Onlayn ictimai-siyasi qəzet
Elçin Əmirbəyovdan KRİTİK sülh AÇIQLAMASI - "Çox yaxınıq, amma..."
Azərbaycan Ermənistanla münaqişənin bitməsindən sonra kritik vəziyyətə gələn minalardan təmizləmə işlərində Koreyadan əlavə dəstək istəyir.
Musavat.com xəbər verir ki, bunu Prezidentin xüsusi tapşırıqlar üzrə nümayəndəsi Elçin Əmirbəyov “The Korea Times” qəzetinə müsahibəsində deyib.
Onun sözlərinə görə, müharibə dövründə Ermənistan Azərbaycan ərazisinin böyük bir hissəsini mina və partlamamış hərbi sursatlarla güclü şəkildə çirkləndirib:
"Koreyanın bizə kömək edəcəyini gözlədiyimiz başqa bir böyük sahə minalardan təmizləmə məsələsidir. Çünki münaqişənin təsirinə məruz qalmış ərazimizin 12 faizi minalar və partlamamış hərbi sursatlarla güclü şəkildə çirkləndirilib. Dörd ilə yaxındır ki, atəşkəs rejiminin qüvvədə olmasına baxmayaraq, Azərbaycan çirklənmiş ərazilərin cəmi 13 faizini təmizləyə bilib, 87 faizi isə hələ də təhlükə olaraq qalır".
Elçin Əmirbəyov qeyd edib ki, bu illər ərzində Azərbaycan ermənilərin yerləşdirdiyi 1,5 milyon mina ilə mübarizə aparır:
"Ermənistan mina xəritələrini verməkdən imtina edir, ona görə də bu minaların harada cəmləşdiyini biz bilmirik, bu da getdikcə artan insan itkisinə səbəb olur. Atəşkəsdən bu günə kimi mina qurbanlarının sayı 377-yə çatıb. Onlardan 69-u dünyasını dəyişib. Bu gün 378-ci şəxs minaya basdığı üçün yaralanıb".
Prezidentin xüsusi nümayəndəsi vurğulayıb ki, bu həm insan təhlükəsizliyi məsələsi, həm də böyük humanitar problemdir, çünki hökumət 800 min məcburi köçkünü öz evlərinə qaytarmağı hədəfləyir:
"İndiyədək biz cəmi 8000 insanı geri qaytara bilmişik, çünki ərazilər güclü şəkildə minalanıb. Torpağın təhlükəsiz olduğuna əmin olmadan insanları geri qaytara bilmərik".
E.Əmirbəyov digər ölkələrdə, Laos, Vyetnam və Kambocada oxşar təşəbbüsləri dəstəkləmək sahəsində güclü təcrübəsinə baxmayaraq, Koreyanın hələ də Azərbaycanın minalardan təmizləmə işlərində aparıcı donor olmamasından məyus olduğunu bildirib:
"Sizin əziyyət çəkən digər ölkələrə kömək etməkdə çox yaxşı təcrübəniz olduğuna inanırıq. Ümid edirik ki, Koreya hökuməti bizə daha güclü dəstək göstərməyə davam edə bilər, çünki bu, münaqişədən sonrakı sülh quruculuğu səylərinə kömək etməkdir”.
Əmirbəyov qeyd edib ki, potensialın artırılması və avadanlıqlar üçün maliyyə dəstəyi çox vacibdir:
"Minalardan təmizləmə sahəsində texnologiyalar çox sürətlə inkişaf edir. İndi uzaqdan minaları aşkar edə bilən dronlar kimi xüsusi avadanlıqlarımız var".
Elçin Əmirbəyov həmçinin Koreya ilə regional təhlükəsizlik məsələlərinin müzakirəsinin vacibliyini qeyd edib:
"Biz fikirləşdik ki, koreyalı tərəfdaşlarımız və həmkarlarımız üçün Ermənistan və Azərbaycan arasında sülh prosesinə Azərbaycan nöqteyi-nəzərindən baxmaq və paytaxtlarımız arasında bu məsələ ilə bağlı kommunikasiya kanalları yaratmaq maraqlı olacaq".
E.Əmirbəyov Ermənistan-Azərbaycan sülh prosesi ilə bağlı Koreyanın BMT Təhlükəsizlik Şurasındakı rolu barədə suala cavabında hər iki ölkənin ikitərəfli danışıqlar formatına üstünlük verdiyinə aydınlıq gətirib:
"Biz Ermənistanla sülh sazişini yekunlaşdırmağa çox yaxınıq, lakin bu sülhün davamlı olmasını təmin etməliyik. Qalan maneə Ermənistanın Azərbaycanın bir hissəsinə konstitusion ərazi iddiasıdır. Bu həll edildikdən sonra irəli gedə bilərik".
Prezidentin xüsusi nümayəndəsi Koreya-Azərbaycan münasibətlərinin strateji əhəmiyyətini vurğulayaraq, enerji, ticarət və regional təhlükəsizlik sahələrində əməkdaşlığın genişləndirilməsi potensialından danışıb:
"Birincisi, bu, ölkələrimiz arasında siyasi dialoqu davam etdirmək üçün yaxşı fürsətdir. Biz Koreya Respublikasını bu regionda əsas tərəfdaş hesab edirik və enerji kimi ənənəvi əməkdaşlıq sahələrindən kənara çıxmaq və yeni sahələri kəşf etmək üçün əhəmiyyətli potensial var".
Elçin Əmirbəyov Azərbaycanın külək, günəş və su enerjisi ehtiyatlarına diqqət çəkərək bildirib ki, Azərbaycan Koreyaya müxtəlif mədən yanacaqları, o cümlədən neft məhsulları və LNG ixrac edir. Lakin bərpa olunan enerji sahəsində əməkdaşlıq üçün istifadə edilməmiş potensial mövcuddur.
O, Asiya ilə Avropa arasında mühüm ticarət yolları üzərində yerləşən Azərbaycanın geoiqtisadi əhəmiyyətini qeyd edib:
"Hazırkı geosiyasi kontekstdə Rusiya və Ukrayna arasındakı münaqişənin ənənəvi marşrutlara təsir etməsi ilə qədim İpək Yolunu təkrarlayan Orta Dəhliz əhəmiyyət kəsb edir. Biz bunu Koreya logistika şirkətləri ilə potensial əməkdaşlıq üçün mühüm sahə kimi görürük".
Ticarətə gəlincə, Elçin Əmirbəyov 2024-cü ilin birinci yarısında ikitərəfli ticarət dövriyyəsinin 200 milyon dolları ötdüyünü açıqlayıb, lakin daha çox potensialın olduğunu vurğulayıb.
Musavat.com
ƏLAQƏLİ XƏBƏRLƏR
XƏBƏR LENTİ
20 Sentyabr 2024
19 Sentyabr 2024
ŞƏRHLƏRŞƏRH YAZ