Onlayn ictimai-siyasi qəzet
Qazimiz onu əməliyyat edən israilli həkimlə görüşüb - Fotolar
44 günlük Vətən müharibəsi zamanı yaralanan, israilli həkim Yişay Falik tərəfindən mürəkkəb göz əməliyyatı olunaraq görmə qabiliyyəti bərpa edilən qazi Arif Hacıyev İsrailə gedib.
Musavat.com xəbər verir ki, Arif Hacıyev onu əməliyyat etmiş həkim Yişay Falik, göz donoru olan şəxsin ailəsi, İsrail hökumətinin üzvləri, Knessetin spikeri, bir sıra şəhər merləri ilə görüşüb.
Səfər Azərbaycan-ABŞ Mədəniyyət Fondunun prezidenti Nurit Qrinqer, “Double Trouble Production” şirkətinin baş direktoru Eti El-Kiss tərəfindən təşkil olunub. Səfərin reallaşmasına həmçinin Azərbaycan Respublikasının Diasporla İş üzrə Dövlət Komitəsi, AZAL, İsrailin Azərbaycandakı səfiri Corc Dik və ABŞ-dakı müxtəlif yəhudi təşkilatları dəstək göstərib.
Cərrah Yişay Falik Arif Hacıyevlə görüşüb və gözünü müayinə edib. O, Qarabağ müharibəsi veteranlarına göstərdikləri qayğıya görə Prezident İlham Əliyevə və Birinci vitse-prezident Mehriban Əliyevaya təşəkkür edib. Yişay Falik Azərbaycanın yüzlərlə yaralı əsgərinin müalicəsində və sağalmasında YAŞAT Fondunun mühüm rolunu da qeyd edib.
Arif Hacıyev səfər çərçivəsində Herziliya şəhərinin meri Moşe Fadlonla da görüşüb. Ona şəhərin simvolik açarı təqdim edilib. İsrail parlamenti Knessetdə azərbaycanlı qazinin nazir Yoav Qalant, Knessetin spikeri Yariv Levin və Knesset üzvü Boaz Bismutla görüşləri təşkil olunub.
Azərbaycan-ABŞ Mədəniyyət Fondunun prezidenti Nurit Qrinqer qeyd edib ki, Arif Hacıyevin İsrailə səfərinin təşkili onların ilk təşəbbüsüdür və bundan sonra da fərqli layihələrin icrasını davam etdirəcəklər: “Mən Ariflə 2-ci Qarabağ müharibəsindən sonra Azərbaycanda olarkən tanış olmuşam, onun cəsarətli siması hələ də yadımdadır. Bundan sonra İsrailə səfər ideyası yarandı. Bizim başqa maraqlı ideyalarımız var və onları 2023-cü ildə həyata keçirib ABŞ media bazarında yayımlamağı planlaşdırırıq”.
Jurnalist və Azərbaycan-ABŞ Mədəniyyət Fondunun prezidenti Nurit Qrinqer və “Double Trouble Production”ın baş direktoru Eti El-Kiss Arif Hacıyev haqqında hazırladıqları filmi 2023-cü ilin aprelində bitirməyi planlaşdırırlar.
Qeyd edək ki, Azərbaycan-ABŞ Mədəniyyət Fondu (www.us-az-culturalfoundation.com) 2022-ci ildə ABŞ-da yaradılıb və onun məqsədi Azərbaycanla Amerika arasında mədəniyyət, media sahəsində əməkdaşlıq əlaqələri qurmaqdır.
XƏBƏR LENTİ
12 Oktyabr 2024
11 Oktyabr 2024
ŞƏRHLƏRŞƏRH YAZ