Axına qarşı üzmək və onun bir zərəri

Onlayn ictimai-siyasi qəzet

İnsanlara hürriyət, millətlərə istiqlal!

Axına qarşı üzmək və onun bir zərəri

Bu ölkədə hansı qəbahətə, cinayətə yol verməsindən asılı olmayaraq, hər kəsi və hər şeyi müdafiə edənlər var. (Kişi və qadın üçün axırıncı yol olan qəbih hərəkətlərin adını redaktə etdim). Buna savadlı dairələrdə “axına qarşı üzmək mərəzi” deyirlər.

Məsələn, keçən il bir psixopat ata-anasını, bacısını, qardaşını, bacıoğlusunu öldürmüşdü, bütün ölkə şoka girmişdi, amma yazanlar vardı ki, gör, yazığı necə təhrik ediblərsə, belə bir şey edib. Məsum çocuq. O da istəməzdi belə şey olsun. Vadar ediblər.

İlişən korrupsionerlər heç, onların müdafiəsi imandandır. Dissidentliyə girir. Nə qəbahət iş görüblər ki? 50-60 milyon qapazlayıblar. O vəzifədə sən olsan, maaşla dolanarsan? Özgənin pulunu saymazlar, ayıbdır. Başarana baş qurban. Hamı necə, onlar da elə. Guya o biri vəzifəlilər, almır, yığmır, yemir? Yıxılana balta çalmazlar... Bunlar korrupsionerlərin müdafiəsinin əsas hücumçu arqumentlərdir.

O gün bir video yayılmışdı: Əfqanıstanda yaşı 40 civarında olan eşşək boyda bir kişi 9-10 yaşlı qız uşağını qoltuğuna vurub yatağa sürükləyəndə uşaq böyüzm olmuş halda qışqırır, pedofilin əlindən çıxır, araya girənlər olur. Ağ libaslı, qara saqqallı yaramaz qeyzlənir, divara söykədiyi “Kalaşnikov”u götürür, “bu saat hamınızı qırajam, məhrəmimə girməyin” hədəsi biçir. Tam bir rəzalət. Ancaq bu hərəkətdə qəbahət görməyən, normal qəbul edən milyonlarla adam var. Təbiətin qanunuymuş. Yaşın nə fərqi var ki? Bir qız bir oğlanındır... Deyən də yoxdur ki, bu oğlan deyil axı, bu, 120 kiloluq eşşəkdir.

Əyyaşlığı, narkomaniyanı müdafiə edən minlərlə adam görərsən. Kişilər yeyib-içən oğlandırlar. “Yeyib-içən oğlan yaman olmaz”-zad. “Çək nəşəni, tüstüsü dağlara yayılsın”-filan.

Dünən baxıram, uzun illərdir miqrantları deportasiya ilə hədələyən, türkləri xor görən, ermənilərə qahmar çıxan, ukraynalıların faciəsini görməyən, Rusiyanın aqressiyasına dəstək verən Marin Le Peni belə, ölkəmizdə müdafiə edənlər var, a kişilər. Bunu hansı məntiqlə, hansı əsasla, nəyə görə edirlər? Heç nə, Makronun acığına. Müdafiə etdikləri qadın isə Makrondan qat-qat pisdir.

2018-ci ildə Paşinyanın acığına Serj Sarkisyanı dəstəkləyənlər vardı. “Küçədən hakimiyyətə gəlir”di, ona görə. Amma tarix göstərdi ki, Paşinyan daha sərfəli variantmış.

7-8 i əvvəl Müşviqabadda İŞİD-in lideri Əbubəkr Bağdadini müdafiə edən biri yerli şiələri məsciddən qaçaq salıbmış, deyirmiş, gəlib topanızın ortasına qumbara atacam. Sonra məlum olub ki, buna Şamdan “povestka” gəlib ki, gəl cihada, adam qaçıb gizlənib.

Bax, o gün bir aparıcı qız efirdə bir səfeh söz deyib, milləti hiddətləndirib və cavabını alıb. Dünən isə onu sosial şəbəkədə müdafiə edənlər o qədər idi ki, qız o yazıları oxusa, bu dəfə birbaşa var-yox söhbəti edəcək.
Putinə toz qondurmayanlar var bu ölkədə. “Nə edirsə, düz edir” deyirlər. And ola, sabah Putin 7 ölkəyə 7 atom bombası atsa, yenə elə deyəcəklər.

Amerikanın müdafiəçiləri bir az fərqlidir. Dünənə qədər onlar Vaşinqtonun tərəfini heç kəsə vermirdilər, amma bu gün Trampdan ağılları bir şey kəsmir. Çünki “qızılbaş” (bu adı ona kim qoyubsa, onluqdan vurub) bir az rindü-şeyda adamdır, dünyanı rusca yırğalayır, üstəlik, illərdir Amerikanı acgöz buzov kimi əmənlərin südünü kəsib.

İranı müdafiə edənlərlə çox danışmaq olmur, adam dərhal “kafir” və “sionist” çıxır. İnanc məsələsidir. Onlar inanırlar ki, seyyid həmişə haqlıdır.

Az qalmışdı, Türkiyədə ayrı-ayrı siyasi qüvvələri müdafiə edənlər bıçaqlaşacaqdı, yaxşı ki, Özgür Özəl bir az səsinin tonunu aşağı saldı. Amma yaxın günlərdə dava yenidən qızışa bilər.

Əslində insanlar kimi nəyə görə müdafiə etdiklərini yaxşı bilirlər. Çoxunda əqidə, prinsip məsələsi deyil, mütləq maddi motivlər var. Məsələn, adamlar var, aşağı ranqlı bir dövlət işində olduqları vaxt, hakimiyyəti var gücləri ilə müdafiə edirdilər, Serxio Ramosa dönmüşdülər. Amma işdən çıxarıldıqlarından bəri iqtidara qarşı Mbappelik edirlər.

Bunlar dözülməsi mümkün olan şeylərdir. Necə deyərlər, həyatdır, Zaur. Amma elə şeylər var ki, onları heç vaxt müdafiə etmək olmaz. Heç cür. Axına qarşı üzmək yaxşı şeydir, amma o axının qaynağı kanalizasiyadırsa, hərəkətin qeyri-estetikliyi o tərəfə dursun, orqanizmə ziyandır.

Samir SARI

ŞƏRHLƏRŞƏRH YAZ