Onlayn ictimai-siyasi qəzet
İcra başçılarının “YENİ KƏŞFİ”:Antikorrupsiya əməliyyatlarında yaxalanmamaq üçün… – FOTO
“Bələdiyyələrin fəaliyyətinin təbliği” İctimai Birliyinin sədri Vüqar Tofiqli paytaxtın əksər rayon icra hakimiyyətləri basçılarının və müavinlərinin kabinetlərində giriş qapısının “knopka” ilə idarə olunduğunu bildirib. Bu barədə sosial media hesabında məlumat paylaşan QHT sədri deyib ki, başçı və müavin xüsusi düyməni içəridən basmasa qapı açılmır. O, son bir ay ərzində ziyarətində olduğu dörd rayonda bu halla qarşılaşdığını qeyd edib və bunun utancverici hadisə olduğunu vurğulayıb.
Maraqlıdır, bu addımın hansısa izahı varmı? Vətəndaşın üzünə daim açıq olmalı olan qapı niyə bağlı qalmalıdır? Məmurların belə davranışına səbəb nədir?
Mövzu ilə bağlı Medianews.az-a danışan Ağ Partiya sədri Tural Abbaslı bildirib ki, bəzi məmurların bu cür davranışı vətəndaşlarla əlaqəli deyil.
Siyasətçinin sözlərinə görə, vətəndaşın mühafizəçinin diqqətindən yayınaraq birbaşa icra hakimiyyəti başçısının və ya müavinin qəbuluna düşməsi qeyri-mümkündür: “Düşünürəm ki, icra başçılarının, müavinlərinin bu cür davranışının vətəndaşla heç bir əlaqəsi yoxdur. Çünki, vətəndaş onsuz da özbaşına icra başçısının və ya müavininin otağına yaxın dura bilmir. Həm icra hakimiyyətinə girişdə, həm də dövlət qurumunun içində mühafizə var. İcra hakimiyyətlərində qəbula rahat şəkildə düşmək asan bir məsələ deyil. Hələ mən içəridən vətəndaşın üzünə qapı açılmasını demirəm. Yəni ki, burda vətəndaşlıq bir məsələnin olduğunu düşünmürəm. Qeyd etdiyim kimi, vətəndaş heç bir halda o qəbullara düşə bilməz. Qapı açıq olsa və ya olmasa belə”.
T.Abbaslı icra hakimiyyətlərindəki məmurların xüsusi düymə ilə idarə olunan qapılardan istifadə etmələrinin səbəbini açıqlayıb: “Bunların hamısı Baş prokuror yanında Korrupsiyaya qarşı Mübarizə Baş İdarəsinin, Dövlət Təhlükəsizlik Xidmətinin antikorrupsiya əməliyyatları ilə əlaqəlidir. Yəni, “tədbirli” davranan bəzi məmurlar hüquq-mühafizə orqanlarının qəfil keçirdiyi əməliyyatlar nəticəsində cinayət başında, əllərində, masalarında pullarla yaxalanmaq istəmirlər. Bunun üçün yəqin girişdə kamera qoyublar və içəridən açılan qapılar düzəltdiriblər ki, xüsusi xidmət orqanları və ya prokurorluq əməkdaşları gələndə xəbər tutsunlar, onlar içəriyə daxil olana qədər hər hansı bir sübut, dəlili aradan qaldıra, məhv edə bilsinlər. Bu, sırf onunla bağlıdır”.
XƏBƏR LENTİ
28 Dekabr 2024
ŞƏRHLƏRŞƏRH YAZ