Onlayn ictimai-siyasi qəzet
Azərbaycan Prezidenti Milli Məclisin ilk iclasında önəmli mesajlar verdi - Çingiz Qənizadə
2024- cü ildə keçirilən növbədənkənar prezident və parlament seçkiləri müstəqil ölkəmizin tarixində əbədi olaraq yadda qalacaq. Çünki ilk dəfə idi ki, bu seçkilər ölkəmizin bütün ərazisində keçirildi. Bu, çox mühüm tarixi hadisədir. Bütövlükdə, İkinci Qarabağ müharibəsi, üç il sonra isə Azərbaycan Ordusunun Qarabağda keçirdiyi lokal xarakterli antiterror tədbirləri separatizmə birdəfəlik son qoydu və suverenliyimiz tam bərpa edildi. Bu, dünya miqyasında tarixi hadisədir. Prezident İlham Əliyevin sərkərdəlik və diplomatik məharəti, cəsarəti və qətiyyəti, yenilməz Ordumuzun qəhrəmanlığı sayəsində torpaqlarımız Ermənistan silahlı qüvvələrinin işğalından azad edildi. Azərbaycan dövləti öz gücünü, xalqımız isə bütün dünyaya əyilməz ruhunu göstərdi. Bu gün Qarabağda və Şərqi Zəngəzurda genişmiqyaslı yenidənqurma, abadlıq və tikinti-quraşdırma işlərinin həyata keçirilməsi keçmiş məcburi köçkünlərin yurd həsrətinə birdəfəlik son qoydu.
Musavat.com xəbər verir ki, Demokratiya və İnsan Hüquqları Komitəsinin sədri, hüquq üzrə fəlsəfə doktoru Çingiz Qənizadə Prezident İlham Əliyevin VII çağırış Milli Məclisin ilk iclasındakı nitqində səsləndirdiyi fikirlərə münasibət bildirərkən deyib ki, dövlətimizin başçısı bütün dünyaya bir daha önəmli mesajlar verdi.
Hüquq müdafiəçisi daha sonra qeyd edib ki, İkinci Qarabağ müharibəsi və antiterror əməliyyatı nəticəsində suverenliyimizin tam bərpa edilməsi ölkə qarşısında yeni imkanlar, yeni üfüqlər açır. 30 ilin işğalı arxada qaldı. İndi ölkəmiz genişmiqyaslı quruculuq, inkişaf işinə qədəm qoymuşdur və nəticələr də göz qabağındadır. Ölkə başçısının dediyi kimi, son 3-4 il ərzində Azərbaycanın beynəlxalq mövqeləri daha da möhkəmlənib. İkinci Qarabağ müharibəsinin və antiterror əməliyyatının nəticələrini bütün dünyaya qəbul etdirə bildik. Buna baxmayaraq, ikili standartlar əsasında qurulmuş ittihamlar hələ də davam edir. Ancaq bu, nə bizim, nə xalqımızın iradəsinə heç cür təsir edə bilməz.
Hüquq müdafiəçisi dövlət başçımızın qarşıda qoyulan vəzifələrə münasibətindən də söhbət açıb. Deyib ki, Azərbaycan Prezidenti bəyan etdi ki, bir nömrəli vəzifə hərbi gücümüzün artırılmasıdır. Baxmayaraq ki, İkinci Qarabağ müharibəsi və antiterror əməliyyatı arxada qaldı, həm dünyada gedən proseslər, yeni münaqişə, müharibə ocaqlarının yaradılması və ətrafımızda gərginliyin artması, eyni zamanda, Ermənistanda revanşizm meyilləri bizi bu sahəyə daim diqqət göstərməyə vadar edir: “Ölkə qarşısında böyük vəzifələr durur, ilk növbədə, Qarabağı və Şərqi Zəngəzuru bərpa etmək vəzifəsi. Ancaq, əgər biz hərbi sahəyə diqqətimizi azaltsaq və oraya ayrılan vəsaiti lazımi səviyyədə təmin etməsək, gələcəkdə bizi problemlər gözləyə bilər. Ermənistanda revanşist qüvvələr baş qaldırır. Bu, təkcə marginal siyasi ünsürlər deyil, eyni zamanda, bugünkü Ermənistan hakimiyyəti bu fikirlərlə, bu xülyalarla yaşayır. Onlar İkinci Qarabağ müharibəsinin və antiterror əməliyyatının nəticələri ilə barışmaq istəmirlər. Qələbəmizi həzm edə bilməyən xarici dairələr bizə qarşı yeni planlar hazırlayır.
Ç.Qənizadə dövlətimizin başçısının nitqindən bəzi məqamları diqqətə çatdıraraq deyib ki, Ermənistan və onun arxasında duran istənilən ölkə bilməlidir ki, bizimlə şantaj və ultimatum dili ilə danışmaq mümkün olmayacaq. İkinci Qarabağ müharibəsindən keçən dövr ərzində öz hərbi gücümüzü böyük dərəcədə artırmışıq, yeni silahlı birləşmələr yaradıldı, Xüsusi Təyinatlı Qüvvələrin say tərkibi bir neçə dəfə artırıldı. Yeni Xüsusi Təyinatlı Qüvvələr, Komando qüvvələri yaradıldı və onların da say tərkibi ildən-ilə artır və artacaq. Digər xüsusi təyinatlı silahlı birləşmələrin yaradılması barədə də məlumat verildi. Qeyd edildi ki, Ordumuzun döyüş qabiliyyəti artır, texnika ilə təchizat lazımi səviyyədə təmin edilir və təmin ediləcəkdir. Prezident diqqətə çatdırdı ki, yerli hərbi sənaye kompleksinin yaradılması hər bir ölkənin ümumi gücünü və inkişafını göstərir. Bu il bu məqsədlə böyük vəsait ayrılmışdır və gələn il də ayrılacaq. Bizim bütün hərbi zavodlarımızda genişmiqyaslı modernləşmə işləri aparılır. Bütün bunların vacibliyini qeyd edən ölkə rəhbəri Ermənistana Qərb ölkələrindən silah, sursat göndərildiyini diqqətə çatdırdı. Dedi ki, biz şərti sərhəddə möhkəmlənirik, çünki hər an Ermənistandan istənilən təxribat gözləmək olar və Ermənistan tərəfi həm kütləvi surətdə silahlanır, eyni zamanda, xarici ölkələrlə, özü də böyük dövlətlərlə hərbi təlimlər keçirir. Bəzi hallarda açıq - necə ki, Fransa-Ermənistan hərbi əməkdaşlığı açıq-aşkar aparılır - bəzi hallarda isə məxfi formada.
Hüquq müdafiəçisi Azərbaycan Prezidentinin ölkədə təhlükəsizliyin, əmin-amanlığın uzun illərdir təmin edilməsindən, respublikada yaradılmış sabitliyin bütün dünya üçün nümunə ola biləcəyi fikrinə də münasibət bildirib: “Dövlətimizin başçısı diqqətə çatdırdı ki, bu gün sabitliyi pozulan ölkələrin vəziyyətini və aqibətini hər kəs yaxşı görür. Bu, təhlükəsizliyin, inkişafın, xarici sərmayənin cəlb edilməsi üçün başlıca şərtdir. Azərbaycan xalqı bu gün hər şeyi yaxşı görür, hər şeyi yaxşı bilir - bizim dostumuz kimdir, düşmənimiz kimdir. Əsas meyar ölkələrin bizim suverenliyimizin bərpasına olan münasibətidir, daha başqa uzağa getmək lazım deyil.Kim bizimlə Qarabağın Azərbaycana qaytarılmasına sevinirsə, o, bizim dostumuzdur, qardaşımızdır”.
Tanınmış hüquqşünas dövlətimizin başçısının Qarabağ və Şərqi Zəngəzurun bərpasından da söhbət açdığını xatırlatdı: “Prezident dedi ki, işğaldan azad edilmiş ərazilərdə bərpa və quruculuq işləri bizim hər birimizin önəmli vəzifəsidir. Müharibədən sonra bu ilin sonuna qədər xərclənməyə nəzərdə tutulan vəsait 19 milyard manatdır. Vəsaitin mütləq əksəriyyəti infrastruktur layihələrinə xərclənib. Eyni zamanda, keçmiş köçkünlərin qaytarılması üçün də işlər görülür və səkkiz mindən çox keçmiş köçkün artıq Qarabağa və Şərqi Zəngəzura yerləşib və hər ay, hər il onların sayı artacaqdır. Bu günə qədər bizə bərpa işlərində köməklik edən Özbəkistan və Qazaxıstan qardaş dövlətlər olub. Füzuli şəhərində məktəb və uşaqların yaradıcılıq mərkəzi inşa edilibdir və hazırda Qırğızıstan Respublikası da Ağdam rayonunda məktəb inşası ilə məşğuldur”.
“Azərbaycanın qazandığı tarixi Zəfərdən sonra ölkəmizin beynəlxalq nüfuzu bir neçə dəfə artıb, mövqelərimiz möhkəmlənib. Yaxın vaxtlarda COP29-un Azərbaycanda keçirilməsi də bu uğurlardan xəbər verir. Bu tədbirin Azərbaycanda keçirilməsi üçün 200-ə yaxın ölkə tərəfindən yekdilliklə qəbul edilməsi də bizim beynəlxalq nüfuzumuzu, getdikcə artan reytinqimizi göstərən vacib amildir. Bu uğurlar davam edəcək və bundan sonra da xarici siyasətdə geriyə heç bir addım atılmayacaq” – deyə Ç.Qənizadə bildirib.
XƏBƏR LENTİ
23 Noyabr 2024
ŞƏRHLƏRŞƏRH YAZ