Onlayn ictimai-siyasi qəzet
Çoban və onun qoyunları
“Od tutub qırmızı atəşlə yenə yandı üfüq,
Şəfəqin qırmızı rəngi ilə işıqlandı üfüq.
Bir qədər çaydan uzaq, od qalamış dağda çoban,
Oyadır öz sürüsün otlaya yaylaqda çoban".
(Abbas Səhhət)
Bəli, sevindirici haldır ki, artıq ictimai rəy öz hökmünü vermişdir və indən belə camaat evlənəndə kimin qızını aldığına qəti diqqət etməyəcəkdir. İstər yetim-yesir olsun, istər varlı-hallı. Hətta müzakirələrdən belə başa düşdük ki, atasız böyümüş qızları almaq daha üstünlük təşkil edəcəkdir. Necə deyərlər, bu bir trend olacaqdır. Qızın atası ya vəlvələdən, ya zəlzələdən sağdırsa, vurub öldürmək də məqsədəuyğunmuş.
Səmimi olmalıyıq. O boyda gurultu-partıltı boşuna getməməlidir! Uca millətimizi məhz buna görə sevirəm.
Evtikmə kombinatı açaraq alimləri işə götürən çoban haqda xəbər də eyni kateqoriyadan oldu. Xalq alov püskürdü. Müzakirələr qandonduran və tükürpədici idi. Hamı ağsaqqal çobanı qınadı, alimlərə hörmət qoyulmadığını söylədi. Lakin heç kim soruşmadı ki, bu çoban - Şərurlu İsfəndiyar şirkəti qurmaq və özünün dediyi kimi, “alimlərə 20 min maaş vermək” üçün pulları haradan əldə edibmiş. Nə müsahibə alan soruşdu, nə müzakirə edənlər.
Bəlkə bankdan kredit alıbmış? Öylə isə həmin banklar niyə o alimlərin özünə kredit vermirdi? Ya bəlkə bu işin sirri adamın ayamasında - “şərurlu” sözündədir?
Təzəlikcə, ayın neçəsindəsə “elm günü” qeyd edilmişdi, o zaman alimlərimizin maaşlarını açıqladılar. Sən demə, bu saat AMEA prezidenti İsa Həbibbəyli (bunu da qısaca “Şərurlu İsa” yazmaq olar) ayda 4079 manat maaş alır. Azdırmı, çoxdurmu, bunu müzakirə etmək istəmirəm. Ancaq gəlin görək prezidenti bu qədər pul alan idarənin sıravi alimcikləri nə qədər maaşa çalışır. Buyurun, biabırçılıqdır: kiçik elmi işçi 420 manat, elmi işçi 453 manat, böyük elmi işçi 489 manat, aparıcı elmi işçi 527 manat, baş elmi işçi və şöbə müdiri 576 manat.
Necə ola bilər ki, bir idarədə müdirin gəliri işçidən 10 dəfə çox olsun? Orada kimsə düzgün, vicdanla çalışarmı? Orada elm inkişaf edərmi? Hansısa alim kəşfə imza atarmı? Ritorik, bəlağət üçün verilən suallardır, cavab, məna-zad aramayın.
Hətta məhəllə marketində kassir işləyən qızların gəliri az qalır alimin pulunu ötsün. Təbii ki, buna qarşı arqument irəli sürmək mümkündür: “Kassir heç olmazsa malın kodunu oxudur, bizim alimlərinsə elmi məqaləsini oxuyan yoxdur. "Füzuli yaradıcılığında “əmma” sözünün işlənməsi tezliyi", “Qaxda donuzların sayının azalması regional iqtisadi spektral analiz üzrə statistik təkliflər” tipli düşük, absurd, Şnobelə layiq temalarda çalışan alimlərimizə 400 manat da çoxdur" və sairə. Haqlı iradlardır. Ancaq layiq deyillərsə, niyə bunların rəhbərinə o qədər pul verilir? Sual budur.
Yeri gəlmişkən, bu günlərdə bir dostumuz İsfəndiyar ağanın həmin videosunu mənə atanda ona cavab yazdım ki, bu da bizim milli Trampdır. Soruşdu bəs İlon Maskımız kimdir, dedim yəqin o da İsa Həbibbəyli olar. Ramiz Mehdiyev qalsaydı onu “milli Mask” elan edərdim. Maskalanmağı da yaxşı bacarırdı (söz oyunu oynayan zurnalistlərə heç salam olmasın).
Əlbəttə, qatar getmirsə pərdələri yellətmək də bir işdir. Məsələn, kino ittifaqımızın müdiri Rasim Balayevin bu günlərdə ABŞ səfərində olduğunu gördüm, çox sevindim. Deyir orada Hollivudu, Ulduzlar xiyabanını gəzib, Oskar mükafatı verilən zalda olub və sairə. Nə qədər gözəldir! Təbrik edirəm. Prinsipcə, ya Oskarın zalında oldun, ya Oskarı aldın, fərqi nədir ki? Yaxşı yadıma düşdü, keçən ay da Mədəniyyət Nazirliyi nəzdində Kino Agentliyimizin müdiri Orxan müəllim Venesiya festivalının keçirildiyi binada olmuşdu, şəkil çəkdirmişdi. Bir nəfəri də Berlin vağzalına göndərsək, de-fakto 3 dənə ödül almış kimi oluruq.
Atasız qızlarla evlənmək üçün isə ən yaxşı yer İsfəndiyar ağanın “Hollivud” şadlıq sarayıdır. Bir növ, “üçü birində” milli paketi kimi bir şey alınır.
Zamin HACI 
XƏBƏR LENTİ
03 Aprel 2025
ŞƏRHLƏRŞƏRH YAZ