Onlayn ictimai-siyasi qəzet
“Signal” qalmaqalı: Ağ Evin gizli dövlət qrupuna jurnalisti kim əlavə edib - SKANDAL
"Signal" qalmaqalı: Trampın komandası Yəmən planları ilə bağlı qapalı qrupa jurnalisti də əlavə ediblər
ABŞ prezidenti Donald Trampın administrasiyasında yüksək səviyyəli təhlükəsizlik pozuntusu ciddi rezonans doğurub. Məlum olub ki, Trampın milli təhlükəsizlik üzrə müşaviri Mayk Uolts, Yəməndə husilərə qarşı hava zərbələrinin müzakirə edildiyi Signal qrup yazışmasına “The Atlantic” jurnalının baş redaktoru Ceffri Qoldberqi əlavə edib.
Musavat.com xəbər verir ki, bu faktın üzə çıxması Vaşinqtonda strateji səhv, daxili təhlükəsizlik boşluğu və peşəkar məsuliyyətsizlik kimi qiymətləndirilir.
Ağ Evin mətbuat katibi Kerolayn Livitt CNN-ə açıqlamasında hadisəni təsdiqləyib, lakin prezident Trampın Uoltsa və təhlükəsizlik komandası üzvlərinə “tam etimadını” qoruduğunu bildirib:
“Cənab prezident Tramp dəfələrlə vurğulayıb ki, Yəməndə husilərə qarşı həyata keçirilən hücumlar son dərəcə uğurlu və effektiv olub. Prezident təhlükəsizlik müşaviri Mayk Uoltsa və komandasına tam güvənir.”
Hadisə ilə bağlı ABŞ Senatının Respublikaçı çoxluğunun lideri Con Tyun da məsələni diqqətə alıb və rəsmi araşdırmanın aparılacağını açıqlayıb:
“Biz bu barədə yenicə məlumat alırıq. Amma məsələ olduqca ciddidir və tam şəkildə araşdırılacaq. Planımız var,” – deyə Tyun CNN-ə bildirib.
CNN-in məlumatına görə, bu qalmaqaldan sonra Ağ Evdə “Signal” tətbiqindən istifadə qaydaları yenidən nəzərdən keçirilir. Məlum olur ki, bu tətbiq kampaniya dövründən bəri Ağ Ev əməkdaşları tərəfindən əsas rabitə vasitəsi kimi istifadə olunub.
Adı açıqlanmayan yüksək vəzifəli məmur CNN-ə bildirib:
“Hər kəs “Signal”dan istifadə edir – gündüz də, gecə də. Bu artıq dəyişə bilər.”
Trampın müşavirlərindən biri əlavə edib ki, komanda prezidentin bu məsələyə nə qədər qəzəbli reaksiya verəcəyini gözləyirdi və məhz bundan sonra tətbiqlə bağlı konkret dəyişikliklərə qərar veriləcək.
Siyasi müşahidəçilər bu olayı Trampın ikinci prezidentlik dönəmində yaşanan ən ciddi və simvolik təhlükəsizlik səhvi kimi qiymətləndirirlər. Dövlət sirri daşıyan hərbi planların təsadüfən və ya ehtiyatsızlıqla mətbuat nümayəndəsinə açıqlanması daxili nəzarət mexanizmlərinin zəifliyini göstərir.
Hazırda Tramp administrasiyası həm ictimaiyyətin, həm də Konqresin təzyiqi altında məsuliyyət və şəffaflıq tələbləri ilə üz-üzədir.
Musavat.com
XƏBƏR LENTİ
26 Mart 2025
ŞƏRHLƏRŞƏRH YAZ