Onlayn ictimai-siyasi qəzet
Ermənistan parlamentinin müxalifətçi komissiya sədri qovuldu
Ermənistan parlamentində müxalifətdən olan yeganə komissiya sədri vəzifədən uzaqlaşdırılıb.
Musavat.com erməni mediasına istinadən xəbər verir ki, hakim partiyanın parlament fraksiyası gizli səsvermə zamanı deputat Taquhi Tovmasyanı Ermənistan parlamentinin İnsan hüquqlarının müdafiəsi və ictimai məsələlər üzrə daimi komissiyasının sədri səlahiyyətlərindən məhrum edib.
62 deputat onun vəzifədən uzaqlaşdırılmasının lehinə, 1 millət vəkili isə əleyhinə səs verib. Müxalifət deputatları səsverməni boykot ediblər.
Xatırladaq ki, bundan əvvəl hakim “Vətəndaş sazişi” partiyasının parlament fraksiyası Milli Assambleyanın sədri Alen Simonyana Tovmasyanın səlahiyyətlərinə xitam verilməsi təklifi ilə müraciət etmişdi. Fraksiya Tovmasyanı parlamentin 46 iclasından yalnız 8-də iştirak etməkdə, həmçinin komissiyanın işini əlaqələndirmək vəzifəsini yerinə yetirməməkdə suçlayıb.
Qeyd edək ki, Taquhi Tovmasyana qarşı kampaniya Ermənistanın ombudsmanının seçilməsindən sonra başlayıb. Həmin vaxt erməni deputat müxalifətin namizədi Edqar Kazaryanın tərəfini tutduğunu gizlətməyib.
Musavat.com
XƏBƏR LENTİ
25 Noyabr 2024
ŞƏRHLƏRŞƏRH YAZ