Onlayn ictimai-siyasi qəzet
Hakim partiyadan Paşinyanın İSTEFASI barədə AÇIQLAMA
“Baş nazir Nikol Paşinyanın istefası nəzərdən keçirilmir”.
Musavat.com xəbər verir ki, bunu Ermənistanda hakim “Vətəndaş Müqaviləsi” partiyasının sədr müavini Vaaqn Aleksanyan brifinqdə deyib.
Onun sözlərinə görə, fraksiya növbədənkənar parlament seçkilərinin keçirilməsi imkanını da istisna edir.
“Növbədənkənar parlament seçkilərinin gündəliyi yoxdur. Müxalifət mandatlarından imtina etsə belə, bu, növbədənkənar seçkilərə səbəb olmayacaq. Müxalifətin baş nazirin impiçment prosesinin başlanması ilə bağlı bəyanatına gəlincə, o, buna başlaya bilməyəcək, başlasa, uğursuzluğa düçar olacaq.
Mən təsəvvür edə bilmirəm ki, biz Paşinyanın istefası məsələsini niyə müzakirə etməliyik? Ölkədə siyasi böhran yoxdur”, - deyə Vaaqn Aleksanyan qeyd edib.
Xatırladaq ki, mayın 9-da Ermənistanda etirazlar başlayıb. “Vətən naminə Tavuş” müxalifət hərəkatının lideri, arxiyepiskop Baqrat Qalstanyanın sözlərinə görə, Paşinyanın rəhbərlik etdiyi hökumət ölkəni idarə etməkdə səmərəsiz olduğunu sübut edib.
Mayın 13-də İrəvanda 113 etirazçı saxlanılıb. Respublika Daxili İşlər Nazirliyinin mətbuat xidmətindən verilən məlumata görə, aksiya iştirakçıları polis bölmələrinə aparılıb. Həmçinin aksiyalar zamanı təhlükəsizlik qüvvələrinin həm etirazçılara, həm də jurnalistlərə qarşı güc tətbiq etdiyi iddia edilir. Xüsusilə, yerli “24 News” portalının müxbiri huşunu itirib, “ABC Media” portalının operatoru isə xəsarət alıb. Bundan başqa, polis jurnalistlərin avadanlığına da ziyan vurub.
Nikol Paşinyan isə daha öncə bəyan etmişdi ki, İrəvan və Bakı sülh prosesini təsəvvür edə bilməzlər, çünki onlar bunun nə olduğunu bilmirlər. Onun sözlərinə görə, vəziyyət bir vaxtlar inanılmaz görünən kosmik uçuşlara bənzəyir.
Nigar Həsənli,
Musavat.com
XƏBƏR LENTİ
29 Noyabr 2024
ŞƏRHLƏRŞƏRH YAZ