Onlayn ictimai-siyasi qəzet
Deputat Kamal Cəfərov: "Əli Kərimli və AXCP də qondarma rejim kimi özünü buraxsın!"
Əli Kərimlinin Toplum TV-yə sonuncu müsahibəsi göstərir ki, o, ermənilərdən daha tez reinteqrasiya olub. O, deyir ki, uzun müddət düşmən olsaq da, etiraf etmək lazımdır ki, Ermənistan Hökuməti demokratikdir. Əli Kərimliyə tövsiyə edirəm ki, xəbər saytlarını açıb oxusun və görsün ki, Ermənistanda müxalifət liderinin oğlu həbs edilir, biri döyülür, minlərlə dinc insana qarşı həddindən artıq yersiz güc tətbiq edilir.
Əli Kərimli Ermənistan Baş Naziri Paşinyanı elə ürəkdən tərifləyir ki, deyir Paşinyan çoxlarının gözlədiyindən daha hazırlıqlı siyasətçi çıxdı. Az qalır desin ki, 24 saatlıq antiterror tədbirləri də Paşinyanın uğurudur.
İkincisi, Əli Kərimli bildirir ki, Sarkisyan, Koçəryan gəldi Ağdamı, Fizulini, Zəngilanı aldı. Fəaliyyətlərində o qədər alqı-satqıya öyrəşiblər ki, dilləri də öyrəşib. Bəs biz deyəndə AXC-Müsavat cütlüyü hakimiyyətə gəlmək üçün torpaqlarımızı satıb, onda niyə vay-şüvən salırdınız? Bir halda Ermənistana qarşı nəyisə etiraf edirsinizsə, bizim xalqa da etiraf edin ki, torpaqlarımızı satmısınız.
Üçüncüsü, Əli Kərimli deyir ki, Avropa İttifaqı Şurası Ermənistanı məcbur edib, o da Azərbaycanın ərazi bütövlüyünü tanıyıb və Praqa görüşü ilə Qarabağ məsələsi həll olunub. Yəni, gərək Azərbaycan antiterror tədbirlərini keçirməzdi. O iddia edir ki, zamanla onsuz da Qarabağdakı suverenliyimiz bərpa olacaqdı.
Əli Kərimli, əgər beynəlxalq təşkilatlar və ya Qərb paytaxtları Qarabağ problemi həll etsəydi, 30 il ərzində həll edərdi. Bütün Azərbaycan xalqı AŞPA-nın, Avropa Parlamentinin və ATƏT-in Minsk Qrupunun riyakarlığını bilir. Qarabağ problemini Lider, Xalq və Dövlətin vəhdəti olan dəmir yumruq həll elədi!
Onun istinad etdiyi Praqa görüşündə isə Ermənistanın israrlı xahişi əsasında Fransa da iştirak edirdi. İndi elə çıxır ki, Ermənistanın böyük bacısı Fransa Paşinyanı məcbur edib, Azərbaycanın ərazi bütövlüyünü tanımağa? Bu çox gülünc arqumentdir.
Bu həqiqətdir ki, Fransa və Ermənistan Praqa görüşündən tamamilə başqa nəticələr əldə etmək istəmişdi. Ancaq Prezident İlham Əliyev 5 saat davam edən danışıqlarda Fransa Prezidenti Makronun əli ilə Ermənistanı diplomatik müstəvidə məğlub edib. Reallıq budur - İlham Əliyev diplomatiyası!
Əli Kərimli da bunu çox yaxşı anlayır, sadəcə dili gəlmir deməyə, ürəyi gəlmir etiraf etməyə. Bir adam ki deyə, Qarabağ elə də böyük zəfər deyil, ondan başqa nə gözləmək olar.
AXCP və Qarabağdakı qondarma rejim demək olar ki, eyni dövrdə yaranıb. Necə ki, erməni millətçiləri, müharibə cinayətkarları, Ermənistanın və Qarabağın dırnaqarası rəhbərləri o insanları girov götürmüşdü, onların beyinlərini zəhərləmişdi, Azərbaycan haqqında, Azərbaycan xalqı haqqında olmazın yalanlarını uydurub onların beyinlərinə doldurmuşdur, onların beyinlərini zəhərləmişdi. Elə eynisini AXCP edir, 5 min nəfəri girov götürüb, xalqımız və dövlətimiz haqqında yalanlar danışır. Onların beyinlərini zəhərləyirlər. Ona görə təklif edirəm: necə ki, qondarma rejim məcbur olub özünü buraxdı, AXCP və Əli Kərimli də özünü buraxsın. Həmin 5 min nəfər də yığışıb gedib Əli Kərimlinin villasından Azərbaycan bayrağı assınlar. Ümid edirəm Əli Kərimli buna etiraz etməz!
Kamal Cəfərov, Millət vəkili
XƏBƏR LENTİ
24 Noyabr 2024
23 Noyabr 2024
ŞƏRHLƏRŞƏRH YAZ