Onlayn ictimai-siyasi qəzet
Rusiya xüsusi xidmət orqanlarına işləyən “etibarlı şəxslər” SAXLANILDI – Britaniyada casus QALMAQALI
London polisi Rusiya xüsusi xidmət orqanları ilə əməkdaşlıqda şübhəli bilinən üç nəfərin saxlanıldığını açıqlayıb.
Musavat.com xəbər verir ki, Britaniyanın “Sky News” kanalının məlumatına görə, saxlanılan şəxslər 48, 45 və 44 yaşlarındadır. Onların Rusiya Federasiyasının xüsusi xidmət strukturlarına “etibarlı şəxslər” kimi işlədikləri ehtimal olunur.
İstintaq versiyasına əsasən, bu şəxslər Rusiya kəşfiyyat orqanlarının qeyri-rəsmi əlaqələndiriciləri kimi fəaliyyət göstəriblər. Onların Londonda müəyyən şəxslər və təşkilatlar haqqında məxfi məlumat topladıqları, həmçinin informasiya ötürülməsi və əlaqələndirmə missiyaları həyata keçirdikləri bildirilir.
London polisinin terrorla mübarizə üzrə komandiri Dominik Merfi məsələ ilə bağlı açıqlamasında bildirib:
“Biz son aylarda Londonda xarici kəşfiyyat xidmətləri tərəfindən cəlb edilən, bizim ‘etibarlı şəxslər’ adlandırdığımız insanların sayında artım müşahidə edirik.”
O vurğulayıb ki, bu proses Rusiya kəşfiyyatının Avropada daha çox yerli resurslardan istifadə etməyə çalışdığını göstərir.
İlkin məlumatlara görə, saxlanılan şəxslərin Britaniyada uzun müddətdir yaşadıqları və müəyyən hallarda Britaniya pasportuna sahib olduqları ehtimal edilir. Onların bəzilərinin Avropanın digər şəhərləri ilə əlaqələri də araşdırılır.
İstintaq Rusiya xüsusi xidmət orqanlarının “etibarlı şəxslər” adlandırdığı mülki şəxsləri öz təsir dairəsində saxlamaqla informasiya toplamaq, sosial və siyasi dairələrə nüfuz etmək cəhdlərini ortaya qoyur.
Hadisə Böyük Britaniyada Rusiya casusluğuna qarşı aparılan əməliyyatların intensivləşdiyi bir dövrə təsadüf edir. Son illərdə Britaniya ərazisində Skripal zəhərlənməsi hadisəsi, rusiyalı diplomatların kütləvi şəkildə ölkədən çıxarılması və maliyyə axınlarının nəzarətə götürülməsi kimi addımlar atılıb.
Rusiya səfirliyi isə hələlik bu saxlanılma ilə bağlı rəsmi şərh verməyib. Lakin Britaniya KİV-ləri hadisəni “Rusiyanın Londondakı dərin əməliyyat şəbəkəsinin növbəti ifşası” kimi qiymətləndirirlər.
Ekspertlər hesab edirlər ki, bu hadisə Qərbin Moskva ilə münasibətlərinin ən gərgin dövründə baş verir. Ukrayna müharibəsi, enerji böhranı və hibrid təhdidlər fonunda Rusiya kəşfiyyatının Qərb paytaxtlarında aktivliyinin artması Londonun xüsusi xidmət orqanlarını ciddi narahat edir.
İndi diqqətlər istintaqın nəticələrinə və Böyük Britaniya hökumətinin bu qalmaqala verəcəyi siyasi reaksiyaya yönəlib.
musavat.com
XƏBƏR LENTİ
23 Oktyabr 2025
ŞƏRHLƏRŞƏRH YAZ