Onlayn ictimai-siyasi qəzet
Moldovada 8 noyabr - Zəfər günü qeyd edilib - FOTOLAR
8 noyabrda Azərbaycanın Moldovadakı Səfirliyinin təşkilatçılığı ilə Səfirliyin önündəki “Qələbə” bağçasında Zəfər günü qeyd edilib.
Musavat.com xəbər verir ki, tədbirdə Moldova Parlamentinin sədrinin müavini Mixail Popşoy, qardaş Türkiyə Respublikasının səfiri Uyqar Mustafa Sertel, Moldovanın Millətlərarası Münasibətlər Agentliyinin sədri Nikolay Reditse, bu ölkədə akkreditə olan doplamatik korpusun nümayəndələri, ictimai-siyasi xadimlər, milli azlıqların icma rəhbərləri və diaspor üzvləri iştirak ediblər.
Zəfər günü münasibətilə Səfirliyin önündəki “Qələbə” bağçasında XVIII əsrin məşhur Azərbaycan şairi və ictimai xadim, Qarabağ xanının vəziri Molla Pənah Vagifin barelyefinin açılış mərasimi olub.
Tədbirdə çıxış edən səfir Qüdsi Osmanov nitqində ilk öncə xalqımıza bu Qələbəni bəxş edən, Azərbaycanın ərazi bütövlüyü və süverenliyi yolunda canlarından keçən şəhidlərimizin əziz xatirəsini yad edib. Səfir bu gün Xankəndidə keçirilən hərbi paradı qeyd edərək, xalqımızın qürür mənbəyi olan Qələbəni tarixi ədalətin bərpası və beynəlxalq hüququn təntənəsi adlandırıb. Diplomat Ermənistanın ölkəmizə qarşı destruktiv və işğalçılıq siyasətinə baxmayaraq, Azərbaycanın sülh gündəliyinə sadiq olduğunu bildirib.
Həmçinin səfir işğaldan azad olan ərazilərdə aparılan geniş miqyaslı tikinti-bərpa, yenidənqurma işlərindən danışıb, “Böyük qayıdış” proqramı çərçivəsində bu torpaqların əsl sahibləri olan keçmiş məcburi köçkünlərin doğma yurdlarına qayıtdığını bildirib.
Moldova Parlamentinin sədr müavini Mixail Popşoy Azərbaycan xalqını böyük bayram münasibətilə təbrik edərək, Moldovanın hər zaman ölkəmizin ərazi bütövlüyünü, suverenliyini dəstəklədiyini və bunun qarşlıqlı olduğunu bildirib. O, yaxın gələcəkdə Dnestrayanı münaqişəsinin sülh yolu ilə həll olacağına ümüd ifadə edərək, bunun regionun inkişafına töhfə verəcəyini qeyd edib.
Moldova rəsmisi həmçinin ölkələrimiz arasında inkişaf edən dostluq və əməkdaşlıq münasibətlərindən söz açıb, Moldovada fəaliyyət göstərən Azərbaycan diaspor təşkilatının nümunəvi və aktiv fəaliyyətini vurğulayıb.
Qardaş Türkiyə Respublikasının səfiri Uyqar Mustafa Sertel çıxışında 44-günlük müharibə nəticəsində əldə edilən Qələbəni bütün Türk dünyasının Qələbəsi adlandırıb. O, eyni soykökə, dilə, dinə, mədəniyyətə və tarixi bağlara malik olan xalqlarımızın sevincli, kədərli günlərində hər zaman bir-birinin yanında olduğunu dilə gətirib.
Moldovada tanınmış siyasi analitik Vitaliy Andreevskiy çıxışında Azərbaycanın Qələbəsini tarixi adlandıraraq, əldə edələn Zəfərin güclü lider və xalqın birliyi tandemi əsasında qazanıldığını vurğulayıb.
Daha sonra ürək sözləri ilə Moldovanın Millətlərarası Münasibətlər Agentliyinin sədri Nikolay Reditse, Moldova Azərbaycan Konqresinin sədri Elçin Bayramov, siyasi ekspert Ruslan Şevçenko, diasporun fəal üzvü Maarif Rəhimov və milli diasporlar təşkilatların rəhbərləri çıxış ediblər.
Tədbirin sonunda qonaqlara Azərbaycan mətbəxinin təamları təqdim edilib.
Həmçinin Səfirlikdə Zəfər gününə həsr edilmiş fotolardan ibarət sərgi təşkil olunub.
Musavat.com
XƏBƏR LENTİ
29 Noyabr 2024
ŞƏRHLƏRŞƏRH YAZ