Onlayn ictimai-siyasi qəzet
“Uçan taksi”nin vaqiəsi: səkiyə çökmüş “pilot”
Biz “Smert Tofiq” haqqında əfsanələrlə böyümüş uşaqlarıq, belə videolar bizi heyrətləndirməz. Amma yenə də magistral yolun üstü ilə uçub tunelə düşən, divara dəyib dayanan avtomobilin qəzası xeyli qəribə iş idi.
Videonu ilk görəndə şəxsən əvvəlcə mənə də elə gəldi ki, bu, real video deyil, süni intellektlə düzəldiblər, amma sonra qəzanın dörd rakursdan çəkilmiş videolarını və şoka düşərək səkiyə çökmüş sürücünün şəklini görəndə əmin oldum ki, heç bir süni intellekt bu qələti edə bilməz.
Bunu eləsə-eləsə, Hollivud kaskadyorları edə bilər, onlar da bir neçə avtomobili becərəndən, iki-üç dubla çəkiləndən sonra.
“Smert Tofiq” də edə bilərdi. O, çox qabiliyyətli “avtoş” olub. Onun haqqındakı əfsanələrdən biri beləydi ki, “Jiquli”ni saatda 160 km sürətlə sürür, maşının qapısını açır, asfaltın üzərindəki kibrit qutusunu götürürmüş. Söhbətin dəqiqliyinə təminat vermirəm, adı üstündədir: əfsanə.
İndiki cavanlar bilməz, “Jiquli” elə bir maşındır ki, 160-la gedəndə uçmaması mümkün deyil. O sürətlə havada maşının çəkisi 4 kilo olur. Belə deyirdilər. O vaxtın yollarında isə onu 100-lə sürmək mümkün deyildi. Cırıq-cırıq olardı. Görünür, müəyyən yollar olub ki, rəhmətlik Tofiq milli “avtoşluq” məktəbinin özülünü qoya bilib.
Yeri gəlmişkən, dünən tunelə uçan taksinin səkiyə çökmüş “pilot”u “Smert Tofiq”ə çox bənzəyir. Bəlkə də kimsə bu barədə ona deyib, o da fikirləşib ki, yeri gəlsə, o da maşınla möcüzələr göstərə bilər.
O qəzadan heç kəsin xəsarət almadan çıxması gerçəkdən də möcüzədir. Birinci yolu kəsib keçən BYD tunel yoluna düşməmiş, üçzolaqlı yolla axışan maşınların arasındakı bir saniyəlik zaman aralığından keçir - heç kəsə dəymədən. Sonra yenə də heç bir maşınla toqquşmur. Dəyib aşırdığı “Ford”un banı yüksək olmasaydı, daha rahat eniş edəcəkdi.
İndi araşdırılmalı olan məsələ odur ki, həmin sürücünü o sürətlə sürməyə və tunelə uçmağa nə vadar edib?
Hərə bir söz deyir. Biri deyir ki, çox güman ki, sürücü narkotik maddələrin təsiri altında olub. Fikir verirsinizsə, “içkili olub” deyən yoxdur. Çünki hamı anlayır ki, bu içki uçuşu deyil. Adətən, nəşəli olanlar “uçurlar” – hətta piyada olanda və ya divanda mütəkkəyə dirsəklənəndə də.
Ancaq adamın sükan arxasında yatmış olduğuna dair də iddialar var və bu, daha ağlabatandır. Çünki ayıq adam o riskə gedə bilməz, beton maneəyə dəyməzdən öncə karıxar, yanlış qərarlar verər, tormozlayar, sürüşər və daha pis qəza törədərdi. Sürücü isə tunelə əl ilə atılmış daş kimi düşdü. Əgər o, sükan arxasında yatıbmışsa da, sərt eniş zamanı dərhal ayılıb və fikirləşib ki, bu nə işdir, mən hardayam.
Daha bir versiya ondan ibarətdir ki, ola bilər, adam canından bezib və bu yolla intihara cəhd edib. Amma bu versiya ağlabatan deyil. Canından bezmiş adam daha ucuz variant (kəndir, hündürlük, sirkə, ülgüc, yuxu dərmanı və s.) seçər, ta o boyda maşını güdaza verməz, başqalarının həyatına təhlükə yaratmaz.
Xüləs, olan olub, torba dolub. Son 100 ildə paytaxtda belə bir qəza olmadığı üçün hazırda xalqımız olayı ciddi müzakirə edir. Əslində bu, təhlükəli tendensiya deyil. Təhlükəli olan məqam odur ki, bəzi dəliqanlılar onu təkrar etmək fikrinə düşə, bu və ya digər yerlərdə avtomobil uçurtmaq istəyələr.
Bunu havayıdan yazmıram. İndiki cavanların beyin qırışlarına, həvəslərinə, qızışqanlıq potensiallarına bələdəm. Bir də gördün, biri çayxanada deyir ki, mən olsaydım, tunelə düşməzdim, yolun o tayına uçardım. Mütləq biri də tapılacaq ki, “uçmayan oğraşdır, gedək, uç, maşın da məndən”.
Hər il dəniz sezonunda N qədər gənc bu cür bəhsləşmələrin qurbanı olur: “Filan yerə qədər üzərəm”; “Üzməyənin....” Vəssalam. Gedirlər, üzürlər. Alınmır, qohum-əqrəbanı üzürlər.
Yuxarıda bəhs etdiyim hadisənin yeganə faydası “uçan maşın”ın istehsalçısına dəyib. Maşın yaxşı uçub və salamatçılıq olub axı, indi həmin BYD-ni tərifləyirlər, deyirlər, etibarlı maşındır. Müqayisə aparanar var: “İki həftə əvvəl “Rang Rover” yandı külə döndü, heç nəyi qalmadı, əridi, getdi, amma BYD o boyda qəzadan bu cür çıxdı”.
P.S. Bizim kənddə də “Smert Tofiq”ə bənzəmək istəyən biri vardı, maşınını bərk sürürdü, dostları onu belə tərifləyirdi: “Bir dəfə 3 nəfər onun maşınına mindik, 150 sürdü, düşəndə gördük ki, dostlarımızdan biri şalvarını isladıb”.
Samir SARI 
XƏBƏR LENTİ
13 Aprel 2025
12 Aprel 2025
ŞƏRHLƏRŞƏRH YAZ