Onlayn ictimai-siyasi qəzet
Düzü, son 30 ildə milli futbol komandamızın baş məşqçisi postunda Canni de Byazidən axmaq adam görməmişəm. Axmaq da var, axmaq da. Bu, lap zır axmaqdır.
Düzdür, o da dünən mətbuat konfransında azərbaycanlı jurnalistləri axmaq adlandırıb, deyib ki, heç vaxt belə axmaq jurnalistlərlə rastlaşmayıb, onlar sadəcə olaraq axmaqdırlar, heç nə edə bilmirlər və axmaq suallar verirlər.
Amma fakt budur ki, de Byazi özü də, İtaliyadan dəstə bağlayıb gətirdiyi məşqçilər korpusu da axmaqdır, budur, 3 ildir heç nə edə bilmirlər, hər dəfə jurnalistlərə və idman ictimaiyyətinə axmaq cavablar verirlər.
De Byazi o qədər axmaq bir məşqçidir ki, artıq onun özü yox, onu bizə ürcah edən və calayan da söyüşü haqq edir.
Bəlkə kimsə onun yeni gəldiyi vaxtlarda ondan nəsə bir parlaq qələbələr gözləyirdi, amma təvazökarlıqdan “San Siro” stadionu qədər uzaq olsa da, deyim ki, adamın ilk brifinqində dediklərinin bir neçə cümləsinə qulaq asandan sonra onun axmaq adam olduğunu sezdim və yazdım ki, bu adam Bakıda heç bir spagetti və ya pitsa yeyə bilməyəcək. Hətta 2021-ci ilin sentyabrında onun rəhbərlik etdiyi milli komandamızın növbəti biabırçı məğlubiyyətindən sonra belə bir başlıqlı yazı da yazmışdım: “De də, de, De Byazi, de, görək, bu nə oyundur?”
Həmin vaxt o, Qaradağ rayonu qədər ərazisi və əhalisi olmayan Lüksemburqa uduzmuşdu. İndi yekə-yekə deyir ki, bu, Belçikadır, əjdahadır. Bəs Lüksemburq nəydi, lotu?
Adam o qədər axmaqdır ki, durub futbolu idman maşınları ilə müqayisə edir, deyir, “Fiat” ilə “Ferrari”ni ötmək mümkün deyil.
Ay axmaq, “Fiat” da İtaliya maşınıdır, “Ferrari” də, sənə hər ay bir xaral pulu ona görə verirlər ki, oyunçularını “Ferrari” kimi yetişdirsən. Yox, bizimkilər “Ferrari” kimi şütüyəcəkdilərsə, onda sənə nə ehtiyac vardı?
İkincisi, dünyanın istənilən ölkəsindəki futbolçuların bir-birindən motoru, porşeni, əyləc sistemi artıq deyil. Hamısında eyni cür əzalardır: ürək, ciyər, dalaq, qol, qıç və sair. Heç bir futbolçuya 5,5 motor qoymurlar. Hamısı da aşağı-yuxarı eyni qida rasionu ilə qidalanır, eyni cür kalori qəbul edir. Müasir futbolda futbolçunun başqa futbolçudan üstünlüyü yalnız ustalığında, hazırlığında, məşq intensivliyində, məşqçilərinin onlara öyrətdiyini əxz etmələrindədir.
Belə anlaşılır ki, de Byazi kimi axmaqların özü və komandası sallana-sallana bazaya gəlir, meydana 4-5 top atıb “çıxın, bildiyiniz kimi, məşq edin” deyir, oyunçular da bir az məzələnir, bir az əylənir, zarafatlaşır, dağılışırlar. Bu da olur məşq. Yoxsa gərgin məşqdən sonra otursunlar monitorun qabağında, rəqibi təhlil etsinlər, kimi necə bağlayacaqlar, matçın hansı dəqiqəsində pres tətbiq edəcəklər, hansı müddət aralığında rəqibə nəfəs aldırmayacaqlar, necə əks-hücuma çıxacaqlar, A planı nədir, B planı necə olacaq... belə şey yoxdur. Bunlarınkı budur: “Məmmədağa, vur qabağa”.
Bu da deyir, bizim “Ferrari”miz yoxdur. Kosta-Rikanın nəinki “Ferrari”si, heç eşşək arabası da yoxdur, amma gəldi mundialda ad qoydu, getdi. İlin 9 ayı qarın-buzun içində olan İslandiyada eləcə motorlu qar maşını var, amma 4-5 il öncə Avropanın ən güclü komandalarını ard-arda çilədi.
Uzun sözün kəsəsi, bu axmaq adamı bu ölkədən iti qovan kimi qovmaq lazımdır. Ölkəmizin adını yerlə bir etdiyi bəs deyil, hələ jurnalistləri, dolayısı ilə idman ictimaiyyətini təhqir edir.
Belçika-Azərbaycan matçına internet TV-lərdən birində baxırdım, şərhçilər Anadolulu qardaşlar idi, ikinci hissə başlayanda dedilər ki, indi Azərbaycan komandasının rəhbərliyi matçın bir an öncə başa çatmasını istəyir. Onlar da qorxurdular ki, birinci hissədə Lukakudan 4 qol yeyən komandamız ikinci hissədə də o qədər qol buraxacaq, biabırçılıq olacaq. Halımıza acıyırdılar. Yaxşı qurtardıq.
Bu adamla da qurtarmaq lazımdır. Könül istər ki, bu yazı dərc olunandan yarım saat sonra Canni de Byazinin baş məşqçi postundan qovulması barədə xəbər gəlsin və müəllif məcburən yazısına belə bir P.S. artırsın: “Yazı de Byazinin qovulmasından yarım saat öncə dərc olunub”.
19 Sentyabr 2024
17 Sentyabr 2024
15 Sentyabr 2024
14 Sentyabr 2024
12 Sentyabr 2024
10 Sentyabr 2024
08 Sentyabr 2024
06 Sentyabr 2024
04 Sentyabr 2024
02 Sentyabr 2024
01 Sentyabr 2024
30 Avqust 2024
28 Avqust 2024
22 Avqust 2024
20 Avqust 2024
18 Avqust 2024
16 Avqust 2024
14 Avqust 2024
12 Avqust 2024
11 Avqust 2024
09 Avqust 2024
07 Avqust 2024
05 Avqust 2024
03 Avqust 2024
01 Avqust 2024
31 Iyul 2024
30 Iyul 2024
28 Iyul 2024
26 Iyul 2024
24 Iyul 2024
ŞƏRHLƏRŞƏRH YAZ