Onlayn ictimai-siyasi qəzet
"Markov Azərbaycan agentidir" - Zatulindən ŞOK AÇIQLAMALAR
Zatulindən Markova qarşı hücum: “Azərbaycan və Türkiyəni təbliğ edir” – Rusiyalı deputatın Bakı və Ankaraya nifrəti yenidən üzə çıxdı
Musavat.com xəbər verir ki, Rusiya Dövlət Dumasının ermənipərəst deputatı Konstantin Zatulin növbəti dəfə Azərbaycana və Türkiyəyə qarşı düşmən münasibətini nümayiş etdirib. Bu dəfə o, siyasi ekspert Sergey Markovu “Azərbaycan və Türkiyənin maraqlarını təbliğ etməkdə” ittiham edərək, onu “xarici agent” kimi tanımağı tələb edib.
Zatulinin ittihamına səbəb Markovun Xankəndidə keçirilmiş Qlobal Media Forumunda iştirakı və forumda Azərbaycan Prezidenti İlham Əliyevin çıxışına müsbət qiymət verməsi olub. Deputat, Markovun “İlham Əliyevi təriflədiyini” və bunun “Rusiya milli maraqları ilə ziddiyyət təşkil etdiyini” iddia edib.
“Markov hazırda xarici agent üçün bütün kriteriyalara cavab verir. Sadəcə bu dəfə amerikalı deyil, Azərbaycan-Türkiyə xarici agentidir”, – deyə Zatulin bəyan edib.
O, həmçinin “Çarqrad” telekanalını da tənqid edib və Markova efir verilməsini “onu yuyub təmizləmək cəhdi” kimi qiymətləndirib.
Musavat.com iki rusun davasında araya girərək xatırladır ki, Zatulin uzun illərdir Azərbaycana qarşı açıq düşmənçilik mövqeyində duran, Rusiyada erməni lobbiçiliyinin baş simalarından biri kimi tanınır. O, Ermənistanın mənafeyini Rusiya parlamentində qorumağa çalışan, dəfələrlə Azərbaycanın suverenliyini və ərazi bütövlüyünü şübhə altına alan çıxışları ilə yadda qalıb. Qarabağ müharibəsinin bütün mərhələlərində – istər 1990-cı illərdə, istərsə də 2020-ci ildə – Zatulin açıq şəkildə Ermənistanın tərəfində yer alıb.
İndi isə Azərbaycanın mədəniyyət paytaxtı Xankəndi-Şuşada keçirilən beynəlxalq forumda iştirak edən və Azərbaycanla Rusiya arasında dialoqu təşviq edən istənilən səsə hücum edir. Sergey Markovun İlham Əliyev haqqında müsbət fikirlər səsləndirməsi və Azərbaycanı Qafqazın lider dövləti kimi təqdim etməsi, görünür, Zatulinin ideoloji allergiyasını yenidən aktivləşdirib.
Əslində isə Markovun addımı – informasiya savaşının qızğın vaxtında Azərbaycanın beynəlxalq mövqeyinin obyektiv qiymətləndirilməsi – Rusiya-Azərbaycan münasibətlərinə töhfədir. Bu cür təşəbbüslər dəstəklənməli olduğu halda, Kremlin ideoloji sərhəddənkənar fiqurları tərəfindən cəza tələbiylə qarşılanır.
Zatulinin “xarici agent” ritorikası absurddur – çünki bu termin Rusiyada adətən Qərb maliyyəsi ilə işləyən təşkilatlara qarşı tətbiq edilir. Markov isə öz şəxsi fikirlərini ifadə edib və Azərbaycan-Türkiyə ilə əməkdaşlığı müdafiə edib.
Musavat.com-a görə Zatulin təkcə Markovu deyil, əslində Rusiyada sağlam düşüncəni, Azərbaycanla əməkdaşlıq istəyənləri hədəf alır. Onun açıqlamaları Moskvanın rəsmi mövqeyini əks etdirməsə də, Kremlin daxilindəki ermənipərəst qüvvələrin hələ də fəal olduğunu göstərir.
Azərbaycan isə bu cür köhnə, ideoloji qərəzlərlə idarə olunan siyasətçilərə diplomatik səviyyədə cavab verir və strateji tərəfdaşlıq münasibətlərini qorumağa davam edir.
Musavat.com
XƏBƏR LENTİ
02 Avqust 2025
ŞƏRHLƏRŞƏRH YAZ