Onlayn ictimai-siyasi qəzet
Şirxanın qazancı - “Milyardlar dolaşır bu pis qumarda”
Bir bizdə deyil, dünyanın hər tərəfində insanlar qumara - lotoya, lotereyaya, mərc oyunlarına meyllidir. Bu, varlıya, kasıba baxmır, şövqə, zövqə, sövqə bağlıdır.
Məsələnin şövq tərəfi odur ki, çox insanın içində udmaq, qazanmaq azarı olur və o yatmır, daima çırpınır, üzə çıxır.
Bu prosesdən zövq alanlar da çoxdur. Onlar üçün udub-uduzmağın fərqi çox azdır, bir çoxunun onsuz da bəs qədər pulları var, sadəcə, bu işdən ləzzət alırlar. O ki 3 tuz çıxır ha... Ekstaz.
Sövq məsələsi də belədir ki, insanların bu zəif damarını bilənlər müxtəlif oyunlar qurur, bir-iki yalançı “qalib” və “uduş” təşkil edir, adamları şirnikləndirirlər, sonra oturub qurduqları sağma-soyma mexanizminin gətirdiyi pulları dəstləyir-cəmləyirlər. Ona görə də, fikir verirsinizsə, vaxtaşırı yeni qumar növləri əmələ gəlir.
Yadınızda olar, bir ara şəhərin bütün çayxanalarından loto çağıranların səsi gəlirdi: “10 - kassir, 26 - Bakı komissarları, 41- müharibə başladı, 45 - qələbə, 53 - Stalin öldü, 77 - ölü qıçları” və s. Bütün millət dadanmışdı çayxanada oynadılan loto qumarına. Çayxana işlədənlər babat qazanırdı. Sonra zibili çıxdı. Böyüklər bu işə əl qoydular, torbadan loto daşı çıxarmaq işi leqallaşdı və TV-lərə keçdi.
Daha sonra kazinolar çıxdı. Orda da bir xeyli adamın həyatı qaralandan, bozarandan, göyərəndən sonra axır-axırda ölkənin Las-Veqasa dönməsinin qarşısı alındı. Yoxsa, kazinolar o qədər dəb olmuşdu ki, varlı da ora cumurdu, kasıb da.
Futbol totalizatorunun qeyri-leqal dövrü vardı. Hökumət gördü ki, bu sferada milyardlar fırlanır, pullar xaricə gedir, götürdü, mərc oyunlarını leqallaşdırdı, “Topaz” yaratdı. Qumar həvəskarları pullarını bu şirkətə yedirtdilər, sonra necə oldusa, bu qumar növünə maraq səngidi. İndi futbol mərci qoşanlar 8-10 il əvvəlki ilə müqayisədə xeyli azdır. Bizimkilər nə barmaq elədilərsə, “gül kimi futbol qumarı” cəlbediciliyini itirdi.
Yeri gəlmişkən, bu qumarın şiddətlənən və “çiçəklənən” vaxtında, 8 il əvvəl bir oxucum prosesə şeir qoşub mənə göndərmişdi. Bayaq baxdım ki, hələ də aktualdır. Şeir “Apardın, pulları verdin ”Topaz"a" adlanır və aşağıdakı kimidir:
Durum sənə ta nə deyim, a kasıb,
Qafanı tutummu şillə-qapaza?
Oğul-uşağının ağzından kəsib,
Apardın, pulları verdin “Topaz”a.
Kişi, başın çıxmır sənin futboldan,
Yaxşı tanımırsan sən “Liverpul”u.
Heç-heçə yazırsan, döşəyir qoldan,
Uduzan kim olur? Di get ver pulu.
Qardaş, bu qumardır, yekə bir qumar,
Buna pul qoyanın udubmu biri?
Qumar düzəldənlər mənfəət umar,
Tələyə qoyarlar müftə pendiri.
Kasıb, ümid olma katalonlara,
Qələbə qazanmaz hər dəfə “Barsa”.
Qumarbaz “Bwin”dən haqq alanlara,
Güvənmə, bir misqal kamalın varsa.
Birisi sürürdü küçədə “Passat”,
Satdı, parasını “Topaz”a verdi.
Uduzdu, əlində qalmadı hessad,
Nəyi var, itirdi, güdaza verdi.
Kasıb, girmə qəti o oyunlara,
Bil, futbol qumarı aşar boyunu.
Gedib dadanarsan cib soyanlara,
Təxirə salarsan hər il toyunu.
Sayma ki, bir günə yüz min qazana,
Sən çıxa bilərsən bu durumundan.
Yüz min sənin kimi hesab yazan var,
Durublar “Topaz”ın uçurumunda.
Milyardlar dolaşır bu pis qumarda,
Ölkənin hər yanı Las-Veqas olub.
Birinin hələlik şansı tumarda,
Mininin qarnına sancılar dolub.
Bu işdə pul yoxdur, binəva kasıb,
Bunun ətək-ətək, israf-xərci var.
Yoxdur bu oyunda şən hava, kasıb,
Adamı havasız edən borcu var.
İndi həmin kasıblar qurşanıblar “Poz, qazan”a, hey pozurlar, amma qazana bilmirlər. Yüz mini pozur, biri qazanır, ya da qazanmır. Daha doğrusu, kasıblar pozur, amma Şirxan qazanır.
Sovet adamları Şirxanın kim olduğunu bilirlər. Köhnə hind filmlərindən birində qumaroynadan obraz vardı - adı Şirxan idi.
Mömin qardaşımız Elşad Miri də məsələyə dini prizmadan yanaşır, deyir, qumar haramdır, günahdır. Əslində o, düz deyir, amma qəfildən varlanmaq ehtirası olan yerdə günaha baxan kimdir?
Heç olmasa “qəfildən varlanmaq” imkanı olsaydı... O da yoxdur. Müftə pendirin yalnız siçan tələsində olduğu barədə hikmətli kəlam irad edənlər belə şeyləri də nəzərdə tutublar.
İndi nə edək, necə edək ki, insanlar əllərində olan son qəpik-quruşu aparıb şirxanlara verməsinlər. Bunu əngəlləyəcək mexanizm tapmaq yeni bir qumar növü icad etməkdən qat-qat çətindir.
Samir SARI 
YAZARIN DİGƏR YAZILARI
19 Sentyabr 2024
17 Sentyabr 2024
15 Sentyabr 2024
14 Sentyabr 2024
12 Sentyabr 2024
10 Sentyabr 2024
08 Sentyabr 2024
06 Sentyabr 2024
04 Sentyabr 2024
02 Sentyabr 2024
01 Sentyabr 2024
30 Avqust 2024
28 Avqust 2024
22 Avqust 2024
20 Avqust 2024
18 Avqust 2024
16 Avqust 2024
14 Avqust 2024
12 Avqust 2024
11 Avqust 2024
09 Avqust 2024
07 Avqust 2024
05 Avqust 2024
03 Avqust 2024
01 Avqust 2024
31 Iyul 2024
30 Iyul 2024
28 Iyul 2024
26 Iyul 2024
24 Iyul 2024
ŞƏRHLƏRŞƏRH YAZ