Onlayn ictimai-siyasi qəzet
"TikTok"da "fal bazarı": Polis necə izləyir?
Azərbaycanda “TikTok” şəbəkəsinin geniş vüsət alması bəzi işbazları da hərəkətə keçirtdi. Loru dildə desək, bu platformada izləyicilərin çoxluğu müxtəlif sahələrin, o cümlədən falçı və cadu işləri ilə məşğul olanların işini asanlaşdırdı. Falçılar hətta canlı yayım açaraq “bazar qururlar”. Maraqlısı odur ki, onlara inanıb fala baxdıranlar da kifayət qədərdir.
Digər tərəfdən bu falçıların əməllərindən zərər çəkib pullarını itirənlər də az deyil.
Daxili İşlər Nazirliyi mətbuat xidmətinin əməkdaşı, polis kapitanı Nurlan Əliyev mövzu ilə bağlı Lent.az-a bildirib ki, həmin işbazların zərərçəkənlərin pullarını ələ keçirdikdən sonra hesablarını blok eləməsi müşahidə olunur:
“Sosial şəbəkələrdə “falçılıq”, “baxıcılıq” və digər adlar altında yerləşdirilən şirnikləndirici elanlarla vətəndaşların aldadılaraq pul vəsaitlərinin mənimsənilməsi ilə bağlı polis orqanlarına daxil olan müraciətlər diqqət mərkəzində saxlanılmaqla araşdırılır.
Bu kimi hallarda özünü “falçı” və “baxıcı” kimi təqdim edən şəxslərin vətəndaşların müxtəlif məbləğlərdə pul vəsaitlərini onlayn köçürmə formasında ələ keçirməsi və məsuliyyətdən yayınmaq üçün həmin şəxslərin hesablarını sonradan bloklaması ilə müşahidə olunur.
Vətəndaşlardan mənimsənilən pul vəsaitlərinin miqdarından asılı olaraq hal barəsində inzibati və yaxud cinayət icraatı açılır. Sosial şəbəkə istifadəçilərinə diqqətli davranmağı, bu tipli elanları paylaşan şəxslərə heç bir halda ödəniş etməməyi və şəxsi məlumatlarını tanımadığı şəxslərlə paylaşmamağı tövsiyə edirik”.
XƏBƏR LENTİ
29 Dekabr 2024
ŞƏRHLƏRŞƏRH YAZ