Onlayn ictimai-siyasi qəzet
Bəxti yavər yetim – milyarder oldu, 11 sentyabrdan sağ çıxdı, indi Trampın kassiri və naziridir
Bir adam təsəvvür edin ki, uşaq yaşlarında anasını və atasını itirsin, atasının borclarını bağlasın, uğurlu biznes qursun, böyük terror aktından salamat qurtulsun və hazırda dünyanın ən qüdrətli dövlətinin ticarət naziri təyin edilsin.
Bu, Hovard Latnikdir. O, nazir olmazdan əvvəl, loru dildə desək, Trampın kassiri olub. Onun 2020 və 2024-cü il prezidentlik kampaniyaları üçün vəsait toplayıb. O, “Kantor Fitscerald” (“Cantor Fitzgerald”) və BGC Group-un sədri və baş direktorudur.
Hovard 1961-ci ilin 14 iyulunda Nyu-Yorkun Yerixo şəhərində Kvins kollecinin tarix professoru Solomon Latnikin və rəssam-heykəltəraş Ceyn Latnikin ailəsində doğulub.
Hovardın anası 1978-ci ildə ölüb. Bir il sonra atası da vəfat edib. Yetim qalan Latnik bacısı və qardaşı ilə birlikdə atasından qalan borcu ödəmək üçün vəkil tutmağa məcbur olub. Atasının işlədiyi kollecin dekanı 18 yaşlı Latnikə zəng vurub və ona tam təqaüd təklif edib. Latnik 1983-cü ildə kolleci iqtisadiyyat ixtisası üzrə bitirib.
Sonra o, “Cantor Fitzgerald”a qoşulub, şirkətin qurucusu Bernard Kantorla isti münasibət qurub, onun şəxsi müşaviri olub. 1991-ci ildə Latnik şirkətin prezidenti və baş direktoru, 1996-cı ildə isə sədri olub.
Latnikin fərasəti, fəhmi, işgüzarlığı, əlaqələri tezliklə onu milyonçu edib. Ancaq 11 sentyabr 2001-ci ildə baş verən terror aktları Hovard Latniki, necə deyərlər, quru yurdda qoyub.
11 sentyabr terror hücumları zamanı Üsamə bin Ladenin rəhbərlik etdiyi ərəb terrorçuların qaçırdığı təyyarələrdən ikisi Hovard Latnikin şirkətinin – “Cantor Fitzgerald”ın əkiz qüllələrdəki ofislərinin yerləşdiyi mərtəbələrin (101-105-ci) altındqan binaya çırpılıb. Həmin səhər onun ofisində çalışanlardan heç biri, o cümlədən Hovardın qardaşı Harri Latnik yanan və çökən binadan sağ çıxa bilməyib. Ümumilikdə, “Kantor”un 960 əməkdaşından 658-i 11 sentyabr günü həlak olub. Hovardın özü isə təsadüfi nəticəsində terakt qurbanı olmayıb. Əslində o da həmin gün ofisdə olmalı imiş, ancaq oğlu Kaylınin uşaq bağçasına getdiyi ilk gün olduğunudan o, balacanı bağçaya şəxsən özü aparıb. Baş vermis hadisədən xəbər tutaraq əkiz qüllələrin həndəvərinə gələn H.Latnik sağ qalan işçilərindən heç olmasa birini tapmaq ümidi ilə qüllələrə yaxınlaşıb. Lakin o, heç kəsi tapa bilməyib, üstəlik cənub qülləsi çöküb və o, yaxınlıqdakı avtomobilin altında gizlənərək sağ qalıb.
Hücumlardan qısa müddət sonra Latnik teraktın ən böyük zərərçəkənlərindən biri olaraq çıxışlar edib və “11 Sentyabr”ın ən məşhur simalarından birinə çevrilib. “Cantor Fitzgerald” işçilərinin üçdə ikisini itirdiyi üçün çoxları elə bilib ki, o, bağlanacaq. Hücumlardan dörd gün sonra, sentyabrın 15-də Latnik itkin düşən və ya ölən 700-ə yaxın işçinin maaşlarını ödəməyi dayandıracağını açıqlayıb. Sentyabrın 19-da o, CNN-in aparıcısı Larri Kinqə verdiyi televiziya müsahibəsində bu məsələyə toxunaraq deyib: "Mən şirkətdəki hər kəsi itirdim... Onlara maaş verməyə pulum yoxdur". Ancaq o, ümidini itirməyib və hücumda həlak olan “Cantor” işçilərinin ailələrinə beş il ərzində gələcək qazancının 25%-ni, eləcə də növbəti on il ərzində tibbi sığorta alacaqlarını vəd edib. Bu, ümumilikdə hər ailə üçün 100.000 dollar xərc çəkilməsi demək idi.
2006-cı ildə Latnikin şirkəti 11 sentyabr hücumlarından zərər çəkmiş işçilərinin qohumlarına 180 milyon dollar bağışlayıb.
Bu, Latnikin formalaşdırdığı qeyri-kommersiya təşkilatı olan yardım fondunun hesabına olub. Latnik özü fonda 1 milyon dollar ianə edib, 14 müxtəlif şirkətdən 11 sentyabr qurbanlarının ailələri üçün ianələr qəbul edib.
2005-ci ildən bəri “Dünya hədiyyə günü”ndə o, təxminən 113 milyon dollar toplayıb. Məşhurlar, idman ulduzları və digər görkəmli şəxslər onun təşkil etdiyi xeyriyyə tədbirlərində fəal iştirak ediblər. Tədbir iştirakçıları arasında prezident Corc Buş, eks-prezident Bill Klinton, Nyu-Yorkin meri Rudi Culiani, müğənni Ledi Qaqa, Venus Uilyams, Eli Menninq, Susan Sarandon və şahzadə Harri də olub.
Latnikin pultoplama, ianə yığmaq qabiliyyəti Donald Trampın da karına gəlib. O, iki dəfə Latnikin xidmətindən bəhrələnib və “borcu”nu Latniki ticarət naziri təyin etməklə ödəyib. İndi o, özünü Trampın milyarderlər komandasında suda balıq kimi hiss edir.
Latnik həm də xeyriyyəçi kimi tanınır, incəsənət qalerayalarını, idman mərkəzlərini, kitabxananı himayə edir və onlara milyonlar bağışlayır.
Latnik 2012-ci ilin oktyabrında baş verən “Sendi” qasırğasının vurduğu Nyu-York və Nyu-Cersi ştatlarının zərərçəkən sakinlərinə 10 milyon dollar yardım edib. “Cantor Fitzgerald” ən çox zərər çəkmiş icmalarda 19 məktəbi himayəsinə götürüb, Latnik Bruklin, Kuins, Lonq Aylend, Staten Aylend və Nyu-Cersi bölgələrində təxminən 10 000 ailəyə 1000 dollarlıq debet kartları paylayıb.
Hovard Latnik bir çox universitetlərin, mərkəzlərin, fondların fəxri üzvüdür. Onun fəxri qonağı olduğu fondunun birinin adı belədir: “Dünya Yetimlər Fondu”…
“Yetimə can-can deyən çox olar, çörək verən az” məsəli Hovard Latnik üçün deyilməyib. Yetimliyin acılarını yaxşı bilən Latnikin özü indi minlərlə yetimin ümid yeridir.
Araz Altaylı, Musavat.com
ƏLAQƏLİ XƏBƏRLƏR
XƏBƏR LENTİ
22 Fevral 2025
21 Fevral 2025
ŞƏRHLƏRŞƏRH YAZ