Onlayn ictimai-siyasi qəzet
Kreml Azərbaycana qarşı qaydasız informasiya müharibəsinə BAŞLADI
AZAL-ın Bakı-Qroznı reysində baş verən faciədən sonra Rusiyanın informasiya məkanında Azərbaycana qarşı genişmiqyaslı və qaydasız bir informasiya müharibəsi başlayıb.
Musavat.com bildirir ki, son günlərdə bu cəbhədən gələn müxtəlif ittihamlar, təhqiramiz açıqlamalar və təxribat xarakterli məqalələr artan dinamika ilə yayılmaqdadır. Xüsusilə, Rusiyanın bəzi media qurumları və jurnalistləri Azərbaycan rəhbərliyinə qarşı təhqirlər və əsassız iddialar irəli sürürlər.
“Çarqrad” təxribatı və Anna Soçinanın açıqlamaları
Yaxın zamanda “Çarqrad” telekanalının Azərbaycana qarşı təxribat xarakterli saxta məlumatları geniş müzakirələrə səbəb olmuşdu. Bunun ardınca Anna Soçina adlı səviyyəsiz jurnalist Azərbaycan Prezidentinə qarşı təhqiramiz ifadələr işlədərək, antiterror əməliyyatları zamanı rus sülhməramlılarının ölümü mövzusunu qabartmağa çalışıb.
Soçina Azərbaycanı ittiham edərək, Ukraynaya hərbi yardım göstərilməsi və rus sülhməramlılarının ölümündə məsuliyyət daşıması ilə bağlı iddialar səsləndirib. Lakin bu açıqlamalar faktlardan və obyektivlikdən uzaqdır.
İddialara faktlarla cavab
• Ukraynaya yardım: Azərbaycan Ukraynaya yalnız humanitar yardım göstərir və heç bir hərbi təchizat həyata keçirmir. Ukraynanın əsas hərbi dəstəyini Qərb ölkələrindən aldığı isə dünya ictimaiyyətinə məlumdur.
• Təyyarə faciəsi: AZAL təyyarəsinə Ukrayna raketi deyil, məhz Rusiya zenit raketi atılıb. Beynəlxalq praktikada belə vəziyyətlərdə hava limanı və hava məkanı dərhal bağlanır, lakin Rusiya bunu etmədi. Əksinə, təyyarə zərbə alandan bir neçə dəqiqə sonra “Kover” planı elan edildi.
Təyyarəyə zərbə vurulduqdan sonra onun yaxınlıqdakı hava limanlarından heç birinə enməsinə icazə verilməməsi və uzaq Aktauya göndərilməsi də izahat tələb edən ciddi suallar doğurur. Azərbaycan Prezidenti bu məqamı həlak olmuş heyət üzvləri ilə vidalaşma mərasimindən sonra verdiyi açıqlamada xüsusi vurğulayıb.
Sülhməramlıların ölümü ilə bağlı əsassız müqayisələr
Antiterror əməliyyatları zamanı rus sülhməramlılarının ölümü ilə bağlı aparılan müqayisələr də qərəzli və əsassızdır. Azərbaycan tərəfi əməliyyatlardan əvvəl Rusiya komandanlığını məlumatlandıraraq, sülhməramlıların bazalarını tərk etməmələrini tövsiyə etmişdi. Bu tövsiyəyə əməl edilməməsi isə artıq başqa məsuliyyət doğurur. Ən mühüm fərq isə odur ki, Azərbaycan bu insidentlə bağlı dərhal üzr istədi, amma Rusiya hələ də AZAL reysi ilə bağlı üzr istəməyib.
Məsuliyyəti yayındırmaq cəhdləri
Rusiya mediasında məsuliyyəti yayındırmaq üçün müxtəlif absurd versiyalar irəli sürülür: təyyarədə qaz balonunun partladığı, quşlarla toqquşmanın baş verdiyi və ya Ukrayna dronlarının günahkar olduğu iddia edilir. Lakin əsas sual cavabsız qalır: Niyə Azərbaycan təyyarəsinə Rusiya hava məkanında zenit raketi atıldı və niyə o, 800 kilometr uzaqdakı Aktauya yönləndirildi?
Azərbaycanın sivil yanaşması və Rusiyanın davranışı
Azərbaycan beynəlxalq praktikaya uyğun olaraq, məsələni sivil şəkildə araşdırır və faktlara əsaslanır. Lakin eyni səviyyədə sivil davranışı tərəfdaşlarından da gözləyir. Bu birtərəfli qayda olmamalıdır. Ya hər iki tərəf qaydalara riayət edir, ya da heç biri etmir.
Azərbaycan mediası heç vaxt Rusiya rəhbərliyinə qarşı təhqiramiz ifadələr işlətmir. Halbuki belə hallara səbəb olacaq kifayət qədər mövzular var. Lakin Azərbaycan hər zaman sivil yanaşma nümayiş etdirir.
Xəbərin hazırlanmasında istifadə edilən qaynaq: https://minval.az/news/124440702
Musavat.com
XƏBƏR LENTİ
05 Yanvar 2025
ŞƏRHLƏRŞƏRH YAZ