Onlayn ictimai-siyasi qəzet
Kreml İstanbul danışıqlarına hazırdır – Peskov 11 əsas məqamı açıqladı
Rusiya Prezidenti Vladimir Putinin mətbuat katibi Dmitri Peskov Rusiya-Ukrayna danışıqları və digər aktual məsələlərlə bağlı bir sıra mühüm bəyanatlar verib.
Musavat.com xəbər verir ki, Peskov TASS agentliyinə açıqlamasında ilk olaraq Vladimir Putin və ABŞ Prezidenti Donald Tramp arasında görüş məsələsinin hələlik konkret şəkildə müzakirə olunmadığını bildirib. Onun sözlərinə görə, bu mövzu predmetli səviyyəyə çatmayıb.
Peskov həmçinin Ukrayna ilə aparılacaq növbəti danışıqların hansı səviyyədə keçiriləcəyi ilə bağlı hələlik qərar verilmədiyini vurğulayıb. O bildirib ki, Putinin bu danışıqlarda birbaşa iştirak edib-etməyəcəyi barədə danışmaq tezdir.
Rusiya nümayəndə heyətinin artıq İstanbulda olduğunu xatırladan Peskov qeyd edib ki, heyət danışıqların gedişi barədə yalnız zərurət yarandıqda Kremlə hesabat verəcək.
O əlavə edib ki, ötən gün keçirilmiş xüsusi müşavirədə Prezident Putin nümayəndə heyətinin danışıqlarda tutacağı mövqeyi şəxsən müəyyənləşdirib. Bu müşavirədə bütün təqdimatlar və hesabatlar ətraflı şəkildə müzakirə olunub.
Müşavirədə çıxış edənlər arasında Baş nazirin birinci müavini Andrey Belousov və Baş Qərargah rəisi Valeri Gerasimov da olub. Onlar hərbi əməliyyatlar və ümumi vəziyyətlə bağlı hesabatlar təqdim ediblər.
Rusiya sənaye və ticarət naziri Denis Manturov isə iqtisadi durum, müdafiə sənayesi və dövlət müdafiə sifarişlərinin icra vəziyyəti barədə məlumat verib.
Peskov həmçinin Prezident Putinin 11 may tarixli bəyanatında Rusiya və Ukrayna arasında birbaşa danışıqların tərəfdarı olduğunu xatırladıb. Onun sözlərinə görə, Moskva üçün əsas prioritet bu formatın qorunmasıdır.
Xüsusi müşavirədə xüsusi hərbi əməliyyatda iştirak edən bütün bölmələrin komandirləri də öz istiqamətləri üzrə hesabat təqdim ediblər. Bu isə Kremlin diplomatik masa arxasına oturmazdan əvvəl hərbi sahədəki vəziyyəti tam təhlil etdiyini göstərir.
Ukrayna Prezidenti Volodimir Zelenskinin danışıqlarla bağlı qərarını Ərdoğanla görüşdən sonra verəcəyini bildirməsi məsələsinə Peskov şərh verməkdən imtina edib.
Bu açıqlamalar Kremlin danışıqlara genişmiqyaslı hazırlıq apardığını və Moskvanın prosesə yüksək səviyyədə nəzarət etdiyini göstərir.
Musavat.com
ŞƏRHLƏRŞƏRH YAZ