Onlayn ictimai-siyasi qəzet
ABŞ onlarla sığınacaq axtaran rusiyalını Moskvaya deportasiya edib
ABŞ immiqrasiya hakimiyyət orqanları onlarla rusiyalı sığınacaq axtaran şəxsi Moskvaya deportasiya edib. Onların arasında dezertirliyə görə axtarışda olan keçmiş hərbçi də olub və o, dərhal saxlanılıb.
Musavat.com xarici agentliklərə istinadən xəbər verir ki, bu barədə "The Guardian" qəzeti məlumat yayıb.
Məlumata əsasən, ABŞ İmmiqrasiya və Gömrük Polisi (ICE) tərəfindən təşkil olunan ən azı iki deportasiya reysi Luiziana ştatındakı Aleksandriya saxlanma mərkəzindən qalxaraq Qahirəyə (Misir) enib. Burada rusiyalı sığınacaq axtaranlar Misir və Rusiya hakimiyyətlərinin iştirakı ilə Moskvaya yola salınıb. İlk reys iyun ayının ortasında baş tutub və təxminən 30 nəfər, sonuncu reys isə 27 avqustda baş tutaraq 50 nəfərə yaxın şəxsi aparıb.
“Bizi qandalladılar, əl-qolumuzu bağladılar və ICE təyyarəsinə mindirib Qahirəyə göndərdilər”, – adının açıqlanmasını istəməyən deportasiya olunanlardan biri danışıb. Onun sözlərinə görə, sənədləri əlindən alınıb və iki saatlıq fasilədən sonra Misir polisi onlara Moskvaya uçmağı əmr edib.
Moskva hava limanına enişdən sonra deportasiya olunanlar Rusiya güc strukturları tərəfindən “filtrasiya”ya – sorğu-suala məruz qalıb. Cinayət işi olmayanlar buraxılıb.
Deportasiya olunanlar arasında 25 yaşlı keçmiş hərbçi Andrey Vovçenko da olub. O, 2022-ci ilin oktyabrında hərbi hissəsini tərk etmiş və Rusiya Müdafiə Nazirliyi tərəfindən dezertir kimi axtarışa verilmişdi. Ona 10 ilə qədər həbs cəzası təhlükəsi var. Şahidlərin dediyinə görə, Vovçenko Moskvaya aparılmamaq üçün yalvarıb, lakin Misir polisi onu zorla təyyarəyə mindirib və oturacağa bağlayıb.
ABŞ Daxili Təhlükəsizlik Nazirliyi (DHS) məsələyə dair şərh verməyib. ABŞ və Misir orqanlarının bu əməkdaşlığı Rusiya xüsusi xidmətlərinin deportasiya olunan şəxslərə çıxışının əvvəlcədən bilindiyini gündəmə gətirib.
Rusiyalı hüquq müdafiəçisi Vladimir Oseçkin bildirib: “Təəssüf ki, ən pis qorxularımız gerçəkləşir. Putinin müharibəsindən və repressiyalarından qaçan insanlar ABŞ-da məhbus kimi saxlanılır, bəziləri isə FSB-yə təhvil verilir. Bu, qəddarlıq və rüsvayçılıqdır”.
Çərşənbə günü Rusiya müxalifətinin aparıcı simaları — Yuliya Navalnaya, Vladimir Kara-Murza və İlya Yaşin Kanadanın baş naziri Mark Karnini ABŞ-dan deportasiya təhlükəsi ilə üzləşən rusiyalılara sığınacaq verməyə çağırıblar.
Musavat.com
XƏBƏR LENTİ
04 Sentyabr 2025
ŞƏRHLƏRŞƏRH YAZ