Onlayn ictimai-siyasi qəzet
Türk millətinin qürur simvolu Türkeş Lefkoşada yad edildi – 52 bayraq bir zalda, TƏK MİLLƏT ruhu bir arada - FOTO, VİDEO
Musavat.com xəbər verir ki, Türk dünyasının böyük lideri, Milliyyətçi Hərəkat Partiyasının (MHP) qurucusu mərhum başbuğ Alparslan Türkeşin vəfatının 28-ci ildönümü münasibətilə Şimali Kipr Türk Cümhuriyyətində (KKTC) anım mərasimi keçirilib. “Alparslan Türkeş və Kipr” mövzusunda təşkil edilən panel Lefkoşadakı Grand Pasha otelində baş tutub.
Tədbirin təşkilatçılarından biri və eyni zamanda Alparslan Türkeşin bir dövr yaxın mühafizəçisi olmuş, hazırda Alparslan Türkeş Vəqfinin rəhbəri Naim Aydoğdu olub.
Türk dünyasının 52 bayrağı bir arada
Panelin keçirildiyi salonda Türk dünyasını təmsil edən 52 bayraq ilk dəfə bir arada nümayiş etdirilib. Panelin açılışında dövlət himni səsləndirilib və Türkeşin xatirəsi bir dəqiqəlik sükutla yad edilib. Tədbirdə Şimali Kipr Türk Cümhuriyyəti Prezidenti Ersin Tatar, Məclis Sədri Ziya Öztürkler, Baş nazir Ünal Üstel, nazirlər, millət vəkilləri və digər yüksək səviyyəli qonaqlar iştirak ediblər.
Aydoğdu: “Türkeşin fikirləri bu gün də yaşayır”
Panelin açılış nitqini Alparslan Türkeş Vəqfinin rəhbəri Naim Aydoğdu edib. O, Türkeşin Türk dünyası üçün bir yol göstərən olduğunu, Türk millətinin və Kipr Türk xalqının milli mübarizəsindəki rolunu vurğulayıb.
Aydoğdu bildirib:
“Kıbrısda iki dövlətli, suveren və daimi zəmanətli həll modelinin banilərindən biri də Alparslan Türkeşdir. O, həm Türkiyənin müdaxiləsində, həm də Türk millətinin birliyində əvəzsiz rol oynayıb.”
Aydoğdu çıxışının sonunda “Tanrı türkü qorusun və yüksəltsin” sözləri ilə nitqini tamamlayıb.
Ziya Öztürkler: “Türkeş ideyaları ilə bu gün də yaşayır”
KKTC Məclis sədri Ziya Öztürkler Türkeşi hörmətlə anaraq, onun “Dokuz Işık” doktrinası ilə Türk siyasi həyatında böyük iz qoyduğunu bildirib:
“Türkeş sadəcə yaşadığı dövrə deyil, gələcək nəsillərə də fikir və ideyaları ilə istiqamət verən bir lider idi. Onun prinsipləri bu gün də yaşayır və Türk gəncliyinə yol göstərir.”
Öztürkler həmçinin Kipr məsələsində Türkiyənin mövqeyini dəstəklədiyini və iki dövlətli həllin yeganə çıxış yolu olduğunu vurğulayıb.
Ersin Tatar: “Federasiya masası bağlanıb – artıq tək yol iki dövlətli həlldir”
Paneldə çıxış edən Prezident Ersin Tatar Türkeşi hörmətlə anıb və maraqlı bir xatirəni bölüşüb. Onun sözlərinə görə, Türkeş, Tatarın babasının sinif yoldaşı olub və babası ona daim Türkeşin fəaliyyətlərindən danışıb.
Tatar çıxışında bildirib:
“Türkeş, Kiprdə Türk varlığını qorumağın, Türkiyə ilə bağları gücləndirməyin əhəmiyyətini illər öncədən görmüş bir lider idi. Biz onun göstərdiyi istiqamətdə bu gün iki dövlətli siyasətimizi davam etdiririk.”
Tatar qeyd edib ki, federasiya danışıqları artıq bitib və Rum tərəfi heç vaxt ortaq birgə dövləti qəbul etməyəcək:
“Federasiya demək, sıfır əsgər və sıfır zəmanət deməkdir. Bu isə bizim üçün qəbuledilməzdir. Masalarda illərlə səbir etdik, amma Rum tərəfi niyyətini dəyişmədi.”
Tuğrul Türkeş də anıldı, doğulduğu ev muzeyə çevrilib
Prezident Tatar çıxışında Alparslan Türkeşin oğlu, hazırda Türkiyə siyasətində yer alan Tuğrul Türkeşi də andı. Bildirdi ki, Türkeşin doğulduğu evin muzeyə çevrilməsi Türk millətinin bu böyük liderə verdiyi dəyərin göstəricisidir.
Sonda Tatar Türkiyə Prezidenti Rəcəb Tayyib Ərdoğana və MHP lideri Dövlət Baxçalıya dəstəklərinə görə təşəkkür edib.
Musavat.com-un qeydi:
Alparslan Türkeşin anım tədbirinin əsas təşkilatçısı və çıxışçısı olan Naim Aydoğdu uzun illər Başbuğun yanında xidmət etmiş, eyni zamanda Azərbaycanın birinci Qarabağ savaşında, əlində silah Azərbaycan torpaqlarının müdafiəsində döyüşmüş bir Türk milliyyətçisidir.
Musavat.com
XƏBƏR LENTİ
05 Aprel 2025
04 Aprel 2025
ŞƏRHLƏRŞƏRH YAZ