Onlayn ictimai-siyasi qəzet
Yasamal Məhkəməsi oliqarx-bankirin vətəndaşın mülkiyyət hüququnu zorlamasına “dur” deyəcəkmi?
Azərbaycan vətəndaşı Nizami Kərimovun əmlakı ondan xəbərsiz girov qoyulub, əvəzində 5 milyon manat kredit götürülüb.
Musavat.com xəbər verir ki, vətəndaş bu maxinasiyadan 6 il sonra xəbər tutub.
Məhkəməyə müraciət edib və bu maxinasiyanın altından oliqarx-bankir Elman Rüstəmovun adı ortaya çıxıb.
Məlum olub ki, Nizami Kərimovun əmlakı satın aldığı “Aqana servis” Elman Rüstəmovun tikinti şirkətlərindən biridir, şirkəti də oliqarx bankirin şəriki Azad Nağıyev idarə edir.
Nizami Kərimov əmlakla bağlı araşdırmalarını davam etdirdikcə, pulunu verib satın aldığı əmlakı ilə bağlı böyük bir cinayətə yol verilməsi faktını müəyyən edib.
Məlum olub ki, Elman Rüstəmov Mərkəzi Bankın sədri olduğu günlərdə Azad Nağıyevə tapşırıb ki, tikdikləri binada artıq satılmış, Nizami Kərimovun mülkiyyətində olan əmlakı girov qoysun və 5 milyon manat kredit götürüb ona versin. Azad Nağıyev şəriki Elman Rüstəmovun göstərişini yerinə yetirib və 5 milyon kredit götürüb, pulu oliqarx-bankirə ötürüb.
Məhkəmədə üzə çıxan cinayət faktına hüquqi qiymət verilib və Azad Nağıyev uzunmüddətli həbsə göndərilib. Buna qədər baş verənlərə seyrçi mövqe sərgiləyən, yaxasını kənarda tutan Elman Rüstəmov Nizami Kərimovun əmlakının girovdan çıxarılması tələbini ortaya qoyanda üzə çıxıb və vətəndaşın mülkiyyətinin girovluqdan çıxarılmasını əngəlləməyə başlayıb.
Belə ki, Nizami Kərimov yenidən məhkəməyə müraciət etməklə əmlakının girovluqdan çıxarılmasını tələb edib.
1 ilə yaxındır ki, Yasamal Rayon Məhkəməsində hakim Ayşən Sultanova-Məmmədovanın sədrliyi ilə Nizami Kərimovun şikayətinə baxılır. Oliqarx-bankir Elman Rüstəmov birbaşa məhkəmədə iştirak etmir. Buna baxmayaraq, hakim Ayşən Sultanova-Məmmədova oliqarx-bankir Elman Rüstəmovun adı keçən işdə obyektivlikdən uzaq mövqe sərgiləyir, vətəndaşın iddiasını təmin etməyə də tələsmir.
Ortada böyük bir cinayət var – vətəndaşın mükiyyət hüququ göz görə-görə ayaqlar altına atılıb, tapdanır!
Əmlakı Nizami Kərimovdan xəbərsiz girov qoyulub və külli miqdarda kredit götürülüb! Bu gün krediti götürən Elman Rüstəmovun şəriki Azad Nağıyev həbsdədir, oliqarx bankir isə krediti ödəmək niyyətindən uzaqdır, Nizami Kərimovun əmlakını banka ötürüb 5 milyonu qaytarmaq istəmir.
Azərbaycanın bir məhkəmə instansiyası vətəndaş Nizami Kərimova qarşı cinayətə yol verildiyini hökmü ilə təsdiq edib və cinayətə yol verən Azad Nağıyevi həbsə göndərib, əmlakın girov qoyulmasına yol açan saxta çıxarış da ləğv olunub!
Azərbaycanın digər instansiyası - indiki halda Yasamal Məhkəməsi isə digər məhkəmə isntansiyasının çıxardığı hökmü saya salmır, oliqarx-bankir Elman Rüstəmovun mövqeyinə uyğun mövqe sərgiləyir.
Bu cinayətdə ən ilginc məqəm isə budur ki, Azad Nağıyev cəza yerindən dəfələrlə məhkəməyə müraciət edir, Nizami Kərimovun əmlakının girov qoyulması cinayətini təfərrüatını açıqlamaq niyyətini ortaya qoyur.
Həqiqətin üzə çıxmasının tərəfdarı olmalı məhkəmə isə Azad Nağıyevin az qala ağzını tutub danışmasına, Elman Rüstəmovun cinayətə bərabər əməlinə dair bildiklərini deməsinə şərait yaratmır.
Məsələ burasındadır ki, Nizami Kərimovun üzləşdiyi əmlak maxinasiyası, konkret olaraq əmlakının qanunsuz girov qoyulması, bu gün isə qanunsuz girovluqdan azad edilməməsi cinayətinə “dur” deyən də tapılmır.
Əslində, bu gün Yasamal Rayon Məhkəməsində Nizami Kərimovun iddiası əsasında aparılan məhkəmə araşdırması bütün Azərbaycan vətəndaşlarının, elə işə baxan hakim Ayşən Sultanova-Məmmədovanın özünün, yaxınlarının mülkiyyət hüququna birbaşa aidiyyəti var.
Hakimin verəcəyi yanlış qərar bütün vətəndaşların mülkiyyət hüquqlarını laxladıb alt-üst etmək, kökündən məhv etmək gücündədir. Sadə dillə desək, hər kəsin əmlakını ondan xəbərsiz banka girov qoymağa, götürülən krediti ödəməməklə əmlakını banka ötürməyə imkan verəcək.
Bu isə böyük bir cinayətdir, Azərbaycan Konstitusiyasının 29-cu maddəsi ilə təsbit olunan mülkiyyət hüququnun zorlanmasıdır.
E.MƏMMƏDƏLİYEV,
Musavat.com
ƏLAQƏLİ XƏBƏRLƏR
XƏBƏR LENTİ
24 Sentyabr 2024
ŞƏRHLƏRŞƏRH YAZ