Onlayn ictimai-siyasi qəzet
“Maşa”, “Medved” və... “narkoman” Zelenski
Rusiya XIN rəsmisi Mariya Zaxarova Ukrayna prezidenti Volodimir Zelenskini ələ salıb. Onu nəyə görəsə “narkoman” adlandırıb.
Bir xalqın azad seçkilər yolu ilə legitim prezidenti olan şəxsi təhqir eləmək sözsüz ki, elə o xalqı təhqir eləmək deməkdir. Ukrayna toplumu isə hələ ki, Zelenskidən üz döndərib eləməyib. Hər halda, müharibə ikinci ilə keçsə də, milyonlarla ukraynalı öz yurdundan köçkün düşsə də, xaxolların öz rəhbərinə nə inamı azalıb, nə də etimadı sarsılıb. Əksinə, rəy sorğuları göstərir ki, ukraynalılar arasında sülh danışıqlarının tərəfdarları artsa da, onların əksəriyyəti danışıqlarda işğalçı qoşunların ölkədən tam çıxarılması şərtini birinci yerdə qoyur.
Qayıdaq Zaxarovanın çərənləməsinə.
Həmin bu Maşa bir neçə gün öncə Azərbaycan-Ermənistan sülh prosesində Qərbin təşəbbüskarlığını “ədəbsizlik” (“qabalıq”) adlandırmışdı. Yəqin Ukrayna şəhərlərini yerlə-yeksan, dinc əhalisini isə qətliam eləmək “ədəb” göstəricisi sayılır Zaxarovanın nəzərincə.
Söyüş əlbəttə ki, mənən kasad adamların silahıdır. Bu leksikondan sabiq prezident, Putinin yaxın dostu və simsarı, Təhlükəsizlik Şurası sədrinin müavini Dmitri Medvedyev də gen-bol istifadə edir. Hər iki gündən bir dünyanı nüvə silahı ilə hədələyən, “Rusiya olmayacaqsa, qoy dünya da olmasın!” deyən Medvedyev çoxsaylı velikorus və xəstə məfkurəsinin daşıyıcılarından biridir. Belə birisi 4 il o boyda dövlətin başında durub (2008-2012). Şoka düşürsən...
Ancaq Zelenski siyasi səriştəsi nə qədər az olsa da, heç şübhəsiz, mənəviyyatca bunlardan daha zəngindir.
Məsələ ondadır ki, Rusiyanın işi Ukraynada yaxşı getmir. Guya 3-4 günə, uzağı, bir həftəyə Ukraynanı ram edəcəkdi dünyanın “ikinci ordusu”. Amma ikinci ildir Ukrayna bataqlığından çıxa bilmir. Qatı cinayətkar-dustaqların, qatillərin, bandit “Vaqner”çilərin, terrorçu İranın ümidinə qalıb. Ona görə təhqirə güc veriblər.
“Maşa”, “Medved” təbii ki, söyüş, təhqir marafonunda tək deyillər. Nə yazıq ki, bu təfəkkürdə və ağılda olan adamlar Rusiyada söz sahibidirlər. Belə bir durum isə aşağı-yuxarı bizə, Azərbaycana da yaxşı heç nə vəd eləmir...
Sirr deyil ki, Bakı-İrəvan barışığına və sülh sazişinə ən böyük əngəl məhz ruslardır, Rusiyadır. Bir də İran. Təsadüfi deyil ki, son vaxtlar bu iki ölkə Qarabağda Azərbaycana qarşı ortaq təxribat planlarında yer almaqdadır. Ən böyük pisliyi də biz məhz bu iki qonşudan gözləməliyik. Çünki hər ikisi əxlaqsız dövlətdir.
Baxın, 45 ildir islami dəyərləri əlində bayraq edən İran anri-islam rejimi Allah evlərini dağıdan, məscidlərimizdə donuz saxlayan, müsəlman (şiə) azərbaycanlıları etnik təmizləməyə, soyqırımına məruz qoyan terrorçu Ermənistanla 35 ildir “ət-dırnaq” kimidir, dost-qardaşdır, ermənilərə hər cür dəstək verir. Hətta özü yemir, amma onları yedizdirir - Azərbaycana qarşı. Hərbi dəstək də öz yerində.
44 günlük müharibədən sonra isə İran hərbçilərimizi qətl eləmək üçün Ermənistana, Qarabağa üstəlik dronlar, raketlər, diversantlar, müşahidə kameraları, daha nələr göndərmir. Araz boyu azad edilmiş sərhədlərimizdə hərbi təlimlər keçirib Azərbaycanı hədələyir. Bütün beynəlxalq normalara və götürdüyü öhdəliklərə tüpürərək, Tehrandakı səfirliyimizə terror hücumu təşkil edir, Təbrizdə Ermənistanın konsulluğunu açmaq istəyir. Bir ovuc erməniyə İranda öz dilində təhsil almaq üçün hər cür şərait yaratdığı halda, 40 milyonluq soydaşımızın elementar mədəni haqlarını allahsızcasına danır, tapdalayır. Məlumatlara görə, indi də Qarabağı “ikinci Suriya”ya çevirmək planları qurmağa girişib...
Həmçinin Rusiya. Özü xalqlar həbsxanası ola-ola (!) Azərbaycanda (Qarabağda), Gürcüstanda, Moldovada, Ukraynada separatçılığı körükləyir, himayə edir, həmin ölkələrdə xalqların öz müqəddəratını təyin etmə haqqından dəm vurur, amma öz sərhədləri daxilində müstəqillik istəyən aborigen xalqların (çeçenlər, tatarlar, başqırdlar) başlarını qaldırmağa imkan vermir, onların öz müqəddəratını təyinetmə cədhlərinə amansızcasına cavab verir, azadlıqsevər xalqları qan gölündə boğur.
Adama deyirlər: Donbasda, Krımda gəlmə rusların öz müqəddəratını təyin eləməsi yaxşıdır, köklü xalqlar olan çeçenlər, tatarlar bunu edəndə pis? Axı dəyənəyin iki tərəfi var!..
Zahid SƏFƏROĞLU 
YAZARIN DİGƏR YAZILARI
19 Sentyabr 2024
13 Sentyabr 2024
09 Sentyabr 2024
30 Avqust 2024
05 Avqust 2024
30 Iyul 2024
19 Iyul 2024
26 Iyun 2024
22 Iyun 2024
19 Iyun 2024
12 Iyun 2024
11 Iyun 2024
03 Iyun 2024
01 Iyun 2024
29 May 2024
24 May 2024
21 May 2024
17 May 2024
08 May 2024
03 May 2024
27 Aprel 2024
23 Aprel 2024
18 Aprel 2024
13 Aprel 2024
09 Aprel 2024
05 Aprel 2024
03 Aprel 2024
29 Mart 2024
27 Mart 2024
24 Mart 2024
ŞƏRHLƏRŞƏRH YAZ