Onlayn ictimai-siyasi qəzet
Deputatlardan qida təhlükəsizliyi ilə bağlı həyəcanlı çıxışlar
Milli Məclisdə “Qida təhlükəsizliyi haqqında” Azərbaycan Respublikasının Qanununda dəyişiklik edilməsi barədə Azərbaycan Respublikası qanununun layihəsi birinci oxunuşda müzakirə olundu.
Deputat Sabir Rüstəmxanlı qidaların keyfiyyətindən bəhs edərkən bildirdi ki, biz narkotikdən qorxuruq, amma ondan daha təhlükəli qidalar var:
“Elə qidalar var ki, narkotik kimi vərdiş yaradır. Məsələn, “Coco-Cola”, “Fanta” uşaqların həyatını məhv edir. Evdə uşaqlara yemək yedirə bilmirik. Uşaqların istədiyi o qidaların içində nə var? Niyə onlar uşaqları cəlb edir? Geni dəyişdirilmiş qidalar uşaqlarımızı cəlb edirlər. Süni yolla yaradılmış qidalar reklam olunur. Bu, məni ciddi şəkildə vətəndaş olaraq narahat edir. Konkret olaraq, heç kimin, heç bir müəssisənin adını çəkmirəm. Amma bizim gələcəyimiz bu məsələnin həllindən ibarətdir. Niyə Azərbaycan brendi yaranmasın? Niyə biz məhsullarımızı kənara çıxara bilmirik? Bizim dağlarımızdan su çıxır, gedirik, mağazamıza Fransadan belə su gətirilir, amma bizim sular yoxdur. Bu məsələ üzərində işləməliyik”.
Deputat Tahir Kərimli isə geni dəyişdirilmiş məhsullardan danışdı: “Azərbaycanda satılan kənd təsərrüfatı məhsullarının hər birinin üzərində onun geni dəyişdirlmiş (GMO) tərkibdə olub-olmaması qeyd edilməlidir. İndi heç kim acından ölmür. Bütün insanların 90 faizi GMO-lu qidalar yediyi üçün xəstə olur, sürünə-sürünə yaşayırlar. Gədəbəy kartofunu kəsirsən, içindən su çıxır. Görünür ki, suyuna qatqı qatılır. Bu yaxınlarda İqtisadiyyat Nazirliyində qanun layihəsi hazırlanır ki, Azırbaycanda GMO-lu məhsulların istehsalına imkan verilsin. Mən bu qanunun hazırlanmasını eşitmişəm. Amma bundan çəkinmək lazımdır. Azərbaycan xalqı sağlam yaşamalıdır. Bir çox dövlətlərdə GMO-lu yemlər heyvanlara yedirilir. Biz Azərbaycan xalqını başdan-ayağa xəstə etməyə çalışırıq? Azərbaycan əhalisini GMO-lu məhsullardan, öldürücü məhsullardan xilas etmək lazımdır”.
Bir sıra deputatlar isə həmkarlarının səsləndirdiyi fikirlərlə razılaşmadıqlarını bildirdilər. Layihə ilk oxunuşda qəbul edildi.
E.Paşasoy,
Musavat.com
XƏBƏR LENTİ
28 Sentyabr 2024
ŞƏRHLƏRŞƏRH YAZ