Onlayn ictimai-siyasi qəzet
Azərbaycan millisinin baş məşqçisi: “Daha yaxşı nəticə göstərə bilərdik”
“Düşünürəm ki, seçmə mərhələdə daha yaxşı nəticə göstərə bilərdik. Növbəti turnirlərdə uğurlu çıxışa ümid edirik”.
Bunu “Report”a açıqlamasında 17 yaşadək qızlardan ibarət Azərbaycan millisinin baş məşqçisi Nərgiz Qurbanova AVRO-2024-ün seçmə mərhələsindəki çıxışlarını dəyərləndirərkən deyib.
Mütəxəssis Lüksemburqa 0:1 hesabı ilə məğlub olduqları ilk görüşü daha yaxşı keçirdiklərini düşünür:
“Meydanda 90 dəqiqə “vuruşduq”. Sadəcə, 75-ci dəqiqədə ani səhvdən qol buraxdıq. Bizim də şanslarımız çox oldu, təəssüf ki, dəyərləndirə bilmədik. Səfərə yollanmamışdan bir həftə əvvəl aparıcı futbolçularımızdan biri zədələndiyi üçün heyətdən çıxarıldı. Fikrimcə, bu itki də çıxışımıza təsir göstərdi. Əks təqdirdə, Lüksemburqa qalib gələ bilərdik”.
Baş məşqçi ikinci matçda Xorvatiyaya 0:8 hesablı məğlubiyyəti rəqibin güclü olması ilə əlaqələndirib:
“Təəssüf ki, qrupun favoriti Xorvatiyaya böyük hesabla uduzduq. Onlar çox güclü idilər, bizdən əvvəl Maltanı da 8:0 hesabı ilə məğlub etmişdilər”.
N.Qurbanova III turda Maltaya 1:4 hesablı məğlubiyyətin səbəbini isə fərdi səhvlərdə görür:
“Son tur ərəfəsində Malta ilə Lüksemburqun hərəsinin 3 xalı var idi. Bu üzdən müdafiədən çox, hücumameyilli futbol oynadıq. Hətta hesabı da erkən qolla biz açdıq. İkinci qolu vurmaq şansımız da oldu, amma yararlana bilmədik. Adi vəziyyətlərdən, qapıçının səhvindən qollar buraxdıq”.
U-17-nin çalışdırıcısı oyunçuların hələ təcrübəsiz olduqlarını vurğulayıb:
“Millilərin tərkibi 2007-2008-ci il təvəllüdlü futbolçulardan qurulmuşdu. Pandemiya dönəmində 2007-ci il təvəllüdlü qızlar çox az idi. Seçmə mərhələyə apardıqlarımızın əksəriyyəti 2008-ci il təvəllüdlü idi. Bu da oyunumuza mənfi təsir göstərdi. Bu, qızlar üçün yaxşı təcrübə oldu, səhvlərdən nəticə çıxardıq. Nəzərə alaq ki, onlar üçün ilk seçmə mərhələ oyunları idi”.
Qeyd edək ki, B Liqasının III qrupunda Xorvatiya 9 xalla birinci, Malta 6 xalla ikinci, Lüksemburq 3 xalla üçüncü yeri tutub. Qrupu son pillədə tamamlayan Azərbaycan millisi hesabına xal yazdıra bilməyib.
XƏBƏR LENTİ
25 Noyabr 2024
ŞƏRHLƏRŞƏRH YAZ