Onlayn ictimai-siyasi qəzet
Moskva-Vaşinqton münasibətləri Cənubi Qafqaza yansıya bilərmi?
AMİP liderinin köməkçisi: “Tramp ABŞ-ın maraqlarını Cənubi Qafqazda Moskvaya güzəştə getməz”
Rusiya ilə Amerika arasında münasibətlər qismən də olsa bərpa olunsa, müsbət tendensiya yaransa, o zaman bunun Cənubi Qafqaz elitasının əhval-ruhiyyəsinə təsir edəcəyi aydındır. Bu fikirləri rusiyalı politoloq Andrey Bıstritski deyib.
AMİP liderinin köməkçisi, politoloq Əli Orucov Musavat.com-a bildirib ki, Rusiya ilə ABŞ arasında münasibətlərin normallaşması Qərbin və Ukraynanın mövqelərindən də asılı olduğundan bu proses bir qədər çəkəcək:
“Son vaxtlar Qərbin də Birləşmiş Ştatlara basqınları artıb və Tramp üçün istədiyi komfortu vermir. Daxildə də narazılıqlar qalmaqdadır. Bunu anlayan Tramp artıq Rusiyaya qarşı sanksiyaların sərtləşdiriləcəyi haqqında xəbərdarlıq edib. Rusiya-Ukrayna müharibəsində bir sıra dövlətlərin hakim elitası balanslı siyasət yürüdə bilirdi. Lakin cəbhə xətti ayrılandan sonra bu bitərəflilik çətinləşdi. Çünki həm qərb, həm də Rusiya öz maraqlarına uyğun olaraq dövlətlərə, xüsusən də gənc dövlətlərə təzyiqləri artırdılar, öz tərəflərinə çəkməyə çalışdılar. Tramp-Putin sövdələşməsi əgər baş tutarsa o zaman dövlətlərin hakim elitalarının mahiyyətlərinə və xarakterlərinə uyğun özgüvənin artmasına səbəb olar. Bir halda ki, ümumbəşəri dəyərlər və beynəlxalq hüquq normaları iqtisadi və ticari maraqların içində assimilyasiya edilir, belə olan halda təhlükəsizlik və dayanıqlığın qorunması üçün elitanın aşırı gücündən istifadə ehtimalı artır. Cənubi Qafqaz regionu geostrateji və həssas region olduğu üçün mən zənn etmirəm ki, buranın elitası Vaşinqton-Moskva münasibətlərinin normallaşdırılmasından sonra da təlatümlərin olacağı istisna deyil. Tramp ABŞ-ın maraqlarını Cənubi Qafqazda Moskvaya güzəştə getməz. Xüsusən də Xəzər ətrafı bölgə iqtisadi ticari əhəmiyyətinə görə vacibdir. Fikrimcə, elitaların öz ölkələrində özlərini rahat hiss etmələri üçün ilk növbədə xalqına güvənməlidir. Xalqının etimadını itirməməlidir. Yaxud da hansısa xarici rejimlərin oyunlarına düşməməlidir. Onların strateji və geopolitik maraqlarının təmin edilməsində istifadə edilməsinə imkan verilməməlidir”.
Cavanşir ABBASLI
Musavat.com
XƏBƏR LENTİ
04 Aprel 2025
ŞƏRHLƏRŞƏRH YAZ