Onlayn ictimai-siyasi qəzet
"İsrailin Qəzzada yeni əməliyyata başlamaqda əsas məqsədi budur..." - ŞOK DETALLAR
İsrail Qəzza zolağında genişmiqyaslı quru əməliyyatı planlaşdırır.
Bu məlumatı "Wall Street Journal" mənbələrə istinadən yayıb.
Nəşrin yazdığına görə, İsrail rəhbərliyi hesab edir ki, Fələstin anklavının əhəmiyyətli hissəsinin ələ keçirilməsi və saxlanması ona HƏMAS üzərində yekun qələbəyə nail olmağa imkan verəcək.
İsrailin baş naziri Benyamin Netanyahu və onun yaxın ətrafının fikrincə, ABŞ-ın yeni administrasiyasının dəstəyi və Livanda Hizbullah təşkilatının zəifləməsi ilə İsrail ordusu bu cür hərbi əməliyyatlar keçirmək üçün kifayət qədər imkanlara malikdir.
Musavat.com-un xəbərinə görə, politoloq Zeynal Əmrəliyev öz sosial media hesabında qeyd edib ki, mövcud geosiyasi vəziyyət İsrailə əməliyyatı uğurlu şəkildə keçirməyə imkan verir:
"İlk növbədə İsrail öncədən keçirdiyi əməliyyatda HƏMAS və Hizbullah komandanlıqlarını sıradan çıxarıb. Hazırda hər iki təşkilat olduqca zəifdir və onların müqavimət gücü yox dərəcəsindədir.
İkincisi, ABŞ-da Donald Trampın hakimiyyətə gəlməsi Benyamin Netanyahu hökumətinə Yaxın Şərqdə sərbəst hərəkət imkanı verir. Co Baydendən fərqli olaraq yeni administrasiya İsraili sorğusuz şəkildə dəstəkləyir və onun bütün hərəkətlərinə haqq qazandırır.
Üçüncü bir məsələ isə Trampın İrana qarşı sərt mövqe nümayiş etdirməsidir. ABŞ İrana nüvə məsələsi ilə bərabər həm də Yaxın Şərqdəki proksi qüvvələrinə yardım etməmək barədə təzyiqlər edir. Məsud Pezeşkian hökuməti daxilindəki bütün etirazlara baxmayaraq, ABŞ ilə toqquşmada maraqlı deyil. Buna görə maksimum şəkildə Trampı qıcıqlandıracaq davranışlardan qaçmağa çalışır.
İsraili rahatladan digər önəmli bir məqam isə Suriyada Əsəd rejiminin çökməsidir. İran məhz Suriya vasitəsilə HƏMAS və Hizbullaha silah təchizatını həyata keçirirdi. İndi bu məsələdə çətinlik olduğu üçün Netanyahu hökuməti vəziyyətdən istifadə etmək istəyir".
Politoloq bildirib ki, İsrailə hazırda problem yaradan əsas qüvvə husilərdir:
"Ehtimal ki, ABŞ yaxın zamanda husilərə qarşı yeni əməliyyatlara start verəcək.
İsrailin növbəti əməliyyatındakı əsas məqsədi HƏMAS və Hizbullahı bitirməkdirsə, digər məsələ Qəzzadan insanların köçməsini təmin etməkdir.
Qəzzanın boşalması, insanların qonşu ölkələrə köç etməsi hazırda ABŞ və İsrailin əsas məqsədidir. Bununla vilayətin tamamilə sökülməsi, daha sonra onların yerində yeni yaşayış məskənlərinin salınması və burada yəhudilərin yerləşdirilməsi, Qəzzanın İsrailə birləşdirilməsi Trampın hazırladığı planın tərkib hissəsidir.
Bütün bunlara görə yaxın zamanda Qəzzadan Misir və İordaniyaya kütləvi insan köçünün yaşanması istisna edilmir".
Xalidə Gəray
Musavat.com
XƏBƏR LENTİ
26 Mart 2025
25 Mart 2025
ŞƏRHLƏRŞƏRH YAZ