Onlayn ictimai-siyasi qəzet
Biləcəridə şəhid ailəsinin evini dağıtdılar - FOTOLAR
Şəhid ailəsi olan Rahilə Valeh qızı Gülməmmədova Musavat.com-a müraciət edərək acı dolu həyat hekayəsini danışıb.
Onun dediyinə görə, illərdir Binəqədi rayonu, Biləcəri qəsəbəsində, 2-ci yaşayış massivində yaşadıqları həyətdə oğlu Səidə kiçik bir ev tikmək istəyiblər:
“Oğlum Səidə ev tikmək istədik. Bankdan kredit götürdük, oğlumun maşınını satdıq. Təxminən 60 kvadratmetr olan bir mərtəbəli evi tikib başa çatdırmağa yaxın idik. Birdən-birə Binəqədi Rayon İcra Hakimiyyətinin əməkdaşları gəldi, heç bir məhkəmə qərarı, sənəd göstərmədən evimizi söküb dağıtdılar...”
Rahilə xanım deyir ki, qarşı tərəfə şəhid ailəsi olduqlarını, bu evin onun üçün nə qədər böyük mənəvi yük daşıdığını söyləsə də, heç nə dəyişməyib:
“Yoldaşım Vüqar Habil oğlu Bağırov və qardaşım Eynullah Valeh oğlu Gülməmmədov Qarabağ müharibəsində qəhrəmanlıqla döyüşüb şəhid olublar. Mən bir qadın kimi çətinliklə oğlumu böyütdüm. İndi də onu evləndirmək, bir evlə təmin etmək istəyirdim. Amma mənim şəhid ailəsi olmağım, min bir əziyyətlə oğul böyütməyim heçə sayıldı...”
Rahilə Gülməmmədovanın sözlərinə görə, ev tikdikləri ərazi 32 ildir yaşadıqları həyətdir.
Həyətin dörd bir tərəfində evlər var. Ümumilikdə ərazidə yüzlərlə ev var.
Məsələ ilə bağlı Binəqədi Rayon İcra Hakimiyyətinin mövqeyini öyrənmək üçün informasiya sorğusu vermişik. Sorğuya veriləcək cavabı da təqdim edəcəyik.
Elşən MƏMMƏDƏLİYEV,
Musavat.com
XƏBƏR LENTİ
13 Iyul 2025
ŞƏRHLƏRŞƏRH YAZ