Onlayn ictimai-siyasi qəzet
Peyk görüntüləri: Rusiya batan “Moskva”nın əvəzinə “İvan Roqov” tikir
Son peyk görüntülərinin təhlilinə görə, Rusiya Kerçdəki “Zaliv” gəmiqayırma zavodunda iri universal desant gəmisinin tikintisini fəal şəkildə aparır.
Musavat.com Ukraynanın hərbi nəşri “Defence Express”ə istinadla xəbər verir ki, tikilməkdə olan “İvan Roqov” adlı gəmi Rusiyanın Qara dəniz donanmasının keçmiş flaqmanı olan “Moskva” kreyserini ölçü və imkanlarına görə əhəmiyyətli dərəcədə üstələmək üçün nəzərdə tutulub.
“Defence Express” bu layihənin iki gəmisindən birinin inşasında əhəmiyyətli irəliləyişləri göstərən peyk şəkillərini dərc edib.
Fotoşəkillərə əsaslanan hesablamalara görə, tikilməkdə olan kreyser təxminən 220 metr uzunluğunda, 40 metr enindədir, ağırlığı 30.000 ton olacaq. Gəmi 900-ə qədər dəniz piyadasını, 90 vahidə qədər hərbi texnikanı və 15-ə qədər helikopteri, eləcə də eniş qayıqlarını göyərtəsində daşımaq imkanına malik olacaq. Müqayisə üçün qeyd edək ki, batmış “Moskva” kreyseri 186 metr uzunluğunda və 11 490 ton yerdəyişmə qabiliyyətinə malik idi.
Gəminin tikintisinə 2020-ci ilin iyulunda başlanılıb. “Defense Express” Rusiyanın ilkin qrafikdən geri qaldığını göstərir, lakin son görüntülər işin intensivləşdiyini göstərir. Belə bir böyük gəminin peyda olması Moskvanın flaqmanını itirdikdən sonra Qara dəniz regionunda öz dəniz imkanlarını bərpa etmək və gücləndirmək niyyətindən xəbər verir.
"Moskva" kreyseri 2022-ci ilin aprelində batırılıb. Ukrayna ordusu gəmini “Neptun” gəmi əleyhinə raketlərlə məhv etdiyini elan edib. Rusiya Müdafiə Nazirliyi hücumu etiraf etmədən gəminin yanğın və ardınca sursat partlaması nəticəsində batdığını bildirib. “Moskva”nın batması Rusiyanın Qara dəniz donanmasının imicinə və döyüş qabiliyyətinə ciddi zərbə olub.
Musavat.com
XƏBƏR LENTİ
06 Aprel 2025
ŞƏRHLƏRŞƏRH YAZ