Onlayn ictimai-siyasi qəzet
Bakı restoranında Türkiyə- İsrail görüşü: İran naziri “təsadüfən” oraya daxil oldu, ara qarışdı - SENSASİON HEKAYƏ
Musavat.com xəbər verir ki, Bakı diplomatik və kəşfiyyat dairələrinin gözlənilməz toqquşma nöqtəsinə çevrilib. "Middle East Eye" resursunun yaydığı məlumata əsasən, 2025-ci ilin aprel ayında Türkiyə Milli Kəşfiyyat Təşkilatının (MİT) yüksək vəzifəli rəsmisi ilə İsrailin təhlükəsizlik xidmətinin nümayəndəsi Bakıda gizli görüş keçirib.
Görüş zamanı Suriyada təhlükəsizlik sahəsində əməkdaşlığın genişləndirilməsi və mümkün birgə əməliyyatların detalları müzakirə olunub. Lakin bu strateji görüş təsadüfi və eyni zamanda dramatik bir qarşılaşma ilə yarımçıq kəsilib.
Tərəflər Bakının elit restoranlarından birində nahar etdikləri vaxt, restoranın qapısından İranın yollar və şəhərsalma naziri Fərzanə Sadıq daxil olub. Rəsmi səfərlə Bakıda olan Fərzanə Sadıq sadəcə çay içmək üçün restoranda masa seçərkən, onun mühafizəçiləri ətrafı dərhal skan edərək, qarşıdakı masada əyləşmiş şəxslərin şəxsiyyətini və siyasi təmsilçiliyini seziblər.
Həssaslığı dərk edən mühafizə qrupu naziri dərhal restorandan çıxarıb, hər hansı diplomatik və ya informativ qarşıdurmanın yaranmaması üçün vəziyyəti operativ şəkildə nəzarət altına alıb.
Kəşfiyyat dairələri ayaqda: Bakı “səssiz diplomatiyanın” yeni mərkəzinə çevrilir
Bu hadisə Bakı şəhərinin Yaxın Şərqdə informasiya müharibələri, gizli diplomatiya və kəşfiyyat əməkdaşlığı üçün önəmli platformaya çevrildiyini bir daha sübut edir. Analitiklər hesab edir ki, Azərbaycanın strateji neytrallığı və coğrafi yerləşməsi, bu kimi görüşlər üçün ideal məkandır.
İran tərəfi hadisə ilə bağlı ictimai açıqlama verməsə də, Tehran rəsmilərinin bu qarşılaşmanı və onun fonundakı Türkiyə-İsrail əməkdaşlığını diqqətlə izlədiyi ehtimal edilir. Ekspertlərin fikrincə, bu, regionda formalaşmaqda olan yeni təhlükəsizlik arxitekturası fonunda İranın manevr imkanlarını daralda bilər.
Bu təsadüfi qarşılaşma, əslində geosiyasi səhnənin arxa planındakı gerçək mübarizəni bir daha üzə çıxardı: Bakıda çay süfrəsi ətrafında dünyanın ən mürəkkəb təhlükəsizlik oyunları qurulur.
Musavat.com
XƏBƏR LENTİ
18 Iyul 2025
17 Iyul 2025
ŞƏRHLƏRŞƏRH YAZ