Onlayn ictimai-siyasi qəzet
Bu şəxsi sənədlər rəqəmsal formada qəbul edilə bilər
“Ötən gün Milli Məclisin komitəsində çox əhəmiyyətli, 15 il gözlənilən bir məsələ nəhayət ki müzakirəyə çıxarıldı. Söhbət ölkəmizdə aşağıdakı sənədlərin rəqəmsal versiyasının hazırlanmasından gedir :
- Şəxsiyyət vəsiqəsi,
- Nikah şəhadətnaməsi,
- Doğum haqqında şəhadətnamə,
- Ölüm haqqında şəhadətnamə,
Xatırladıram ki, hazırda bir çox hökumət saytlarında, portallarda, MyGov-da bu qeyd olunanlarla bağlı nələrisə elektron formada tapmaq olar. Amma problem ondadır ki, həmin resurslarda olan bu sənədlər haqqında məlumatlar, sadəcə məlumat xarakteri daşıyırdı.
Musavat.com xəbər verir ki, bu fikirləri Azərbaycan İnternet Forumunun Prezidenti Osman Gündüz sosial media hesabında yazıb.
O qeyd edib ki, bu günə kimi hansısa dövlət qurumuna “MyGov”dakı bu məlumatları göstərərkən, onun məlumat deyil, rəqəmsal sənəd olaraq qəbul edilməsi ehtimalı sıfıra yaxın idi: “Ola bilər yalnız bəzi mütərəqqi fikirli məmurlar bunu sənəd olaraq qəbul edə bilərdilər.
İndi isə Milli Məclisin komitəsində müzakirə olunan qanunlara dəyişikliklərdə söhbət ondan gedir ki, yuxarıda adı çəkilən sənədlər haqqında telefonunuzdakı “MyGov” tətbiqində olan məlumatlar artıq rəqəmsal sənəd statusuna malik olacaq. Yəni siz telefonu çıxarıb “MyGov”da şəxsiyyət vəsiqəniz haqqında məlumatı təqdim edəndə qarşı tərəf onun məlumat yox, sənəd olaraq qəbul edəcək”.
Ekspert xatırladıb ki, bu məsələ ölkədə rəqəmsal hökumət quruculuğuna sistemli formada başlanan 2010-cu illərdən bu yana həmişə müzakirə predmeti olub: “Qonşu ölkələr bu mərhələni keçiblər. Xatırlayıram ki Qazaxıstan vətəndaşlarının mobil telefonunda 20+ sayda sənədin rəqəmsal versiyası var. Ümid edirəm İRİA rəqəmsal transformasiyanı daha da sürətləndirəcək. “eGov” səlahiyyətləri ASAN-da olarkən çox çalışdılar bu məsələni həll etsinlər, lakin açıq demək lazımdır ki, öhdəsindən gələ bilmədilər. RİNN-nin, İRİA-nın bu məsələni nəhayət gündəmə gətirməsi deyərdim ki böyük hadisədir və çox təqdirəlayiqdir. Bildirmək istərdim ki üzdə görünən cəmi 4 qanuna dəyişiklik olsa da, bu kağız sənədlərin rəqəmsala çevrilməsi üçün İRİA təxminən 230-dan çox fərman və sərəncamlara, hökumət qərarlarına da dəyişiklikləri hazırlayıb və hökumətə təqdim edib. Ümid edirəm Milli Məclis tez bir zamanda qanunlara dəyişiklikləri təsdiqləyəcək.
Beləliklə proses başa çatandan sonra vətəndaşın cibində, yaxud portmanatında qeyd olunan kağız sənədləri daşımağa ehtiyac qalmayacaq, o, istənilən dövlət və ya özəl quruma, istənilən məmura yaxınlaşanda sadəcə telefonunu çıxarmaqla ən azı 4 sənədi təqdim edə biləcək”.
Ekspert əlavə edib ki, bundan sonra ölkədə rəqəmsal transformasiya prosesləri hədsiz dərəcədə yüksələcək, məmur vətəndaş münasibətləri daha da rəqəmsallaşacaq, xidmətlər daha rahat formada əldə olunacaq və təmassız olacaq.
Nigar HƏSƏNLİ,
Musavat.com
XƏBƏR LENTİ
28 Noyabr 2024
ŞƏRHLƏRŞƏRH YAZ