Onlayn ictimai-siyasi qəzet
Avropa Trampa qarşı dirənişə keçdi: Şolts da çəmkirdi, ABŞ-ı Rusiyaya bənzətdi...
Almaniya kansleri Olaf Şolts ABŞ-ın keçmiş prezidenti Donald Trampın Qrenlandiya ilə bağlı iddialarını tənqid edib və bu açıqlamaların beynəlxalq hüquqa zidd olduğunu vurğulayıb.
Musavat.com bildirir ki, Şolts, bu mövzu ilə bağlı Avropa liderləri ilə məsləhətləşmələrdən sonra bəyanat verib.
Bild nəşrinin məlumatına görə, Şolts bəyanatından əvvəl Danimarkanın baş naziri Mette Frederiksen və NATO baş katibi Mark Rütte ilə telefon danışığı aparıb, Fransa prezidenti Emmanuel Makronla isə SMS vasitəsilə əlaqə saxlayıb. Frederiksen Avropanın bu məsələyə “təcili və ictimai reaksiya verməli” olduğunu bildirib.
Kansler Şolts Avropalı həmkarları ilə müzakirələrində ABŞ-dan gələn bəzi son açıqlamalara dair “anlaşılmazlıq və narahatlıq” ifadə edildiyini qeyd edib. Onun sözlərinə görə, belə bəyanatlar cavabsız qalmamalıdır, çünki onlar beynəlxalq təhlükəsizlik və sabitliyə ciddi təhdid yarada bilər.
Şolts çıxışında Rusiyanın Ukraynaya qarşı başladığı müharibəni misal gətirərək, oxşar hərbi təhdidlərin beynəlxalq birlik tərəfindən ciddi şəkildə nəzərə alınmalı olduğunu vurğulayıb.
“Belə təhdidlərə vaxtında reaksiya vermək vacibdir. Ukraynanın suverenliyi uğrunda apardığı mübarizə bizə beynəlxalq hüquq və təhlükəsizlik prinsiplərinə sadiq qalmağın əhəmiyyətini göstərir,” — deyə Şolts əlavə edib.
Bu açıqlama, Trampın Qrenlandiya ilə bağlı iddialarının Avropada yaratdığı narahatlıq fonunda Şoltsun Avropanın mövqeyini qəti şəkildə ifadə etməsi kimi qiymətləndirilir. Avropa liderləri bu mövzuda həmrəylik nümayiş etdirərək, beynəlxalq hüququn qorunmasının vacibliyini bir daha vurğuladılar.
Musavat.com
XƏBƏR LENTİ
09 Yanvar 2025
ŞƏRHLƏRŞƏRH YAZ