Onlayn ictimai-siyasi qəzet
Şeyx bayram namazından İrana görə imtina edib?
30 martda Azərbaycanda Ramazan bayramı ilə bağlı namaz qılındı. Bayram namazı Əjdərbəy məscidində 08:00-da, Təzəpir məscidində isə 09:00-da baş tutdu.
Bütün Qafqazın şeyxi Allahşükür Paşazadənin Təzəpir məscidindəki bayram namazına imamlıq etməməsi diqqət çəkdi. Belə ki, Təzəpirdə bayram namazı Hacı Faiz Nağızadə imamlığı ilə qılındı.
Bunun səbəbi kimi Şeyxin səhhətində problemlər olması və Türkiyədə müalicə alması barədə mediada yayılan məlumatı isə Allahşükür Paşazadə təkzib etdi. Türkiyəyə səfərinin məqsədini açıqlamaqdan imtina edən Şeyx dedi ki, Bakıya qayıtmaq istəsə də, sıxlıq olduğu üçün bilet tapa bilməyib.
Əlbəttə ki, bu, sual doğurmaya bilməz:
1. Bayram namazının 30 martda qılınacağı əvvəlcədən bəlli idi, Şeyx bunun üçün öncədən bilet sifariş edə bilərdi;
2. 29 martda Türkiyədə Azərbaycana son anda da bilet almaq mümkün idi – düzdür, bir neçə dəfə bahasına olacaqdı, ancaq hesab edirəm ki, Şeyxin bayram namazına rəhbərlik etmək üçün bir neçə dəfə bahasına bilet almaq imkanı var;
3. Əgər doğrudan da bilet tapa bilməyibsə, Samir Rzayevdən xahiş etsə, AZAL rəhbəri müsəlmanların bayram təntənəsinə çatdırmaq üçün Qafqazın şeyxinə pilotların yanında belə yer edərdi – hələ onu demirəm ki, biznes-klassda adətən, son uçuş saatına qədər bir neçə boş yer olur.
Hələ onu demirəm ki, AZAL əlavə reys aça (Şeyx bilet tapa bilmirsə, demək, başqaları da gəlmək istəyir və əlavə reysə ehtiyac var) və yaxud özəl təyyarədən də istifadə edilə bilərdi.
Yəni Ramazan bayramı müsəlmanlar üçün olduqca müqəddəsdir və bayram namazında Bütün Qafqazın şeyxinin iştirakı çox önəmli sayılır.
Məsələ burasındadır ki, İran ənənəvi xislətinə uyğun olaraq Ramazan bayramını 31 martda keçirdi – müsəlman dünyasından yenə özünü ayırdı.
İndi Türkiyədə olduğu üçün sayın, Bakıda isə əziz-xələf və hörmətli Şeyximiz gərəkdir hamını bu şübhədən çıxarsın və həqiqəti desin: Səhhətindəmi problem var, yoxsa İrana görə 30 martda bayram namazı qılmayıb?
axar.az
XƏBƏR LENTİ
02 Aprel 2025
ŞƏRHLƏRŞƏRH YAZ