Onlayn ictimai-siyasi qəzet
Azərbaycan AŞPA ilə əməkdaşlığı bərpa edəcəkmi? - Səməd Seyidov AÇIQLADI
Bir il öncə, yanvarın 24-də Azərbaycan Respublikasının Avropa Şurası Parlament Assambleyasındakı (AŞPA) nümayəndə heyəti təşkilatla əməkdaşlığı və sessiyalarda iştirakını qeyri-müəyyən müddətə dayandırmaq qərarına gəlib. Nümayəndə heyətimiz qurumun ölkəmizə qarşı qərəzli mövqeyinə etiraz edərək bəyanatla çıxış edib.
Musavat.com sözügedən bəyanatı xatırladır:
“Azərbaycan Respublikası qürurlu, müstəqil, suveren, demokratik və multikultural bir dövlətdir. Demokratiya bizim şüurlu seçimimizdir və biz 1991-ci ildə müstəqilliyimizi bərpa etdikdən sonra Azərbaycanda insan hüquqlarının müdafiəsi və qanunun aliliyinin təmin edilməsi istiqamətində böyük irəliləyişlərə nail olmuşuq. Avropa Şurası Parlament Assambleyasının (AŞPA) əsas məqsədi müxtəlif ölkələrin parlamentariləri arasında qarşılıqlı hörmət və bərabər hüquqlara əsaslanan dialoq üçün platforma olmaqdan ibarətdir.
Azərbaycan 2001-ci ildə Avropa Şurasına üzv olanda insan haqlarını və qanunun aliliyini müdafiə etmək məqsədi daşıyan bu təşkilatın Azərbaycanın beynəlxalq səviyyədə tanınmış ərazilərinin bir hissəsinin Ermənistan tərəfindən hərbi təcavüzə və işğala məruz qalması nəticəsində hüquqları pozulmuş yüz minlərlə azərbaycanlının hüquqlarının bərpasında Azərbaycana kömək edəcəyi və beləliklə regionda davamlı sülhün əldə olunması naminə ədalətin öz yerini tutacağı barədə səmimi bir ümid və gözlənti var idi. 2001-ci ildən 2020-ci ilə qədər olan 19 il ərzində AŞPA işğalçı dövlətdən - Ermənistandan Avropa Şurasının əsas dəyər və prinsiplərinə zidd hərəkətlərinə görə cavab verməyi tələb etməyib. Burada söhbət xüsusilə etnik təmizləməyə məruz qalmış azərbaycanlı qaçqın və məcburi köçkünlərin insan haqlarına qarşı açıq-aşkar hörmətsizlikdən gedir.
Azərbaycanın təcavüz, işğal və zorakı separatizm üzərində tarixi Qələbəsindən, ərazi bütövlüyünün və suverenliyinin bərpa olunmasından sonra biz Azərbaycanı ləkələmək, Azərbaycan xalqına uzun müddətdir inkar edilən ədalətin bərpası istiqamətində ölkənin əldə etdiyi nailiyyətlərə kölgə salmaq üçün təşkil olunmuş qarayaxma kampaniyası ilə üz-üzəyik. Təxminən 20 ilə yaxın müddətdə Azərbaycan nümayəndə heyəti erməni işğalının ağır nəticələrini gündəmə gətirərkən bizə deyirdilər ki, AŞPA münaqişə ilə bağlı məsələlərin müzakirəsi üçün düzgün format deyil. İndi isə həmin AŞPA və həmin deputatlar bunun əksini deyir və Azərbaycana hücum etmək üçün heç bir fürsəti əldən vermirlər. Beynəlxalq hüququn selektiv şərhi, dövlətlərin ərazi bütövlüyü və suverenliyi ilə bağlı məsələlərə fərqli yanaşma bu biabırçı təklifin müəlliflərinin rüsvayçı və ikiüzlü xarakterini nümayiş etdirir.
Təəssüf ki, AŞPA-dan bəzi üzv dövlətləri hədəfə almaq üçün platforma kimi istifadə olunur. Müəyyən qərəzli qruplar AŞPA-nın əsas prinsiplərindən öz dar maraqlarının təmini məqsədilə sui-istifadə edirlər. AŞPA-da siyasi korrupsiya, ayrı-seçkilik, etnik və dini nifrət, ikili standartlar, təkəbbürlülük, şovinizm hökm sürən praktikaya çevrilib.
Biz Azərbaycanın AŞPA-dakı nümayəndə heyətinin etimadnaməsinə etiraz etmək təşəbbüsünü bu çirkin kampaniyanın tərkib hissəsi kimi dəyərləndiririk. Biz, həmçinin bu təşəbbüsü Azərbaycanda hazırda gedən seçki prosesinə əsassız müdaxiləyə yönəlmiş məqsədyönlü və qəbuledilməz cəhd, ölkəmizdə demokratik təsisatların fəaliyyətinə xələl gətirən məkrli addımların bariz nümunəsi kimi qiymətləndiririk. Nümayəndə heyətimizin etimadnaməsini ratifikasiya etməkdən imtina ilə bağlı təklif bütövlükdə Avropa Şurasının etibarlılığına və qərəzsizliyinə ciddi zərbə olacaq, bunun ciddi və geri dönməz nəticələrinə görə məsuliyyət tamamilə onun təşəbbüskarlarının üzərinə düşəcək.
Dünyada heç kim, o cümlədən bu zalda əyləşənlər Azərbaycanla təhdid və şantaj dili ilə danışa bilməzlər. AŞPA-nın tarixində heç vaxt bu təşkilat özünü belə biabırçı şəkildə aparmayıb. AŞPA-da mövcud olan dözülməz irqçilik, Azərbaycanofobiya və İslamofobiya mühiti fonunda Azərbaycan nümayəndə heyəti AŞ PA ilə əməkdaşlığı və təşkilatda iştirakını qeyri-müəyyən müddətə dayandırmaq qərarına gəlib”.
Bəs Azərbaycan nümayəndə heyətinin iclaslarda yenidən iştirakı nə zaman mümkün olacaq?
Milli Məclisin Beynəlxalq münasibətlər və parlamentlərarası əlaqələr komitəsinin sədri Səməd Seyidov Musavat.com-a açıqlamasında bildirib ki, Azərbaycan obyektiv münasibətin tərəfdarıdır və öz mövqeyində israrlıdır:
“Biz bir il öncə AŞPA-da fəaliyyətimizi dayandıranda bəyan etdik ki, Azərbaycan əleyhinə qətnamələr, yaxud davranışlar qəbulolunmazdır. Əgər öz mövqeyini dəyişməsə, qeyri-obyektiv, saxta sənədlərin qəbul olunmasından əl çəkməsə və bu istiqamətdə siyasəti dəyişməsə, AŞPA ilə işləmək mümkün deyil. Bu müddətdə, bu vəziyyətdə Azərbaycan öz mövqeyində israrlıdır. Bizim üçün prioritet onların hərəkətə gəlməsidir.
Onlar bu məsələni gündəmə gətirməyə çalışırlar. Avropa Şurasının baş katibi Alen Berse COP29 zamanı Azərbaycana gəldi, cənab Prezident tərəfindən qəbul edildi. Azərbaycan öz mövqeyini bildirdi. Biz sadəcə obyektiv dialoq, normal, ikili standartlardan kənar münasibət istədiyimizi bildirdik. Lakin sonradan göründüyü kimi, AŞPA-da Azərbaycanla bağlı mövqe olduğu kimi qaldı, hətta noyabrın sonunda kəskin müzakirələr təşkil olundu”.
S.Seyidov vurğulayıb ki, AŞPA daxilində böhran yaranıb:
“Bu böhran təkcə Azərbaycana yox, başqa ölkələrə də təsir edir. Yanvarın 27-də sessiya başlayacaq, Azərbaycan nümayəndə heyəti sessiyada iştirak etməyəcək.
Gürcüstanın nümayəndə heyətinin səlahiyyətlərinin təsdiq olunmasını 6 ay uzadacaqlar. Başqa ölkələrdə də ciddi problemlər var. Yeri gəlmişkən, Gürcüstan Azərbaycanı dəstəkləyir və bunu açıq şəkildə bəyan etmişdi. Problem təşkilatın özündədir. AŞPA-da Azərbaycanafob, islamofob, qurumu girova götürmüş bir qrup şəxs var. Şvabe heç də sonuncu fiqur deyil, bəlkə də ən aparıcı fiqurdur. AŞPA Azərbaycanla bağlı mövqeyinə korrektələr etməsə, biz mövqeyimizi dəyişməyəcəyik. Biz konstruktiv dialoqa hər zaman açığıq. Cənab Prezidentin baş katib Alen Berseni qəbul etməsi, Nyu-Yorkda xarici işlər naziri Ceyhun Bayramovun baş katiblə görüşü bunu sübut edir.
Azərbaycanın gözləntisi AŞPA-nın qeyri-obyektiv, qərəzli, Azərbaycanafob, türkofob, islamofob mövqedən əl çəkməsidir”.
Nigar HƏSƏNLİ,
Musavat.com
XƏBƏR LENTİ
24 Yanvar 2025
ŞƏRHLƏRŞƏRH YAZ