Onlayn ictimai-siyasi qəzet
“Kəlbəcərlilər o günü gözləyir...”
Etibar Seyidağa: “Bu, Kəlbəcər rayonuna ilk daimi köç kimi tarixə düşəcək”
“Qarabağa böyük qayıdış” planı hər keçən gün uğurla icra olunmaqdadır. Son olaraq, ölkənin siyasi rəhbərliyi tərəfindən bu yolda atılan addımlar xüsusi alqışlarla qarşılanır.
Bugünlərdə Cənab Prezident İlham Əliyev və ölkənin birinci xanımı Mehriban Əliyeva Kəlbəcər rayonuna səfər etdi. Ali Baş Komandan Kəlbəcər rayonunda İstisu qəsəbəsinin təməlini qoydu. Kəlbəcərin möcüzəli, şəfa qaynağı olan İstisu bulağının artıq istehsalına başlanılıb və bütün bölgələrimizdə bu suyun satışı həyata keçirilir. Marketlərdə "İstisu"yu əldə etmək üçün növbələr yaranıb. Bu da Azərbaycan insanının doğma torpağa bağlılığının bir daha əyani sübutudur.
Ötən həftə Şuşa şəhərinə də 2 köç karvanı yola salındı. Prezidentin tapşırığına uyğun olaraq respublikanın müxtəlif ərazilərində yataqxana, sanatoriya, pioner düşərgəsi, yarımçıq tikililər və inzibati binalarda müvəqqəti məskunlaşmış ailələrdən ibarət köç karvanları sentyabrın 5-i və 7-də Bakı şəhərinin Qaradağ rayonundan yola salındı. Birinci köç karvanı ilə Şuşa şəhərinə 30 ailə - 102 nəfər, ikinci karvanla isə 27 ailə - 91 nəfər köçürüldü.
Kəlbəcərli jurnalist Etibar Seyidağa “Yeni Müsavat”a bildirib ki, hər keçən gün onların doğma yurda köçəcəyi günü yaxınlaşdırır: “İlham Əliyevin rəhbərliyi ilə ordumuzun düşmən üzərində qazandığı şanlı Qələbə nəticəsində işğaldan azad edilən digər ərazilərimizdə olduğu kimi, Kəlbəcərə də həyat yenidən qayıdır. Möhtərəm Prezidentimiz və birinci xanım Mehriban Əliyeva Kəlbəcər rayonuna və işğaldan azad edilmiş digər rayon və şəhərlərə mütəmadi səfərlər edirlər. Prezidentimizin bu səfərlər zamanı bəzi müəssisələrin açılışında, habelə obyektlərin təməlqoyma mərasimində iştirakı o deməkdir ki, həmin rayonların sosial-iqtisadi həyatında çox böyük dirçəliş baş verir. Bu, bölgələrimizdə həyatın sürətli qayıdışından, inkişafdan xəbər verir. Möhtərəm Prezidentimizin bu yaxınlarda imzaladığı sərəncama əsasən, Kəlbəcər rayonunun yenidən qurulması, sosial-iqtisadi inkişafının təmin edilməsi üçün vəsaitin ayrılması da çox diqqətçəkən məqamdır. Qısa zamanda böyük sənaye müəssisələrinin, turizm və kənd təsərrüfatı obyektlərinin, hotel və mehmanxanaların, məktəb və xəstəxanaların inşası dövlətimizin iqtisadi gücünün göstəricisidir”.
Tanınmış jurnalist onu da qeyd etdi ki, ölkə Prezidenti İlham Əliyev və birinci vitse-prezident Mehriban xanım Əliyevanın Kəlbəcərə sonuncu səfərlərində “İstisu” Mineral Su Zavodunun açılışının edilməsi Kəlbəcərdə həyata keçirilən quruculuq prosesinin yeni bir mərhələsi oldu: “İstehsal müəssisələrinin qurulması və işə salınması o deməkdir ki, sakinlər Kəlbəcərdə iş yerləri ilə təmin olunmaqda çətinlik çəkməyəcəklər. Prezident İlham Əliyev sentyabrın 2-də Kəlbəcər şəhərində ikinci yaşayış kompleksinin təməlini qoydu. Onu da qeyd edim ki, Kəlbəcər rayonunda Azərbaycan Respublikası Prezidentinin xüsusi nümayəndəsinin təyinatından sonra Kəlbəcərdə quruculuq işlərində nəzərəçarpacaq sürət və canlanma müşahidə edilir. Bunu rayona tez-tez səfərə gedib-gələn sakinlər müşahidə edirlər və bizimlə təəssüratlarını bu şəkildə bölüşürlər.
Kəlbəcərdə böyük müasir təhsil kompleksinin inşası gedir. Bu da dövlət başçımızın Kəlbəcərə köçəcək şagirdlərin yüksək səviyyədə təhsil almasına diqqətinin nümunəsidir.
Artıq Kəlbəcər şəhərində birinci yaşayış kompleksi demək olar ki, hazır vəziyyətdədir və sakinlərini gözləyir. Yəqin ki, yaxın zamanlarda oraya əhalinin köçürülməsi başlayacaq. Bu, Kəlbəcər rayonuna ilk daimi köç kimi tarixə düşəcək. Sakinlər o günü səbirsizliklə gözləyir. Cənab Prezident səfərində İstisu qəsəbəsinin də təməlini qoydu. Əminik ki, qəsəbə işğaldan əvvəlki dövrdə olduğundan da gözəl, müasir yaşayış massivi olacaq.
Onu da deməyi vacib bilirəm ki, Azərbaycanın işğaldan azad edilmiş bölgələrinə həyat qayıdır. Bu sırada Şuşaya sakinlərin köçürülməsi davam edir. Ötən həftə sakinlərin doğma evlərinə qayıdışı ilə yanaşı daha bir sevindirici hadisə baş verdi. Şuşada 32 ildən sonra ilk toy keçirildi. Bu hadisə ilə Şuşa sakinləri olan gənclərin ən xoş günü bütün azərbaycanlıların xoş gününə çevrildi. Bundan sonra Şuşa ilə yanaşı bütün işğaldan azad edilmiş şəhər və kəndlərimizdə bu cür toy şənlikləri keçiriləcək. Əhalinin qayıdışı prosesi davam etdikcə, həmin bölgələrimizdə həyat işğaldan öncəki dövrlərdəki kimi qaynar olacaq".
Yazını hazırladı: Cavanşir ABBASLI
XƏBƏR LENTİ
19 Sentyabr 2024
ŞƏRHLƏRŞƏRH YAZ