Onlayn ictimai-siyasi qəzet
Trampın ticarət savaşı Si Cinpinə xidmət etdi: dünya nizamı dəyişir
ABŞ prezidenti Donald Trampın hərtərəfli idxal rüsumları tətbiq etməsi qlobal nizamı dəyişəcək və bu siyasətdən ən böyük fayda götürənlərdən biri Çin sədri Si Cinpindir.
Musavat.com xəbər verir ki, bu qənaətə “The Wall Street Journal”ın (WSJ) redaksiya heyəti gəlib.
Onların hazırladıqları materialda qeyd olunur ki, Çin ABŞ-ın tariflərinin son artımına cavab olaraq gələn həftədən etibarən Amerika mallarına 34 faiz rüsum elan edib. Bu addım Trampın Çin mallarına rüsumları artıran hərəkətlərinə güzgü cavabıdır. Bundan əlavə, nəşr xatırladır ki, Pekin onlarla Amerika şirkətini qara siyahıya salaraq, onların ticarət, investisiya və ixraca çıxışını məhdudlaşdırıb. Bundan əlavə, Çin yüksək texnologiyalı istehsal üçün lazım olan nadir torpaq metallarının ixracına məhdudiyyətlər qoyub və qəzetin fikrincə, bu, qlobal təchizat zəncirlərinə ciddi təsir göstərə bilər.
The Wall Street Journal mövcud vəziyyəti Si Cinpin üçün strateji hədiyyə adlandırır, çünki Pekin kritik idxal üçün alternativ mənbələr tapa biləcəyinə əmindir. Eyni zamanda əvvəllər Çinin təsirinə qarşı çıxmaq üçün ABŞ-la iqtisadi əlaqələrini gücləndirməyə çalışan ölkələr indi təzyiq altındadır. Məsələn, Vyetnam, Tayland, İndoneziya və Filippin müvafiq olaraq 46 faiz, 36 faiz, 32 faiz və 17 faiz tariflərlə üzləşib. Yaponiya və Cənubi Koreya 24 faiz və 25 faiz rüsum aldı. Bu, Vaşinqtonun Pekinə qarşı durmağa qadir iqtisadi və strateji blok yaratmaq səylərini təhdid edir.
Ağ Ev rəhbərinin özü hesab edir ki, ticarət tariflərinin Çin iqtisadiyyatına Amerika iqtisadiyyatından daha çox zərbə vurur.
2024-cü ildə Çin və ABŞ arasında ticarət dövriyyəsi 688,28 milyard dollara çatıb. Bu zaman, ABŞ-dan Çinə tədarük 163,62 milyard dollar təşkil edib ki, bu da Çindən ABŞ-a ixracdan təxminən üç dəfə azdır. Çin ABŞ-dan kənd təsərrüfatı məhsulları, mikroçiplər, mühəndis avadanlıqları, karbohidrogenlər və metallar idxal edir. ABŞ Çindən smartfonlar, kompüterlər, litium-ion batareyalar, plastik məmulatlar, məişət texnikası, ayaqqabılar, uşaq oyuncaqları və daha çox şey alır.
Musavat.com
XƏBƏR LENTİ
07 Aprel 2025
ŞƏRHLƏRŞƏRH YAZ