Onlayn ictimai-siyasi qəzet
Kəlbəcərdə girov düşən Şahxanım nənə və İstisudan açılan atəş
Yenidən abad olan azad Kəlbəcərə görə şükranlıq edərkən həm də Kəlbəcərsiz qaldığımız o günləri, o illəri unutmayaq! Bəzən Zəfərimizin arxayınçılığından yaranan yanaşmaların şahidi oluram və açığı, çox qorxuram. Axı, yaşadığımız tarix həm də ibrət götürməyimiz baxımından qan yaddaşımıza yazılmalı, əbədi həkk olunmalıdır! Yoxsa 20-ci əsrdə erməni faşizmindən çəkdiklərimizin 21-ci əsrin növbəti onilliklərində təkrarlanmayacağına kim zəmanət verə bilər?..
Mir Şahin Ağayevin Kəlbəcər müsibətindən Kəlbəcər Zəfərinədək 33 illik – bir qərinəlik tariximizə güzgü tutan 29 dəqiqəlik müəllif verilişinə baxdınızmı? Mənə ən çox təsir edən Kəlbəcərdə əsir düşən analarımız, nənələrimizin durumudur. Ağ “bayraq”la erməni canilərinin qarşısına çıxan nənəni istintaq edən qatillər, yaşlı insanları ələ salan, onları danışdırıb irişən terrorçuların ölkəsi, ümumilikdə hayçılar dəstəsi bu gün Azərbaycanı Qarabağ separatçılarını Ədalət Məhkəməsi qarşısında mühakimə etdiklərinə görə ittihamlara məruz qoyurlar, əbləhcəsinə! O kadrlara həyacansız baxmaq olmur, görəsən girov götürülmüş o nənələrin sonrakı taleyi necə olub? Dağlara doğru yol alıb gedən o biçarələri erməni cəlladlar neçə metrlikdən güllələyiblər, ya hansısa uçuruma yuvarlanıblar? Yəqin ki, axtarılan 4 min nəfərimizin içərisində onların da adları var. Təkcə bu kadrlar Ermənistanın o vaxtkı rəhbərləri daxil, bu işğalda iştirak edənlərin Haaqa Tribunalı qarşısında ittihamı üçün yetərlidir. Müharibə cinayətləri törədən, dinc əhalini soyqırım edənləri himayə edən ermənipərəstlərin gözlərinə soxmaq lazımdır bu kadrları. Elə sonuncu Azərbaycanı ittiham edən Almaniyanın bəlli televiziyasının başında, ayağında duranların!
Azərbaycanı Qarabağ ermənilərini “genosid”də ittiham edən alçaqlar sürüsü baxsınlar 60 minlik Kəlbəcər sakinlərinə şəhəri tərk etmək üçün 10 saat vaxt verənlərin törətdiyi cinayətlərə! Azərbaycanı ittiham edənlər kar qulaqlarını, kor gözlərini açıb, 2020-ci ilin noyabrında Ermənistanın işğalçı ordusuna Kəlbəcəri boşaltmaq üçün həftələrlə vaxt verilməsini, daha sonra qarşı tərəfin müraciətini nəzərə alıb, hətta vaxtın artırılmasını görmədilər, eşitmədilər! Çünki onlara sərfəlidir deyil həqiqətlərin aşkarlanması. Necə ki, nəinki İrəvanın, Göyçə, Zəngəzurun, hətta Qarabağın da əsl sahibinin kimlər olduğuna, hayların son iki əsrdə bu bölgəyə köçürülməsi barədə arxiv sənədlərinə baxmağa belə, maraq göstərmədilər. Necə ki, qondarma “erməni soyqırımı”nı inkar edənləri belə qanunla cəzalandıranlar əslində tarixdə türk-müsəlman soyqırımının olduğu, bu dəhşətləri ermənilərin törətdiyini təsdiqləyən faktlara göz gəzdirməyi belə, lüzumsuz saydılar on illər boyunca.
Nikol Paşinyanın sülh müqaviləsini imzalamağa hazır olduğu barədə nağıllara, dövlət başçımızın dediyi kimi, Ermənistanın “sülh göyərçini” kimi görünməyə çalışmasına kimsə aldanmasın. Əvvəla, Paşinyanın, ya qeyrisinin imzalayacağı sülh müqaviləsinin taleyi 2020-ci ilin 10 noyabr bəyannaməsi kimi olacaq. Hələ bu günə qədər sonuncu bəndi icra olunmayıb, 1992-ci ildən bağlı olan Naxçıvan yolumuz, Zəngəzur dəhlizimiz açılmayıb. Ermənistan Konstitusiyasında Azərbaycana qarşı ərazi iddiaları olduğu halda, sülh müqaviləsinin 17, yaxud 177 bəndinin razılaşdırılmasının prinsipcə əhəmiyyəti yoxdur. Son nəticədə, məsələn, Paşinyanın devrilməsi, yaxud terror məruz qalması halında Ermənistan Konstitusiyasına “zidd” hesab edib tanımayacaqlar bu müqaviləni. Ərazi bütövlüyümüzə qəsdi qanunvericiliyində əks etdirən ölkənin hakimiyyətinə necə etimad göstərmək olar?
Elə bilirsiniz Kəlbəcərin artıq arxivlərdə qalmış işğal günündə Ermənistan ordusunun İstisu tərəflərdən Kəlbəcəri atəşə tutması təsadüfdür? Bu, yaddaşları təzələmək üçün açılan atəşdir, Ermənistandakı canilər bizimlə məsələlərin bitmədiyinə işarə edirlər, əl çəkməyəcəklərinin anonsunu verirlər, sülh müqaviləsi imzalansa belə. Odur ki, ayıq-sayıq olmalıyıq, təkcə əsgər olaraq yox, hər birimiz öz postumuzda!
1993-cü ilin aprel günlərində Kəlbəcərdə helikopter növbəsi gözləyən kəlbəcərlilərin durumunu da heç zaman unutmayaq! O insanların heç də hamısı sağ-salamat Murovu aşa bilmədilər, nə müsibətlər oldu. Başlıbel faciəsi, tunel faciəsi… daha hansı faciələr, fəlakətlər… Kəlbəcərin azad olunması, yenidən qurulmasının sevincini yaşayarkən o günləri də xatırlayaq, xatırladaq, həm də düşmənimizin kim olduğunu gələcək nəsillərə çatdırmaq üçün. Əlləri tətikdədir! Qarşısında “Sülh” abidəsi olan məşhur İstusu sanatoriyasını darmadağın edən erməni canilər bu gün yenidən qurulan İstisu tərəfə dağın o üzündəki tarixi İstisu şəhərimizdən atəş açırlar.
Kəlbəcərin işğalına görə xalqdan üzr istəyən Əbülfəz Elçibəyin Türkiyənin ozamankı hakimiyyətindən əhalini təxliyyə etmək üçün helikopter xahişi etdiyi, ancaq müsbət cavab almadığı barədə dediklərini də yaddan çıxartmayaq! 2020-ci ildə bütün dünyanı, həm də NATO-nu şaşırdan qərar verən, F-16-ları Gəncə aeroportuna göndərən Türkiyə hakimiyyətinə müxalifətçilik edənlər, qardaş ölkədəki proseslərə “düzən” verməyə cəhd edənlərin 32 il öncəki həqiqətlərə boylanması yaxşı olardı. Ən böyük həqiqəti erməni canilərinə dərdini bayatı ilə söyləyən Şahxanım nənə söyləmişdi. Paşinyan sülh müqaviləsini imzalamaqda qərarlıdırsa, o insanların yerini desin! Azərbaycanın Milli Qəhrəmanı Natiq Qasımovun qatillərindən biri, Xocalı cəlladı Balasanyan kimi “qara qutu”ların dilini açmaqdan keçir həm də sülh müqaviləsi! Yoxsa barmaqlar sonsuzadək tətikdən çəkilməyəcək...
.jpg)
Elşad PAŞASOY 
XƏBƏR LENTİ
04 Aprel 2025
ŞƏRHLƏRŞƏRH YAZ