Onlayn ictimai-siyasi qəzet
Ermənilər bu namizədin İran prezidenti olmasından qorxurlar: Azərbaycana...
İranda keçirilən prezident seçkilərində qələbəyə əsas namizədlər İran parlamentinin hazırkı sədri Məhəmməd-Bağer Qalibaf, ölkənin Ali Milli Təhlükəsizlik Şurasının keçmiş katibi Səid Cəlili və deputat Məsud Pezeşkiandır.
Musavat.com xəbər verir ki, bunu iranşünas Janna Vardanyan NEWS.am-ın müxbiri ilə söhbətində deyib.
O əlavə edib ki, ilkin olaraq əsas mübarizənin Qalibafla Cəlili arasında, yəni mühafizəkarlar qanadının iki nümayəndəsi arasında gedəcəyi gözlənilirdi. Amma seçki kampaniyası zamanı islahatçı qanadın təmsilçisi olan Pezeşkian da fəallaşmağa başlayıb və nüfuzlu simaya çevrilib.
Onun sözlərinə görə, buna islahatçı qanadın onun ətrafında cəmləşməsi və fəal təbliğat aparması şərait yaradıb. Beləliklə, Pezeşkian öz mövqeyini möhkəmləndirir və həm Qalibaf, həm də Cəliliyə meydan oxuyur: “Son rəy sorğularına görə, Qalibaf birinci yerdədir. Lakin seçicilərin seçkilərdə iştirak edib-etməməkdə şübhəli olan hissəsi Pezeşkianı birinci yerə çıxarıb. Ona görə də islahatçılar diqqəti maksimum sayda vətəndaşın seçkilərdə iştirakına həvəsləndirməyə yönəldiblər ki, qərarsız seçicilər də iştirak etsinlər və onları səslə təmin etsinlər.
Pezeşkian ölkənin daxili həyatı və regional məsələlərlə bağlı populist açıqlamaları sayəsində həm müsbət, həm də mənfi baxımdan diqqəti cəlb etməyi bacarıb. Eyni zamanda İranda mühafizəkarların birləşməyə və vahid namizəd irəli sürməsinə ehtiyac var ki, bu da konkret olaraq bu qanadın mümkün qələbəsini asanlaşdıracaq. Əks halda, səslər namizədlər arasında bölünəcək və onların heç biri lazımi səsi toplaya bilməyəcək, bu da Pezeşkianın əlinə işləyəcək”.
Vardanyanın fikrincə, mühafizəkarların əsas problemi vahid namizəd irəli sürmək və öz resurslarını birləşdirməkdir. O bildirib ki, İranın xarici siyasəti təkcə prezident və ya hökumət səviyyəsində müəyyənləşmir. Ermənistanla bağlı ən yüksək səviyyədə - sərhədlərin toxunulmazlığından da danışan Ali Rəhbər səviyyəsində bəyanatlar səsləndirilib: “Bu siyasət ən yüksək səviyyədə təbliğ olunur, ona görə də prezidentin dəyişməsi çətin ki, bu məsələdə ciddi dəyişikliklərə səbəb olsun.
İki mühafizəkardan biri (Qalibaf və ya Cəlili) prezident seçilərsə, qonşu, eləcə də Asiya ölkələri ilə münasibətlərin inkişafını prioritet elan edən Rəisi dövründə olan siyasət davam etdiriləcək. Eyni zamanda islahatçılar adətən ABŞ-la münasibətləri yaxşılaşdırmağa və nüvə sazişini bərpa etməyə çalışırlar. Buna baxmayaraq, prezident islahatçı olsa belə, qanunvericilik və məhkəmə səlahiyyətləri mühafizəkarların əlində qalmağa davam edəcək, ona görə də mühafizəkarların fikirlərini nəzərə almadan islahatçıların öz siyasətlərini irəli sürməsi çətin olacaq.
Pezeşkiana gəlincə, o mənada qeyd-şərt var ki, o, deputat fəaliyyəti zamanı anti-erməni və azərbaycanpərəst bəyanatları ilə seçilib. Ona görə də belə bir namizədin İran prezidenti seçilməsi, hətta nəzərə alsaq ki, xarici siyasət təkcə prezident institutu tərəfindən müəyyən edilmir Ermənistan üçün arzuolunan nəticə sayıla bilməz”.
Musavat.com
XƏBƏR LENTİ
29 Noyabr 2024
ŞƏRHLƏRŞƏRH YAZ