Onlayn ictimai-siyasi qəzet
Bəhreyn qəzetində XI Qlobal Bakı Forumunun əhəmiyyəti barədə məqalə dərc edilib
Bəhreynin “The Daily Tribune” qəzetində Azərbaycanın Səudiyyə Ərəbistanı və Bəhreyndəki səfiri Şahin Abdullayevin Prezident İlham Əliyevin himayəsi, Nizami Gəncəvi Beynəlxalq Mərkəzinin təşkilatçılığı ilə keçirilən XI Qlobal Bakı Forumu ilə bağlı məqaləsi dərc olunub.
“Report”un xəbərinə görə, materialda diplomat diqqəti Qlobal Bakı Forumunun xüsusi təcrübəyə və müdrikliyə malik olan, təhlükələri azaltmaq və vədləri həyata keçirmək üçün bəşəriyyəti narahat edən məsələlərdə öz sözünü deyə bilən məşhur insanları birləşdirən unikal məkan olduğuna diqqət yetirir.
Bildirilib ki, “Parçalanmış dünyanın bərpası” (“Fixing The Fractured World”) mövzusuna həsr olunan XI Qlobal Bakı Forumuna bir çox ölkələrin, eləcə də nüfuzlu beynəlxalq təşkilatların nümayəndələri qatılıblar. Forumda 70-dən artıq ölkədən 350-dən çox qonaq iştirak edib.
Səfir Ş.Abdullayev öz məqaləsində onu da vurğulayıb ki, forum çərçivəsində bəşəriyyətin üzləşdiyi problemlərin həlli yolları müzakirə olunub, dünyanı silkələyən münaqişələr və təhdidlərə, o cümlədən iqlim problemlərinə, ərzaq və nüvə təhlükəsizliyinə toxunulub.
Qeyd olunub ki, forumda həmçinin hərbi və iqtisadi ittifaqların qlobal idarəçilikdə rolu, regional perspektivləri, Avropa İttifaqı və onun qonşuları ilə münasibətləri, gənclər siyasəti, qlobal çağırışlara davamlılığın yaradılması yolları, qeyri-bərabərlik, təbii resursların qıtlığı və miqrasiya problemləri ilə bağlı müzakirələr aparılıb.
Materialda XI Qlobal Bakı Forumunun “artıq uzun illər əvvəl qlobal miqyasda aparıcı beynəlxalq konfranslardan birinə çevrildiyini” bildirən Azərbaycan Prezidenti İlham Əliyevin sözlərinə də yer ayrılıb.
“Hesab edirəm ki, Bakı Qlobal Forumu Davos Dünya İqtisadi Forumu, Münxen Təhlükəsizlik Konfransı kimi aparıcı beynəlxalq forumlarla bir cərgədədir. Nizami Gəncəvi Beynəlxalq Mərkəzinin potensialı, iştirakçıların siyahısı baxımından biz həqiqətən də görürük ki, hər il Bakıda keçirilən müzakirələr müxtəlif mühüm beynəlxalq məsələləri daha yaxşı anlamağa imkan verir”, - deyə dövlət başçısı vurğulayıb.
Diplomat onu da xatırladıb ki, bu yaxınlarda Bakıda Cənub Qaz Dəhlizi Məşvərət Şurası çərçivəsində nazirlərin 10-cu və Yaşıl Enerji Məşvərət Şurası çərçivəsində nazirlərin 2-ci iclasları keçirilib.
“Azərbaycan Avropa ölkələrinin enerji təhlükəsizliyində mühüm rol oynamaqda davam edir. Üstəlik, bu görüşün də göstərdiyi kimi, Azərbaycan hazırda yaşıl enerjinin ixracı istiqamətində uğurla irəliləyir və ölkə prezidenti deyir ki, bu, karbohidrogenlərlə zəngin ölkələrdir. Bu prosesdə aparıcı rol oynayır”, - deyə səfir Ş.Abdullayev bildirib.
Diplomat əlavə edib ki, Qazaxıstan Respublikasının Prezidenti Kasım-Jomart Tokayevin Azərbaycana səfəri zamanı logistika layihələri müzakirə olunub:
“Bunlar təkcə cəsarətli ideyalar deyil, Rusiya-Ukrayna müharibəsi və Qırmızı dənizdəki hadisələr fonunda görünməmiş aktuallıq və tələbata malik olan artıq mövcud nəqliyyat dəhlizləridir”.
XƏBƏR LENTİ
27 Noyabr 2024
ŞƏRHLƏRŞƏRH YAZ