Onlayn ictimai-siyasi qəzet
Azərbaycanda karantin rejimi təzədən sərtləşə bilər
Ölkəmizdə epidemioloji durumdan narahatlıq var; infeksionist deyir ki...
Qonşu ölkədə yeni COVİD dalğası nə ilə bağlı ola bilər? Azərbaycanda da mümkünmü? Bizdə peyvəndləmə nə yerdədir?
“Son bir həftə ərzində Azərbaycanda yoluxma hallarının sayındakı artım 48 faiz təşkil edib”.
Bu barədə Səhiyyə Nazirliyi, İcbari Tibbi Sığorta üzrə Dövlət Agentliyi və Tibbi Ərazi Bölmələrini İdarəetmə Birliyinin birgə məlumatında bildirilib.
Qeyd edilib ki, dünya ölkələrinin bütün səylərini koronavirus (COVİD-19) infeksiyası ilə mübarizəyə və profilaktik tədbirlərə yönəltməsinə baxmayaraq, pandemiyanın qarşısını tam almaq hələ də mümkün olmayıb: “Son günlərdə qeydə alınan statistik göstəricilərə əsasən, COVİD-19 infeksiyasına yoluxanların sayında artım müşahidə olunur. Belə ki, Ümumdünya Səhiyyə Təşkilatının məlumatına görə, ötən həftə ərzində qlobal olaraq xəstəliyə yoluxma halları təxminən 20 faiz artıb. Dünyada müşahidə olunan yüksək artım fonunda ölkəmizdə həyata keçirilən mühüm preventiv tədbirlər, eyni zamanda əhalinin vaksinasiya prosesində aktiv iştirakı nəticəsində son bir neçə ay ərzində Azərbaycanda epidemioloji vəziyyətin sabit saxlanılmasına nail olunub. Axır bir həftə ərzində Azərbaycanda yoluxma hallarının sayındakı artım 48 faiz təşkil edib. Ölkəmizdəki epidemioloji vəziyyət səhiyyə qurumları tərəfindən diqqətlə izlənilir və nəzarətdə saxlanılır. Yoluxma dinamikası intensivləşdiyi təqdirdə müvafiq addımların atılması məsələsinə baxıla bilər.
Əlavə olaraq bildiririk ki, respublikamızda virusla mübarizə tədbirləri çərçivəsində mövcud maddi-texniki baza, dərman təchizatı və kifayət qədər çarpayı fondu var. Qeyd edək ki, COVİD-19 infeksiyasına yoluxmuş şəxslər əksər hallarda xəstəliyi yüngül, lakin bəzi insanlar (yaşı 65-dən yuxarı olan və hər hansı bir yanaşı xəstəliyi olanlar) nisbətən ağır keçirirlər. Risk qrupuna daxil olan vətəndaşlara sanitar-gigiyenik qaydalara ciddi əməl etmələri, koronavirusun əlamətlərini hiss etdikdə ilk növbədə sahə həkimlərinə məlumat vermələri və test nümunələrinin götürülməsi üçün müraciət etmələri tövsiyə olunur. Səhiyyə qurumları vətəndaşları virusdan qorunmaq üçün ikinci dozadan və yaxud xəstəliyə yoluxub sağaldıqdan 6 ay sonra qoruyucu immunitetin səviyyəsinin azalmasını nəzərə alaraq gücləndirici (“buster”) doza ilə peyvəndləməyə çağırır. Vaksinasiya ilə yanaşı, xüsusi karantin rejiminin qaydalarına riayət olunması tövsiyə edilir. Unutmayaq ki, fiziki məsafənin saxlanılması və şəxsi gigiyenik qaydalara əməl olunması virusun mutasiyasından asılı olmayaraq xəstəlikdən qorunmağın yeganə yoludur".
Nilufər Məmmədova
Həkim-infeksionist Nilufər Məmmədova “Yeni Müsavat”a bildirdi ki, ÜST tərəfindən hələ ki COVİD-19 pandemiyasının bitməsi elan olunmayıb: “Buna görə də dalğaların olması təbiidir. Bütün ölkələrdə epidemioloji nəzarət olmalıdır. Azərbaycanda da xəstəlik üzərində ciddi epidemioloji nəzarət var. Peyvənd və kollektiv immunitet hesabına bizdə yoluxma qorxulu həddə deyil. Səhiyyə sistemi vəziyyəti nəzarətdə saxlaya bilir. Buna baxmayaraq, qorunma qaydalarına riayət etməliyik. Yoluxma sayında artım olarsa, müəyyən tədbirlərin görülməsi gözləniləndir”.
Nigar HƏSƏNLİ,
“Yeni Müsavat”
XƏBƏR LENTİ
15 Oktyabr 2024
ŞƏRHLƏRŞƏRH YAZ