Onlayn ictimai-siyasi qəzet
Paşinyanla Zelenskinin ortaq taleyi: ikisi də ölkəsini batırıb...
Azərbaycan rəhbərini Ukrayna prezidentinin Bakıya səfəri ilə “qorxutmaq” ən azı siyasi gerizəkalılıqdır ki, bu yerdə “yalan nə ayaq tutar, nə də yeriyər...”
Ukrayna prezidenti Volodimir Zelenskinin martın əvvəlində Ermənistana gedəcəyi barədə xəbəri ilk olaraq Fransa mediası yayıb. Nə rəsmi İrəvan, nə Zelenskinin ofisi yayılan xəbəri təkzib edib. Belə görünür ki, xüsusilə İrəvan rəhbərliyi bu informasiya ətrafında spekulyasiyada maraqlıdır, öz ağıllarınca istəyirlər ki, Kremli bu “səfərin təzyiqi” altında saxlasınlar.
Zelenskinin guya Azərbaycana da səfər edəcəyi haqda iddianın qaynağının da Fransa mediası olub-olmadığı bilinmir. Amma bu yalandan daha çox təxribata oxşadı.
Məqsəd də aydındır: Azərbaycanın bu münaqişə ilə bağlı neytral mövqeyinə xələl gətirmək, Qərb və Moskvadakı tərəfdaşları ilə münasibətləri gərginləşdirmək. Bu da Azərbaycanla münasbətləri pisləşmiş rəsmi Parisin maraqlarına uyğundur. Prezident İlham Əliyev müharibədən bəri Ukrayna lideri Zelenski ilə telefonla danışıb, bugünlərdə isə tərəflər arasında Münhendə geniş tərkibli görüş də olub. Yəni Azərbaycan rəhbərini Zelenskinin Bakıya səfəri ilə “qorxutmaq” ən azı siyasi gerizəkalılıqdır ki, bu yerdə “yalan nə ayaq tutar, nə də yeriyər...”
Zelenski müharibənin davam etdiyi 24 ay ərazində bir çox ölkələrdə olub, parlamentlərdə çıxışlarlar edib. Amma postsovet ölkələrinə (Litva, Latviya və Estoniya istinasnadır) səfər etməyib ki, bunun da bir neçə səbəbi var. Əvvəla, Zelenski iki ildir ki, əslində ənənəvi dövlət səfərlərinə getmir. Kiyevə gələn xarici qonaqların səfərləri də rəsmi dövlət dəvəti sayılmaz. Zelenskinin və Kiyevə gələnlərin səfərləri birbaşa müharibə ilə bağlıdır. Ukrayna prezidenti getdiyi ölkələrdə alma-armud alış-verişindən danışmır, ancaq müharibə üçün maddi və ya silah-sursat yardımı istəyir. Həm də o ölkələrə gedir ki, onlar Ukrayna müharibəsində birmənalı Kiyevi dəstəkləyirlər, həm hərbi, həm maddi dəstək göstərmək imkanları var. Keçmiş postsovet məkanındakı dövlətlər (bəlkə də Belarus istisna ola bilər) Ukraynanın ərazi bütövlüyünü şərtsiz dəstəkləyir, amma hərbi və diplomatik baxımdan daha çox neytral və məsafəli mövqe sərgiləyir. Həm Mərkəzi Asiya, həm Cənubi Qafqaz dövlətlərinin bu mövqeyini Kiyev də anlayışla qarşılayır.
Azərbaycan müharibə başlayandan bəri Ukraynaya humanitar yardımlar göndərir ki, hazırda da bu dəstək davam edir. Ermənistan Ukrayna müharibəsi başlayandan Kiyevə münasibətdə xüsusi fərqlənməyib. Hətta faktlar var ki, Ermənistan müharibəyə dəstək verən bir çox Rusiya şirkətlərinin sanksiyalardan yayınmasına kömək edib. Ermənistanın bu vaxtadək Ukrayna xalqına hansısa humanitar yardım göndərdiyi haqda ictimailəşmiş məlumat da yoxdur.
Nikol Paşinyan ötən ilin iyun ayında CNN telekanalına müsahibəsində açıq şəkildə dedi ki, Ermənistan Rusiya-Ukrayna münaqişəsi məsələsində Rusiyanı dəstəkləmir.”Ukrayna ilə müharibədə biz Rusiyanın müttəfiqi deyilik. Və bizim bu müharibədən narahatıq, çünki bu, bütün münasibətlərimizə birbaşa təsir edir” - Paşinyan bildirib. Sentyabr ayında isə Ermənistanın baş naziri həyat yoldaşı Anna Akopyanı Kiyevdə keçirilən “Birinci xanımlar və həyat yoldaşları” adlı tədbirə göndərdi. O zaman xəbər yayıldı ki, Ermənistan Rusiyanın Ukraynaya təcavüzündən sonra ilk dəfə Kiyevə humanitar yardım göndərib, yardımı isə Kiyevə baş nazirin xanımı təhvil verib.
Oktyabr ayında isə Nikol Paşinyan İspaniyanın Qranada şəhərində keçirilən tədbirdə ilk dəfə Zelenski ilə görüşdü. Ayaqüstü görüşdə Ukraynanın xarici işlər naziri Dmitri Kuleba və Ermənistanın xarici işlər naziri Ararat Mirzoyan da iştirak etdi. Bunun ardınca(gərək ki, oktyabrın 12-də) erməni baş nazir bu dəfə Avropa Parlamentinin tribunasında göründü, ad çəkməsə də, Rusiyanı Ermənistanda çevriliş hazırlamaqda ittiham etdi. Rusiya XİN bu dəfə qəzəbini gizlətmədi və TASS vasitəsilə “Paşinyan Zelenskinin yolu ilə gedir” deyə, bəyanat yaydı. Bəyanatda o da deyilirdi ki, “əgər Moldovanı 2 nömrəli Ukrayna saysaq, biz görürük ki, Ermənistanı necə 3 nömrəli Ukraynaya çevirməyə çalışırlar və Paşinyan Zelenskinin yolu ilə necə böyük addımlarla gedir”.
Erməni mediası yazır ki, hökumətdəki anti-Rusiya qüvvələri Zelenskinin mümkün səfəri ilə bağlı xəbərlərdən sevinirlər, hətta Ukrayna rəhbərinin gəlişinə nədənsə, böyük ümidlər bəsləyirlər. O da vurğulanır ki, Avropa və Amerika kuratorları belə bir səfərdən mənmnun qalacaqlar. Bəzi teleqram kanalları isə Paşinyan hökumətini mümkün səfərlə bağlı ittiham edirlər. Onların da əsas “arqumenti” budur ki, rəsmi Kiyev qondarma “Artsax”ın tarixin zibilliyinə atan Azərbaycanın ərazi bütövlüyünü dəstəkləyiblər. Bunu sübut olaraq Ukrayada reklam lövhələrinə Ukrayna dövlət dilində vurulmuş “Qarabağ Azərbaycandır” şüarlarını göstəriblər.
Zelenskiyə münasibətim bəllidir, o səbəbdən Bakıya gəlməməsinə üzülmürəm. “Ermənistana gedirsə, nəyə gedir” sualı haqda da ciddi düşünməyin tərəfdarı deyiləm. Fikrimcə, getməyəcək, çünki ermənilər hələ Qərbin tam etibarını qazanmayıblar. Zelenski Ermənistana gedərsə, bunun bir səbəbi və ya gözlə görünən nəticəsi olmalıdır. Ermənistanın təbii ki, Ukrayna prezidentinə süfrə aça bilər, Paşinyanla birgə konyak vurub stress ata bilərlər. Zelenkiyə verməyə başqa heç nə yoxdur, çünki ermənilərin özünə indi həm pul, həm silah lazımdır. Zelenski ilə Paşinyanı isə birləşdirən ortaq taleləri var: hər ikisi ölkəsini güdaza verib...
Nazim SABİROĞLU ƏLAQƏLİ XƏBƏRLƏR
YAZARIN DİGƏR YAZILARI
16 Noyabr 2024
12 Noyabr 2024
17 Avqust 2024
27 Iyul 2024
21 Iyul 2024
30 Iyun 2024
21 Iyun 2024
16 Iyun 2024
14 Iyun 2024
08 Iyun 2024
28 May 2024
22 May 2024
19 May 2024
12 May 2024
10 May 2024
08 May 2024
03 May 2024
30 Aprel 2024
27 Aprel 2024
21 Aprel 2024
12 Aprel 2024
06 Aprel 2024
05 Aprel 2024
31 Mart 2024
29 Mart 2024
27 Mart 2024
24 Mart 2024
23 Mart 2024
21 Mart 2024
ŞƏRHLƏRŞƏRH YAZ