Onlayn ictimai-siyasi qəzet
Fövqəladə Paris sammiti: Avropa Trampa qarşı birləşdi - BU QƏRARLAR VERİLDİ
Musavat.com xəbər verir ki, Fransanın paytaxtı Parisdə Avropa liderlərinin təcili sammiti keçirilib.
Görüşdə əsas diqqət Ukraynadakı vəziyyət, mümkün sülh danışıqları, Avropanın müdafiə qabiliyyətinin gücləndirilməsi və ABŞ ilə münasibətlər kimi məsələlərə yönəlib. Sammitdə iştirak edən liderlərin ictimai çıxışları Avropanın Ukraynanın təhlükəsizlik təminatlarında lider rolu oynamağa hazır olduğu mesajını verib.
NATO baş katibi: “Avropa liderlik etməyə hazırdır”
NATO-nun yeni baş katibi Mark Rutte görüşdən sonra verdiyi açıqlamada Avropanın Ukraynaya təhlükəsizlik zəmanətləri verməyə və bu sahəyə böyük sərmayələr yatırmağa hazır olduğunu vurğulayıb:
“Avropa liderlik etmək istəyir. Biz Ukraynanın təhlükəsizliyinə daha çox sərmayə qoymağa hazırıq. Detallar müəyyən edilməlidir, amma öhdəliklər artıq aydındır.”
Avropa Komissiyası: “Ukrayna güc vasitəsilə sülhə layiqdir”
Avropa Komissiyasının prezidenti Ursula fon der Lyayen və Avropa Şurasının prezidenti Antonio Koşta da birgə açıqlamalarında Ukraynanın müstəqilliyinin, suverenliyinin və ərazi bütövlüyünün qorunması üçün etibarlı təhlükəsizlik zəmanətlərinə ehtiyacı olduğunu bildiriblər.
“Avropa Ukraynaya hərbi yardımlarını artırır, lakin eyni zamanda öz müdafiə qabiliyyətini də gücləndirməlidir.”
Almaniya kansleri Şolts: “Sülh danışıqları Ukraynasız müzakirə oluna bilməz”
Almaniya kansleri Olaf Şolts Avropa dövlətlərinin Ukraynada sülh üçün müzakirələri alqışladığını desə də, Ukraynanın iştirakı olmadan aparılan danışıqların yersiz olduğunu vurğulayıb.
“Hazırda bəzi dairələrdə Ukraynanın iştirakı olmadan sülh planları müzakirə edilir. Bu, tamamilə yersizdir. Ukrayna danışıqlar masasında oturmadan heç bir sülh qəbul edilə bilməz.” – deyə Şolts bildirib. O, həmçinin Avropanın təhlükəsizliyinin ABŞ-dan ayrılmaz olduğunu vurğulayıb: “NATO üzvləri həmişə birlikdə hərəkət ediblər. Təhlükəsizlik və məsuliyyət ABŞ ilə Avropa arasında bölünə bilməz”.
Danimarka: “Rusiyanın imperiya xəyalları Avropaya təhlükə yaradır”
Danimarkanın baş naziri Mette Frederiksen sammitdə Rusiyanın “imperiya xəyallarının” Avropaya təhlükə yaratdığını bildirib və tez bir atəşkəsin Putinə yeni hücum planları hazırlamaq üçün imkan yaradacağını vurğulayıb.
“Tez bir atəşkəs Putinə yenidən mobilizasiya üçün fürsət verə bilər. Bu, Ukrayna və ya Avropanın digər ölkələri üçün yeni təhlükələr yaradacaq.” – deyə Frederiksen xəbərdarlıq edib.
Britaniya və Polşadan güclü mesajlar
Britaniyanın baş naziri Kir Starmer Avropa və Ukraynanın təhlükəsiz gələcəyə malik olmalı olduğunu və demokratik dəyərlərin üstün gəlməli olduğunu bildirib. Polşa baş naziri Donald Tusk isə Avropanın ABŞ ilə münasibətlərində yeni mərhələyə daxil olduğunu bəyan edib.
İspaniya: “Sülh sazişi Ukraynanın maraqlarına uyğun olmalıdır”
İspaniyanın baş naziri Pedro Sançes Ukrayna ilə bağlı danışıqların sülhə aparmalı olduğunu, lakin səhv nəticələrə gətirib çıxarmamalı olduğunu vurğulayıb: “Məqsəd Ukrayna və Avropanın tam iştirak etdiyi ədalətli və daimi bir sülhə nail olmaqdır.”
Makron və digər liderlər hələ açıqlama verməyib
Fransa prezidenti Emmanuel Makron, İtaliyanın baş naziri Corcia Meloni və Niderlandın baş naziri Dik Sxof hələlik açıqlama verməyiblər. Franceinfo jurnalistlərinin məlumatına görə, bu görüş rəsmi qərar qəbul etmək üçün deyil, ilk dialoqların qurulması məqsədi daşıyıb. Lakin Avropa dövlətlərinin tezliklə konkret addımlar barədə razılığa gəlməli olduğu qeyd edilir.
Avropa Trampın Ukrayna planına qarşı birləşdi – Paris sammitinin gizli məğzi
Fransanın paytaxtı Parisdə keçirilən Avropa liderlərinin təcili sammiti əslində, Avropanın Donald Trampın Ukrayna planına qarşı demarşı kimi dəyərləndirilə bilər. Rəsmi bəyanatlarda vurğulanan Ukraynaya təhlükəsizlik zəmanətləri, Avropanın müdafiə qabiliyyətinin gücləndirilməsi və ABŞ ilə əlaqələrin qorunması kimi məsələlər əslində Trampın Rusiya-Ukrayna müharibəsinə dair planına qarşı vahid Avropa mövqeyinin formalaşdırılması cəhdidir.
Artıq aydındır ki, Trampın Rusiya-Ukrayna müharibəsini tez bir zamanda bitirmək üçün öz planı var. O, bu münaqişəni Putinlə birbaşa danışıqlar yolu ilə həll etmək niyyətindədir və bu prosesdə nə Avropanın maraqları, nə də Ukraynanın iştirakı nəzərə alınır. Trampın belə bir yanaşma sərgiləməsi Avropanı ciddi şəkildə narahat edir və Parisdə keçirilən sammitin məhz bu kontekstdə baş tutması təsadüfi deyil.
Sammit iştirakçılarının bəyanatları göstərir ki, Avropa liderləri Trampın Ukrayna məsələsində onları oyun kənarında saxlamasına razı deyil. Xüsusilə Almaniya kansleri Olaf Şolts, Avropa Komissiyasının rəhbəri Ursula fon der Lyayen və Danimarka baş naziri Mette Frederiksen bu məsələdə açıq şəkildə mövqe bildiriblər.
Musavat.com
XƏBƏR LENTİ
20 Fevral 2025
ŞƏRHLƏRŞƏRH YAZ