlaqələri qiymətləndirməkdə acizlik çəkir, məsələn, keçən il elə həmin Kuinn müəllimin çılpaq övrət heykəli xeyli lüzumsuz diskussiyalara səbəb olmuşdu, deyirdilər heykəl əxlaqımızı pozur, axırda Bakı Şəhər İcra Hakimiyyəti məcbur oldu onu götürüb nazirlərdən birinin villasının həyətinə qoysun. Yaxud başqa bir italyan heykəltəraş pomidor-badımcan heykəlləri düzəldib paytaxtımızı bəzəmişdi. (Sanki bu italyanlarda Ömər müəllimin bazarına girmək həvəsi hiss edirəm. Bəlkə bunun qarşısını vaxtında almaq lazımdır).
Eybi yoxdur, yavaş-yavaş düzələcək, xalq elitar mədəniyyəti qəbul edəcəkdir. Moskva birdən-birə tikilməyib. (Tarixçi alimlərimizdən Zaur müəllimin araşdırmalarına görə, Moskvanı Şərurlu İsfəndiyar tikib, lakin bu başqa mövzudur, malı mala qatmayaq). Bu millət opera-balet sənətini də vaxtilə qəbul etmirdi, Leyli rolunu kişilər oynayırdılar. İndi, maşallah, haçan efirə baxsan çılpaq zənən görürsən, gözün-könlün açılır.
Yeri gəlmişkən, Lorenso müəllimin bu məşhur heykəlində istifadə edilən “6500 illik palıd” söhbəti mənə bir az qaranlıq qaldı. Doğrudanmı palıdı kəsib ürək fiquru qayırmışdır? Bəlkə heç ağacın o qədər yaşı yoxdur, taxtanı Dərnəgül bazarından alıblar?
Sənətkarın öz izahatı da suallara aydınlıq gətirmir: “Mən eşqə, məhəbbətə inanıram. İnsanlar görüşdükdə, onların qəlbləri birləşdikcə, əslində onlar heç vaxt ayrılmırlar. Bir halda ki insanlar arasında birləşmə var, o artıq sarsılmazdır. Qədim palıd materialından hazırlanan "Qəlbim sənindir" əsəri isə daima davam edən münasibətlərin uzun ömrünə dəlalət edir" - Lorenso Kuinn belə söyləmişdir.
Bu nə deməkdir? Hökumətimizin qəlbi daim xalqladırmı? Əks halda, bu kompozisiyanı kişi-qadın münasibətlərinə aid etsək heç də sevindirici mənzərə ilə qarşılaşmırıq. Hər il boşananların, ayrılanların sayı artır. İnsanlarımız kərə yağının bahalaşmağına dözmürlər. (Eşqdə yağ vacibdir. Yağ olmayanda münasibətlər cırıldamağa başlayır, quruyur, çat verir).
Bəlkə ovcunda ürək tutmuş bu əl ürək cərrahı-deputatımız Rəşad müəllimə həsr edilibdir?
Bəlkə burada müxalifətə gizli mesaj vardır? Ciyərini çıxardaram mənasında. Amma burada ciyər yox, ürəyi əldə tutubdur.
Hər bir halda dövlətimizdə belə tədbirlərin olması sevindiricidir. Məsələn, təzəlikcə dəmir yolumuzun bəzi stansiyalarında yeni turniketlər xalqın istifadəsinə verilmişdir. Sən demə, turniket az imiş, nəticədə basabas, növbə olurmuş. Lap o yazılması mümkün olmayan anekdotdakı kimi.
Yaxud ondan da qabaq “28 May” metrosunda eskalator təmir edildi. Avtovağzaldan 8-ci kilometrə gedən 7 nömrəli avtobusun sürücüdən arxadakı pəncərəsinin tozu silindi. Bakıda “Barselona” futbol klubunun akademiyasının açılması çərçivəsində görüşlər keçirildi.
Son tədbirlə bağlı qərara alınıb ki, “Barselona” bizə azdır, açmışkən “Real”ın da məktəbini açaq, qoy bir-biri ilə oynasınlar. Həmçinin məktəbin yerinin müəyyən edilməsi çərçivəsində görüşlər münasibətilə Messini məşq elədiyi yerdə tutub qoluna saat bağlamışıq, o da razılığını bildirib. Hərçənd artıq Messinin qolunda bizim hədiyyə elədiyimiz saatlardan yer qalmayıbmış, bu dəfəkini ayağına keçirdibdir.
Hələlik bu qədər. Mənim də qəlbim sizindir, əziz oxucular.
Zamin HACI 
XƏBƏR LENTİ
05 Aprel 2025
04 Aprel 2025
ŞƏRHLƏRŞƏRH YAZ