Onlayn ictimai-siyasi qəzet
Göyçaya səs salan qiraət müsabiqəsi – AVCİYA-nın mühüm layihəsi
Azərbaycanda Vətəndaş Cəmiyyətinin İnkişafına Yardım Assosiasiyası (AVCİYA) Elxan Süleymanovun təşəbbüsü ilə növbəti uğurlu layihəsini reallaşdırıb.
Musavat.com xəbər verir ki, indiyədək ictimai, mədəni, təhsilə dəstək yönündə onlarla layihə icra etmiş AVCİYA bu dəfə Azərbaycan ədəbiyyatının görkəmli nümayəndələri, əslən göyçaylı olan ədiblər - Rəsul Rza, İsgəndər Coşqun, Əli Kərim və İbrahim Göyçaylının yaradıcılığına həsr edilmiş Birinci bədii qiraət müsabiqəsini həyata keçirib.
Göyçay məktəbliləri arasında keçirilən bədii qiraət müsabiqəsi bir neçə mərhələdə baş tutub. Hazırlıq mərhələsində - 2024-cü ilin dekabrından etibarən 2025-ci ilin aprelinədək ədəbiyyat müəllimləri məktəblərdə şagirdləri müsabiqə üçün hazırlayıblar.
Daha sonra tədris müəssisələrində və rayon səviyyəsində sınaq mərhələləri olub.
Müşahidələrimiz onu göstərirdi ki, müsabiqə bütün rayona səs salıb, şagirdlərin fəallaşmasına, ədəbiyyata, poeziyaya marağın yüksəlməsinə səbəb olub.
Yüzlərlə şagird müsabiqədə özünü sınayıb, nəhayət son seçim turunda ən bacarıqlı və ən istedadlı uşaqlar mütəxəssislərdən ibarət Münsiflər Heyəti tərəfindən qalib seçiliblər.
Münsiflər Heyətinin sədri xalq artisti, qiraət ustası Nurəddin Mehdixanlı, üzvləri xalq artisti Tariyel Qasımov, filoloq, professor Asif Hacıyev, pedaqoq, şair, 30 il direktor işləmiş, hazırda “Göyçay” qəzetinin baş redaktoru olan Adil Məmmədov, şair Ətraf Sərraf və Göyçay şəhəri 4 saylı tam orta məktəbin dil-ədəbiyyat müəllimi Tahirə Əsədovadır.
Seçim turu mayın 26-da başa çatdı və 27 mayda Göyçay rayonu Heydər Əliyev Mərkəzində baş tutan təntənəli tədbirdə qaliblər elan olundular.
Tədbir başlamazdan əvvəl Elxan Süleymanov və Münsiflər Heyəti, qonaqlar Ümummilli Lider Heydər Əliyevin abidəsini, habelə Əli Kərim adına parkda göyçaylı ədiblərin xatirəsinə ucaldılmış abidələri ziyarət etdilər.
Daha sonra Heydər Əliyev Mərkəzində tədbir başladı. Mərasimi açıq elan edən və qonaqları salamlayan Göyçay rayon İcra Hakimiyyəti başçısının müavini Zivər Zeynalova 28 may Müstəqillik Günü ərəfəsində baş tutan bu tədbirin Göyçay ictimiyyəti, təhsil sektoru üçün xüsusi önəmi olduğunu bildirdi.
Daha sonra çıxış edən AVCİYA prezidenti Elxan Süleymanov Ulu Öndər Heydər Əliyevin, Prezident İlham Əliyevin, Birinci vitse prezident Mehriban Əliyevanın daim təhsilə xüsusi diqqət göstərdiklərini bildirdi:
“Təhsilə, gələcəyimizə dəstək müqəddəs işdir. Mən də dövlətimizin ali rəhbərliyinin siyasətinin əsgəri kimi, habelə maarifçi babam Hacı Rəhim Əfəndinin irsini davam etdirərək, təhsilimizə daim diqqət göstərmişəm. Hələ 1991-94-cü illərdə Göyçayda əlaçı şagirdlərə Hacı Rəhim Əfəndi təqaüdü vermişəm, millət vəkili olduğum 9 ildə AVCİYA Şamaxıda davamlı olaraq Mirzə Ələkbər Sabirin yaradıcılığına həsr olunmuş bədii qiraət müsabiqələri təşkil edərək, uğurla həyata keçirib.
Şamaxılı şagirdlər bu müsabiqələr sayəsində böyük Azərbaycan şairinin yaradıcılığının məzmun və forma xüsusiyyətlərini daha dərindən mənimsəmiş, nitq və bədii qiraət vərdişlərini inkişaf etdiriblər, poeziyaya daha sıx bağlanıblar. Şamaxıda, Göyçayda məktəblər tikdirmişəm, yüzlərlə şagirdə təqaüdlər vermişəm. Habelə, 2024-cü ildə Göyçayda hər məktəbdən 1 nəfər olmaqla, 56 şagirdə əlaçı təqaüdü vermişəm və bu il də, növbəti illərdə də onu təkrarlayacağıq. Bu gün isə həyata keçirdiyimiz qiraət müsabiqəsinin qaliblərini mükafatlandırmaq üçün buradayıq. Biz verdyimiz bütün vədlərə əməl etmişik və edəcəyik. Ömrüm boyu bu cür layihələrlə qarşınızda olacam, məndən sonra da bu irsi övladlarım davam etdirəcək”.
Münsiflər Heyətinin sərdi Nurəddin Mehdixanlı seçim zamanı kifayət qədər gərgin işlədiklərini bildirdi:
“Göyçayda xeyli sayda istedadlı uşaqlarla rastlaşdıq. Biz ədalət prinsiplərini, vicdanı üstün tutuaraq, bu şagirdlər içərisindən ən layiq olanları qalib elan etdik. Elxan Süleymanovun həyat və yaradıcılığı ilə daha yaxından tanış oldum, bu da böyük bir nəsibdir. Göyçayda, ölkəmizdə Elxan Süleymanovdan qat-qat geniş imkanları, pulu, sərvəti olan insanlar var. Amma bu kişi əldə etdiyi vəsaitləri təhsilə, bu cür mədəni müsabiqələrə, gələcəyimizin inkişafına sərf edir. Xalqımızın balalarını təhsilə, elmə həvəsləndirir. Siz təsəvvür edin, bu uşaqların gələcəyə ümidlərini nə qədər artırır bu cür əməlləri ilə”.
Xalq artisti Tariyel Qasımov bildirdi ki, ölkəmizin gələcəyi naminə bu cür xeyirxah layihələr xüsusi önəm kəsb edir:
“Övladlarımızda sabaha inam yaratmaq cənnəti bu dünyada qazanmaq deməkdir”.
Çıxışlardan sonra qiraət müsabiqəsinin qalibləri elan olundu və Elxan Süleymanov onlara diplom, pul mükafatlarını şəxsən təqdim etdi, xatirə şəkilləri çəkdirildi.
Sonda Elxan Süleymanov xüsusi bir təqdimat da etdi:
“Burada bizim müsabiqəyə fəxri iştirakçı kimi qatılan bir balamız da var: 1992-ci ildə Hacı Rəhim Əfəndi təqaüdünü alan göyçaylımız, tanınmış jurnalist Elşad Məmmədlinin qızı, Ceyranbatan qəsəbəsi 1 saylı orta məktəbdə təhsil alan Aytək Məmmədli Göyçayda belə bir şeir müsabiqəsinin keçirildiyini bilib. Bu balamız mənə müraciət etdi ki, onun da bu müsabiqədə iştirakına şərait yaradaq. Bizim fəxri iştirakçımız qismində o da özünü sınayıb”.
Daha sonra A.Məmmədli İsgəndər Coşğunun “Gecikərsən” şeirini səsləndirib, Münsiflər Heyətinin qərarı ilə diploma, mükafata layiq görülüb.
Ümumilikdə müsabiqədə 1 nəfər Qran-pri, 3 nəfər 1-ci yer, 3 nəfər 2-ci yer, 3 nəfər 3-cü yer, 9 nəfər isə həvəsləndirici mükafata layiq görülüb.
Musavat.com
XƏBƏR LENTİ
30 May 2025
29 May 2025
ŞƏRHLƏRŞƏRH YAZ