Onlayn ictimai-siyasi qəzet
30 il öncə Qarabağda dediyi hər şey doğru çıxdı: bu döyüşçünü tapın - VİDEO
Könüllü döyüşçümüzün 1992-ci ildə dedikləri 30 ildən sonra gerçəyə çevrildi – Xankəndi proqnozu heyrət doğurur
Musavat.com xəbər verir ki, sosial şəbəkələrdə yayılan arxiv videosu Azərbaycan ictimaiyyətində böyük maraq və təəccüb doğurub. Kadrlarda ehtimal olunur ki, 1992–1993-cü illərdə, Birinci Qarabağ müharibəsinin ən ağır və çətin dövrlərindən birində çəkilmiş görüntülər yer alır. Həmin videoda könüllü döyüşçülərdən biri çıxış edərək, o dövr üçün inanılmaz görünən, lakin sarsılmaz inamla səsləndirdiyi sözlərlə yadda qalır. O, Azərbaycanın işğal altındakı bütün torpaqlarının, o cümlədən Şuşanın azad olunacağına qəti şəkildə inanır və hətta bir gün Xankəndinin ən yüksək binasının üzərində Azərbaycan bayrağının dalğalanacağını bəyan edir.
Videonun Şuşanın işğalından sonra – 1992-ci ilin may ayından sonrakı dövrdə çəkildiyi ehtimal edilir. Məhz həmin illər Azərbaycanın müstəqilliyinin ilk və ən ağır sınaq dövrlərindən biri idi, cəbhədə itkilər artır, torpaqlar ard-arda işğal edilirdi və ictimai rəy dərin ümidsizlik içində idi. Lakin belə bir şəraitdə könüllü döyüşçünün nikbin və uzaqgörən çıxışı bu gün də insanlarda dərin simpatiya və heyrət doğurur. Onun ifadə etdiyi inam və əqidə, 30 ildən sonra reallığa çevrilib – 2020-ci ildə Şuşa azad edildi, 2023-cü ilin payızında Azərbaycan ordusu Xankəndiyə daxil olub və bu şəhərin ən yüksək binasında üçrəngli bayrağımız qürurla dalğalanmağa başlayıb.
Hazırda sosial şəbəkələrdə geniş yayılan həmin görüntülər Azərbaycanın milli iradəsinin və əsgərinin əyilməz ruhunun simvoluna çevrilib. O döyüşçünün kimliyi bizə məlum deyil. Musavat.com redaksiyası həmin videodakı şəxsi tanıyanlardan onun haqqında məlumat göndərmələrini xahiş edir.
Musavat.com
XƏBƏR LENTİ
28 Sentyabr 2025
27 Sentyabr 2025
ŞƏRHLƏRŞƏRH YAZ