Onlayn ictimai-siyasi qəzet
ABŞ Kanada və Meksikaya qarşı əlavə tarif tətbiq etmədi
ABŞ-ın qarşılıqlı əsasda tarifləri tətbiq etməsi Vaşinqtona öz milli borcunu tez bir zamanda ödəməyə imkan verəcək.
Musavat.com xəbər verir ki, bunu ABŞ prezidenti Tramp Ağ Evin Gül bağında idxal rüsumlarının tətbiqinə dair mətbuat konfransında deyib: “Biz trilyonlarla dollar gəlir əldə edəcəyik və onu dövlət borcunun ödənməsinə yönəldəcəyik. Bu, qısa zamanda baş verəcək”.
Trampın açıqladığı sənəddən aydın olur ki, ən yüksək tariflər 49 faiz olmaqla Kambocaya qarşı tətbiq olunur. Ondan sonra 46 faizlə Vyetnam, 34 faizlə Çin, 20 faizlə Avropa İttifaqı gəlir.
ABŞ prezidenti bu tariflərin həmin ölkələrin ABŞ mallarına tətbiq etdikləri tariflərin yarısı qədər olduğunu desə də, hesablamanın nə vaxt aparıldığını, hansı konkret rəqəmlərə əsaslandığını açıqlamayıb.
Ağ Evin qərarına əsasən universal 10 faizlik bütün mallara tətbiq olunan minimum rüsum aprelin 5-də, fərdi tariflər isə aprelin 9-da qüvvəyə minəcək. Ekspertlərə görə, müddətin belə müəyyənləşdirilməsi 10 faizdən yuxarı dərəcələrin tətbiq olunduğu ölkələrə danışıqlar üçün vaxt verilməsinə bənzəyir.
Hələlik tariflərdən yeganə istisna Trampın ilk dövründə imzalanmış ABŞ-Kanada-Meksika azad ticarət Sazişinin tərəfləri olan Kanada və Meksika malları üçün olacaq.
Musavat.com
XƏBƏR LENTİ
03 Aprel 2025
ŞƏRHLƏRŞƏRH YAZ